北彊巴基斯坦之旅

籌備經期（oh﹗係幾個星期﹗）既北彊巴基斯坦之旅到宜家仍未落實，除左我同另一個同事做左鐵腳之外，其他胆拖果幾隻腳仍然未落實；乘飛機還是乘火車仍未落實；巴基斯坦簽證仍未落實；租車還是坐公車仍未落實。只有出發和回程的時間已落實：１９／７﹣１９／８。

行程大概會係：深圳﹣烏魯木齊﹣哈納斯﹣賽裡木湖﹣伊黎﹣那拉提﹣巴音布魯克﹣庫車﹣喀什﹣布倫口沙湖﹣喀拉庫勒湖﹣塔城﹣紅旗拉甫口岸﹣sost﹣passu﹣hunza﹣gilgit﹣islamabad﹣kawalpindi﹣lahore﹣仍未落實，哈哈﹗

希望快d搞掂啦﹗

沖出水世界

上個星期上堂無咩做，安排左呢齣戲俾佢地睇，都幾有意思架﹗有型老鼠雖然食好住好，但係無朋友，無家人，非常孤獨﹗一次意外，有型老鼠去了地下世界，那裡雖然污穢不堪，但有愛，有朋友，有家人，有同纇，比起高尚住宅，美味佳餚更具吸引力。雖然有型老鼠最初決意回到地面那個安樂窩，但最終都是回到有愛的地方去。整齣戲充滿搞笑和追逐的場面，亦很有教育意味﹗

最可愛的是bonus部分竟然可以打機和跟著畫有型老鼠，很適合小朋友呢﹗

女排大獎賽

意大利對中國個場，真係無野好講，一句：好睇到賴屎

three four nine nine開估

１．有咩牌子既牛仔褲應該係俾Ｄ犯賤既人著既呢？（呢個係一個好舊既料黎架喇，朋友就實識啦﹗）

２．香蕉sir見我問埋d舊野，就問一個連我地果隻小肥羊都話小學時聽過既問題：three four nine nine係指咩呢？同女人有關既。

答案：

１．lorly牌牛仔褲（lorly jeans--攞黎賤士）

２．香蕉sir既答案係：肥婆奶奶；

　　我既答案係：free fall奶奶，即是女人果對奶奶玩free fall，咁即係形容一d老女人啦。（唔好話我邪，係問既個位香蕉sir平時都有講下三級野，我咪循住佢個方向去諗囉﹗送潘婷老師聽完之後笑到眼水都標埋，但係入油miss話唔明，哈﹗）

剩餘物資

利用剩餘物資造的：

磁石牌

衣夾掛飾

小手工

小午餐盒袋

萬用卡

three four nine nine

今日帶d學生去camp，食飯時無聊，同d同事估爛gag：

１．有咩牌子既牛仔褲應該係俾Ｄ犯賤既人著既呢？（呢個係一個好舊既料黎架喇，朋友就實識啦﹗）

２．香蕉sir見我問埋d舊野，就問一個連我地果隻小肥羊都話小學時聽過既問題：three four nine nine係指咩呢？同女人有關既。（嘩—我聽完之後，覺得小肥羊細個時應該好曳，點知．．．．．．佢地個答案同我果個有好大分別呀﹗究竟我同佢地既答案係咩呢？）

得閒開估。

幾點放工

Ａ：喂﹗想約你今日食lunch呀﹗

Ｂ：你黎我呢邊食啦﹗

Ａ：吓，新界咁遠，做咩唔出九龍食呀？

Ｂ：都未放工。

Ａ：吓，學生都走晒啦，學期尾仲有咩做呀？

Ｂ：我宜家做緊咩吖？

Ａ：傾電話囉。

Ｂ：咪係囉。咪做呢Ｄ囉。

Ａ：咁做咩要響學校打呢？

Ｂ：學校對我地好，諗住等我地交少Ｄ電費電話費咁啦﹗

Ａ：咁你幾點食lunch呀？食到幾點呀？我睇下黎唔黎到。

Ｂ：實得啦，１２：４５食到２：３０。

Ａ：你食lunch食到咁晏，咪好晏至放工？

Ｂ：錯，３：３０就放工喇﹗

Ａ：下晝果一個鐘時間好緊要架，一個鐘都要返？

Ｂ：梗係重要啦，刷牙、開大、小睡片刻，時間剛剛好。

Ａ：你學校真係對你地好呀，慌死你地生活習慣唔健康，等你地搞掂晒Ｄ野至放你地走，你就好啦﹗

Ｂ：

打電話啦

響香港，所有高層都係用個pat黎諗野既，包括果Ｄ話會安排蜘蛛俠兄妹入住較低層既單位會安全Ｄ既高層。

兩個字啦：白痴﹗

今日因為高層既無遠見，就令一班蟻民老師做左接線生啦﹗

打電話啦

今日打八號風，一早起左身瞓唔番，下晝等緊食既時候睡魔急call，瞓到流晒口水之際，同事打電話黎話學校要我地逐個學生打去通知佢地，聽日如常返全日，唔係返半日。

聽到呢個消息，第一時間梗係媽班高層啦，尋日都打風啦，又唔通知定Ｄ學生如果真係打得成，學校既安排係點，完全無遠見﹗最慘係果Ｄ一班有成四十人，又搵唔到另一個班主任幫手打電話果Ｄ同事咋（唔知有無呢Ｄ人呢）。

所以話，響香港，所有高層都係用個pat黎諗野既，包括果Ｄ話會安排蜘蛛俠兄妹入住較低層既單位會安全Ｄ既高層。

兩個字啦：白痴﹗

水筆仔

星期日我和路人甲到了三門仔做生態導賞的考核，天氣炎熱，令我汗流浹背，非常辛苦﹗考核過程中，我們一組雖然得到導師高度評價，但我覺得其他幾組的表現及水準簡直達到專業水平，非常佩服﹗其中兩組都有介紹水筆仔 (秋茄)（Kandelia candel），它是 紅 樹 科 植 物 ， 通 常 以 純 林 的 形 態 出 現 ，是一種非常罕見的「胎生」植物。

以前路人甲曾經教過我有關這種植物的資料，但我總是沒留心，連浮在水中的種籽(果實)也誤以為是莖，好奇心完全欠奉﹗經過今次同學的介紹，我才知道原來水筆仔有著值得我學習的地方，大自然真是一個令人敬佩的老師﹗

水筆仔四周的泥土和河水中，都含有很高的鹽分，種子沒有辦法發芽生長。 於是水筆仔便發展出一種特別的方式，使種子留在樹上，先發芽、長成幼苗，才落地生根。掛在枝條上一枝枝的「筆」，就是幼苗。這種特別的「胎生」方式，使水筆仔能夠克服困境，繁衍出越來越茂密的樹林。

水筆仔這種克服環境的能力實在令我敬服﹗它知道自己沒有能力改變環境，為了生存，它讓自己去接受這種惡劣的形勢，由自己去適應這種環境。它比起人類更懂生存之道。有些人遇上困境時只會自怨自艾，整天愁眉不展，並不積極面對困難，勇敢把它們克服，又怨恨別人沒有給予援手。其實，當不能改變環境，不能改變命運時，我們要懂得像水筆仔一樣，適應環境，靠自己努力解決問題，讓自己好好地活下去。

水筆仔從開花、發芽、成熟、掉落、著根到成長的奇特過程，可以體會它在河口沼澤地這惡劣環境中巧妙的生存方式。每年5、6月，水筆仔就會開花，一朵朵像是白色的小星星。花謝之後，便長出圓錐的果實。 果實成熟後，並不像一般植物會掉落，而是繼續留在母樹的枝條上，直接發芽，伸出胚莖，漸漸長成幼苗。這就是所謂的「胎生」。幼苗吸收母樹的養分，繼續成長。胚莖抽長成為筆狀，一枝枝垂掛在枝條間。頂端的胚芽和子葉包在蒂萼中，在母樹上度過脆弱的發芽期。到第二年春天，成熟的筆狀胎生幼苗從母樹上脫落下來，直直插入濕軟的泥地裏，開始獨立生活。如果掉在水中，會隨水漂流，一接觸陸地，便會就地生長起來。水筆仔一插入泥中，從根尖伸長出許多支根，使身體固定直立。支根不斷的伸展，擴大根莖，抓緊泥土，同時又可以幫助根部呼吸。水筆仔往上抽長，長出厚厚的綠葉，可以貯存水分。經過兩年，就可以開花結果，繼續傳宗接代了。

就算是一棵小小的水筆仔也有它適應環境的能力，上天也賦予它奇妙的成長過程，讓它經歷許多，卻不致令它滅亡，何況是人呢？﹗我們是萬物之王，是地球上最尊貴的生物，是耶和華最珍惜的造物，我們又怎麼會沒能力克服困難呢？水筆仔就算掉落在水中，漂浮兩三年也不會死亡，是因為它的母親一早已給予它足夠的營養，它身上又是一層綠，可以利用光合作用繼續生存。它淨在水中的身體是微微向外彎的，這方便了它在近岸的地方遇上潮汐時容易被水沖到泥上時，插在泥中，落地生根。我們何嘗不是得到足夠的養份才來到這世界？社會何嘗不是給予我們許多學習生存的技巧嗎？但，為什麼今時今日的人，尤其是年青人，動輒情緒低落，甚至要死，似乎一遇上問題，一有困難便是人生的盡頭呢？我們該好好向這枝小小的水筆仔學習，學習它那種不屈不撓，努力生活的精神啊﹗

釣墨記

尋晚一班同事去左釣墨魚，可惜路人甲唔舒服無黎啦，否則佢就會見到我講緊廢話時又有墨魚上釣，食緊蛋糕又有，飲下檸檬茶又有，串緊人又有，好鬼勁﹗一共釣到二十條，全船之冠。Ｄ無良同事見我釣到咁多，趁我放低Ｄ墨魚時就連我個位都霸埋，不過，霸到我個位係無用架，佢地都係一條都釣唔到。結果，佢地既結論係：我前世應該係俾墨魚整死既，宜定果條墨魚Ｄ後代黎還債﹗哈﹗好有創意﹗

其實我都唔知點解釣多過佢地咁多，佢地有Ｄ真係一條都釣唔到呀﹗釣得最多都係八條。唯一既解釋就係我上次去潛水，響好深下既位置先見到墨魚，咁咪放條魚絲長Ｄ囉﹗其實今次都唔算多啦，我記得早幾年試過有次全船人都釣到，我自己都釣到一桶。當晚根本食唔晒，大家要打包拎走添﹗

＠＠＠＠＠＠＠＠＠＠＠＠＠＠＠＠＠＠＠＠＠＠＠＠＠＠＠＠＠＠＠＠＠＠＠

講番Ｄ同事，有位小妹妹，人仔細細好似阿姑，咁我咪叫佢做阿姑囉，當然，佢一定唔喜歡，佢話：「我係阿姑，你咪係姑婆？」

我好淡定咁答佢：「係。」

阿姑好開心咁：「哈哈哈哈哈，姑婆。」

我：「咁，我宜家可以名正言順，照番晒輩份咁叫你做阿姑喇﹗」

坐隔離個位入油聽到，反應如下：

坐後面位麥當奴叔叔搭咀：「咁叫你ＰＡＩ囉。」

阿姑：「都好過阿姑。」

我：「哈哈哈哈哈哈。。。。唔係果個ＰＡＩ呀，係３．１４果個ＰＡＩ呀。」

我同麥當奴叔叔

麥當奴叔叔：「要乘１０先得喎。」

我：「係喎，咁先啱佢（身材），咁佢自我介紹時咪好唔方便：hi, nice to meet you. I'm PAI times ten.」

麥當奴叔叔：「係喎，咪叫十ＰＡＩ囉。」

我：「good呀」

十ＰＡＩ：「點解呀？．．．．．（一直問落去，及世之世，阿門）」

我：「咁你叫miss why啦。」

十ＰＡＩ：「點解呀．．．．．」

結果都係覺得阿姑適合Ｄ（因為佢連年青人玩意﹣﹣BLOG都唔識上），於是立即幫佢攞埋個註冊商標，算唔話得啦﹗

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

呢位阿姑除左鍾意問點解之外，反應亦都好遲緩下，例如：

我話佢聽，麥當奴叔叔唔係一個好人黎架，所以佢其實唔係ＴＬＬ咁簡單，佢仲係ＴＩＬＬ添。（呢段說話，我係響過紅綠燈之前講既）

當我過到馬路既另一邊，我聽到佢企左響馬路中心狂笑，我同麥當奴叔叔既反應係：唔通響呢五至七秒之間發生左Ｄ野，我地miss左？

Ｏh! my God!

原來佢係笑緊ＴＩＬＬ個名，無辦法啦，唔叫你做阿姑，我會覺得自己唔忠於事實以及人物性格呀﹗

﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣

細教員室充滿住：阿婆、阿姑、阿嬸，真係一個老人家樂園呀﹗

一仔與七仔

尋日食飯時，同西瓜、一定係男人佢地傾開，講講下講左我既一件事：

話說某日正在辦公時，坐著無聊，諗下呢諗下路，諗下宜家d學生d名懶特別咁，改到都唔識讀，如果我生個仔出黎叫佢做阿一，陳一，咪又簡單又特別囉。辦完公走出廳見到路人甲，就問下佢如果佢有個仔，佢會幫佢改個咩名。路人甲諗左幾秒，答我：「陳一。」(唉唷~~~~真係心靈相通架唧)

一定係男人答咀：「咁你生七個既話，咪叫做陳七？」

我：「係呀，係呀，佢應該係開跌打鋪架，陳七跌打。」

西瓜：「咁錢七呢？」

我：「佢點都會係個車行老闆啦﹗不過係賣二手車既。」

今日講左尋日段對話俾雀班媽媽聽，佢既反應係：「咁田七呢？」

我：「開藥材鋪架﹗」

叫阿七都幾得意丫，令我想起好耐之前有位男同事，叫XX添，新老細黎到開staff meeting時叫呢位同事時，叫左佢做XX漆，可能老細老眼昏花啦，我地之後，以後就叫左佢做漆叔喇﹗

勞氣的家長

尋日食飯時，隔離有位女士(應該係家長同個)，老公好勞氣咁數落全港所有老師(全程只有佢講，佢老公無應佢)：

「d老師無心教架，淨係識得睇下邊間學校人工高，就去邊間，邊度係為教d細路丫﹗」(我心諗：師奶，如果真係間間學校d人工都唔同，香港教育界就唔會一譚死水啦，係呢幾年至話有少數既直資學校會俾唔同既人工老師架咋，咪以為band 3 d 人工低d呀﹗)

「d老師又無禮貌，打電話黎都唔稱呼一聲咩太咁，咁無禮貌點教d學生呀？」(我心諗：大佬，叫你咩太係容易中招過踩地雷架。宜家d學生都唔知係邊個湊既，有阿爺阿公，有親生老豆老母，有姨媽姑姐，有表姨契媽；更有d學生既父母都另外再結婚，阿媽已經唔係陳太，你仲叫佢陳太，你咪死得囉；又有d話阿陳大文d野你問佢阿媽啦，下？你明明係陳太又點解唔係陳大文個阿媽呀？千奇百怪，都係稱呼d家長：請問陳大文家長響度嗎？你好呀，請問你係陳大文邊位呀？)

「果d老師淨係教坐前面既學生架咋，叫後面果d唔好咁嘈，嘈住前面d同學聽書喎﹗你話有無搞錯丫，後面就個個響度打機都唔理。」(我心諗：有d學生真係被迫返學，根本唔想讀既程度比我唔想返工既程度更甚，有d老師真係無咁既能力叫呢班怪獸打開書坐定定上堂架，咁咪唯有教d想學既學生囉﹗咁已經係盡責架喇，唔盡責果d係d學生想聽書都無野聽呀﹗<石sir咪係囉>)

「宜家d老師真係不知所謂........<下刪一萬字>」(我心諗：有d老師真係幾不知所謂架，我間社團都有啦，不過唔係全部丫嘛，師奶，我夠想講宜家d家長不知所謂啦，但係只係我地唔好彩教親d學生既家長都係姐<唯有話唔好彩啦>，咁不滿，送d仔女去俾番鬼佬教囉，你又唔知佢講咩，教d咩，又俾左咁多錢，你一定覺得佢地教得好架﹗放心放d仔女洋啦﹗)

 

西瓜是西施

尋日去左街市食飯，大家各自響唔同檔口叫野食，當大家起勢食既時候，西瓜拎左個發泡膠飯盒黎，打開，開始食。

我睇左兩眼含住啖麵：「你盒咩黎架？」

西瓜：「蝦仁炒蛋飯。」

我：「咁樣衰既？﹗」

西瓜：「」

蜜蜂女立即：「我唔覺呀，好靚丫﹗」

大家左一秒，起哄：「係啦......我地明既.......你睇佢就梗係靚啦......靚......」

西瓜原來係西施黎架(響某個角度同某種欣賞眼光)，想像到嘛.......西施呀。

病呀

終於都病左，咳得好辛苦﹗基本上，病就係辛苦架啦﹗

星期日睇電視，訪問左一對母女，阿媽五十幾歲，但係病到似個七十幾八十歲既阿婆，個女為左照顧阿媽，辭左份工，真令人羨慕﹣﹣個女咁孝順；做阿媽既有個女全天候服侍自己；份工話辭就辭，經濟上支持到自己去做應該做既野。

想當年，婆婆臨走時，成日出入醫院，有時住三四日就出院，我根本無諗過佢邊次會出事，不過就一有時間就去探佢，雖然真係遠，但係遲左就無得陪啦。果時我個電話一定唔會熄，半夜有電話黎就心跳加速到爆錶，所以如果個電話唔係Ｄ咩緊要野，實俾我鬧爆﹗

結果，婆婆走當日，我因為之前一日去過探佢，又諗住阿媽會去探佢，所以無去，點知，佢就趁所有人都唔在場時靜靜地走左。護士發現佢唔係好掂時打電話俾我，我一邊亂著衫，一邊打電話通知住得最近既阿媽，再開車去醫院。雖然已經踩到地板油又衝晒可以衝既燈，但都係趕唔切。

呢種遺憾，唔可以再發生﹗

人總有一死，果兩母女真幸福﹗

＊為左避免咁快死，我宜家就要休息喇﹗

原來咁勁

話說個段對話之後(請睇引用部分)，今日同阿ee坐同事車出去食飯啦，回程途中，ee話佢尋晚差d要同佢老公去急症室。

我：「嘩，咩咁激烈呀﹗」

蕉：「兩個一齊去呀，咪好勁﹗」

蜜蜂：「要兩個一齊過床喎﹗」

我：「好重喎﹗」

ee唔澄清，可能事實真係咁樣：「老公死都唔肯去，咪同佢去睇醫生囉，醫生話佢條腰勞損呀﹗」

我：「嘩﹗做到勞損，都好勤力喎﹗」

蛙：「咁你仲去做gym，返屋企陪下老公啦。」

ee：「我唔鍾意返屋企架。」

我：「佢都係為個老公著想姐，費事返到屋企加重佢老公既病情呀﹗」

嘩﹗原來ee咁勁﹗

父親節蛋糕

父親節前夕，特登造左呢個蛋糕俾老豆，係個藍莓雜果忌廉蛋糕，味道唔錯，不過路人甲話我平時整果Ｄ芝士蛋糕好食Ｄ。

現場報導

各位觀眾，宜家雖然横風横雨，但係我後面行緊必既兩位行必人士仲係響處慢步，似乎無懼風雨，仲好似係相逢恨晚咁，朝早仲叫人地做黃紹黃，但係一見面就你一言我一語，互相了解，有目擊者聽到有人問：「你教英文架可？」，竟然響學期尾仲未確定對方教咩，真係特別呀。我響頂唔順既情況下，唯有急步向前走，免得毛管直豎。佢兩個仍然係慢步緊架，有咩最新報導，我會第一時間向大家再報導。直播室，交番俾你喇。毛記電視記者，蛇仔響大埔既現場報導。

新聞報導

以下係一則特別新聞報導：

昨日下晝十二點，三名行必人士(大嬌、石sir、蛇仔)於大埔行必，大概十二點廿分，其中一名行必人士(石sir)表示要獨自行多一陣必，而另一位行必人士並沒有反對，亦表示唔關自己事，而第三位行必人士(蛇仔)表示一點零五分先食飯，暗示石sir行為不當。但石sir堅持要行多陣，仲表示等陣係約左人食飯。第三位行必人士於咨詢過石sir老細之後，決定報警(山姐)。警方於一點零五分時仍未有此失蹤人士下落。如市民曾經見過以下人士「」，請與警方聯絡。

 

咩病呀？

鳴謝路人甲提供以下資料：

石sir近月經常請假，某日，石sir打電話回校請假：

石：「喂，校長，我今日想請假呀﹗」

校：「你上個月請左六日假，上個星期請左兩日假，今個星期只返左一日，究竟你咩病呀？斷估你唔會要bed rest嘛﹗」

石：「我個病唔講得架喎。」

校：「有咩病唔講得呀？」

石：「其實我唔講你都睇得出啦。」

校：「我又唔係醫生，你唔講又成日請假，我唔批得俾你架喎。」

石：「講左你都唔會批俾我架喎。」

校：「咁咩病呀？」

石：「詐病。」（成個英文panel響晒度）

＊以上情節純屬虛構，如有雷同，實屬巧合。

笑死我既腹語

最近咁多低能野，睇下Ｄ好笑架啦﹗

http://blog.pixnet.net/koshiyen/post/16837295

背後的理念二之一將功成萬骨枯

卡士唔洗多，白頭一個已經合晒套戲名喇﹗

上集講到雀班媽媽為保英文科既名聲，唔想外人睇我地學校堂時睇到眼瓊瓊，同白頭講要求教班比較好既１Ｄ。

之後，中文阿頭（可簡稱盅頭．．．．飯）諗住幫下忙，踱掂佢啦。

中：「咁叫考試Ｌ帶新人就邊班都得啦。」

白：「唔得，考試Ｌ係唔可以郁既。」

中：「咁雀班媽媽教１Ｄ英文，做中二班主任囉﹗」

白：「雀班媽媽要做中一班主任架。拿，呢個係你既提議黎架，你要負責呀﹗」

中：「嘩﹗提議下就要負責，只有獨裁政府先至唔俾人提議架咋喎﹗」費事睬佢，走左。

＊＊咁似Ｄ細路：「拿﹗你鍚左我一啖，我實有ＢＢ架，你要負責呀﹗」

白頭當晚打電話問中要雀既屋企電話（叫佢自己揸車去雀屋企攞囉），為時已是十一點，中話：「人地個老公唔俾雀夜瞓架（好大既大話），有咩聽日先講啦。」

﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣

今日白頭走上七樓搵雀。詳情真係太詳喇，恕小妹無能案件重溫，只能總結如下：

１．白：「雀班媽媽唔可以唔做中一班主任架，佢唔做，考試Ｌ都可以唔做啦﹗」

（ＩＱ題１：有咩關係呢？）

２．白：「你地英文個project改第二級做啦。」

３．白：「你地根本全部針對考試Ｌ。」

（ＩＱ題２：點解佢會咁諗？）

４．白：「將Ｄ需協助既學生拆散佢囉，班班都有Ｄ，１Ａ咪唔會咁差囉﹗」

５．白：「其實１Ｄ都唔會係好好架咋。」

６．白：「你地英文科自己搞掂佢啦，總之考試Ｌ就唔可以郁。你地顧下大圍啦。」

（ＩＱ題３：大圍係咩？）

７．白：「考試Ｌ帶既會係英文科既新人。」（ＩＱ題４：點解一定要係英文科呢？）

８．白：「考試Ｌ帶新人帶得好，新人做錯野佢會鬧。」（超，呢下我認第二邊個敢認第一呀。根據呢個理念，我先至應該帶新人喎。）

總結１：一將功成萬骨枯（我終於明白曾智偉響「無間道」講咩喇）

總結２：白頭頭上既笨（係「並」，唔好意思，我潛意識用左周星馳口音添﹗）唔係頭髮。ＩＱ題５：咁係咩呢？ＩＱ題６：究竟呢個背後既理念既真正主人翁係邊個呢？

﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣

今期ＩＱ題答案：（唔好意思，明明係做緊套戲，宜家又變左做雜誌添，各位要適應下喇，因為呢度係咁亂先有野睇既）

１：可能考試Ｌ根本唔想再做中一班主任，白頭用雀班媽媽做例子，要考試Ｌ留低。亦可能白頭驚同事會眼紅考試Ｌ年年教中一，所以搵雀班媽媽去襯。

２：白頭個focus根本就放左響考試Ｌ度，就算路人乙行埋黎講一句，佢都話人地針對考試Ｌ架啦。呢個叫潛意識反射投映功能紊亂症，絕症黎既﹗

３：無人知，我諗應該係一個港鐵站，白頭落遲左車添﹗

４：咁雀班媽媽咪俾佢斷左條教１Ｄ既路囉﹗

５：草囉，個腦裝唔晒，生到上頭頂。

６：照我同聰明既中文科阿頭估算，九成九係白頭自己，因為校長份人應該唔會咁無理，個理念仲係咁無聊。校長會同你有商有量既，通常。

有口話人病

我相信好多人都有一種叫「有口話人」既病，呢種病既病徵就係無口話自己。即是只會見到人地做得唔好既地方，見唔到自己既短處。

其實，我自己都間唔中病發，只係我會睇下心理醫生﹣﹣自我檢討下，但係，有Ｄ人就話極唔明，教極唔聽﹗

話說有位同事，早前已經係呢個病既長期病患者，有次我響一個途徑度想間接話下佢啦，但係佢個朋友認真唔話得，對佢既保護勁過Ｄ瀕臨絕種既動物，叫我唔好，佢有機會會同呢位病友講下佢既病情如何「自療」。結果我相信朋友已經同呢位病友講過喇。

今日大家一齊，傾開有位同事覺得自己好靚（不敢苟同啦），而呢位病友就加多一句：「嘩﹗佢生左兩個之後，個背寒得好勁喎﹗」

我果個：「算啦唔好串佢啦」既諗法一閃即逝，我問：「你係話緊自己抑或話緊邊個呀？」

朋友笑完即時補一句：「你又黎啦﹗」

病友：「我宜家無寒背喇（我亦係不敢苟同既）﹗」

朋友：「咁你就有資格話佢囉﹗」

我：「仲有資格教佢點樣生完仔由勁寒背變到唔寒背添﹗」

病友好認真答：「咁唔係幾好意思既﹗」

呢個故事係用黎警惕我自己既，大家如發現我病發，請直斥吾非，閣下實在功德無量﹗

在此祝大家健健康康，對呢種病有免疫力﹗

＊＊病友不能進入看到此篇，請各方愛護病友協會人士放心﹗

背後的理念

話說中一班主任名單已出，雀班媽媽要同西瓜一齊做1A班班主任，而呢班通常係集合左全級既精英--讀寫困難、情緒問題、需要特別協助......。雀班媽媽同EDB合作緊一個project，要響英文堂時錄影，然後公開做講座。佢擔心呢「木台」--痴痴呆呆坐埋左一「木台」，到時無野俾人睇，仲呆晒無反應。於是佢要求調班。1D應該係出年最好果班，但係就俾左考試L做班主任(年年佢都教最好果班，都唔知咩原因)，雀班媽媽好自然就問白頭高層可唔可以同佢調啦。

白：呢個唔調得，因為佢要帶新人。

雀：調去第二班都可以帶新人架，我夠想帶新人啦，點解我又無得帶？

白：我都好想你帶新人，不過唔可以調考試L。呢個背後係有一個理念既。

雀：......

白：係老細既理念黎既，老細指定要佢咁樣。你明唔明白呀？

雀班媽媽正一臉茫然，用充滿問號既眼神望住呢位高層既時候。

白：多謝你明白﹗

雀：

白：咁你一係教多班中一囉，但係你個阿頭又唔想，佢想你教既另外一班係中三，不如咁啦，你個project搬去中三度做啦。考試L就一定唔郁得架喇﹗呢個係老細既理念(暗示不便透露)

**白頭高層差在無講佢句金句咋：明又好唔明又好啦﹗

**Application：

1. 當雀班媽媽遲到，佢可以講：呢個遲到既行為背後係有一個理念既，你明又好唔明又好啦，我會堅持﹗

2. 當我食蛋卷時，一定會去人地張臺食既，我會講：呢個決定，背後係有一個理念既，好容易明姐﹗

3. 當石sir遲交卷時，佢一定會講：呢個情況，背後係有一個理念既，多謝你明白﹗

 

音樂會

肥姐夫成日話去練歌，以為佢係返教會練詩歌，尋晚同阿爸阿媽大家姐一眾人等去左聽佢個合唱團表演，原以為好普通既表演，誰不知原來好勁﹗本身仲有張飛多左，早知請蜜蜂女去啦，又有女高音獨唱，又有男低音獨唱，係藝術歌黎架，水準仲係好得添喎﹗除左肥姐夫個合唱團之外（香港愛樂合唱團），仲有黎自北京既合唱團（北京中國廣播之友合唱團）。入場之後，睇一睇本場刊，oh﹗原來係同奧運有關既活動黎既（喜迎北京２００８奧運合唱音樂會），唔怪得見到梁愛詩啦。

睇左一晚，發現香港人真係仲係好少參與呢纇活動，人地個合唱團出場、入後台、排位時，Ｄ觀眾就猛禁響處傾計食香口膠，嘈到一個墟咁﹗首歌明明未唱完，只係停左一拍，Ｄ觀眾就拍手，開頭幾首歌都係咁，好彩下半場已經無左呢個現象喇﹗

音樂會

肥姐夫成日話去練歌，以為佢係返教會練詩歌，尋晚同阿爸阿媽大家姐一眾人等去左聽

父子

尋日黑雨，響屋企無所事事，睇左套「父子」。

第一個印象係郭富城演得好好，佢個角色真係唔死都無用。做得人父，就應該負起教養既責任，佢既無養（成日唔俾錢返屋企，貴利數仲要老婆孭）亦亂教。走頭無路竟然教個仔做賊，阿仔勸佢搵工做，佢呢頭答應，果頭就推個仔入人地間屋度偷野；掛住同個新歡妓女拍拖，求其買張戲飛叫個仔自己睇完就返旅館（著緊草）。呢種老豆你估無呀？一樣米養百樣人，但呢種人最好拎去餵狗，仲學人生仔﹗

至於阿媽，楊采妮，無咩驚喜，交足戲咁啦，不過就令我覺得有Ｄ唏噓。想當年佢話晒都係玉女吖，今日搞到要著住條底褲做戲，真係．．．．．．﹗可能一個女人識錯個男人，後果都係差唔多。好似佢個角色，跟錯左郭富城，捱到頂唔順要走佬，跟個有錢人之後，一天都光晒咁。不過，佢無帶埋個仔走，留低左個仔俾郭富城較飛，又係一個無奈﹗帶埋個仔就跟唔到個有錢人，唯有唔帶囉﹗但係佢明知郭富城係唔負責任既老豆，都留個仔俾佢，呢個阿媽都十分自私兼無情﹗

個細路就最慘，不過天下間有千千萬萬個咁慘既細路。導演今次無誇張，真係有Ｄ咁既家庭架﹗呢個細路做得好好，抵佢攞咁多獎既﹗

阿媽個英文名

話說家姐們Ｄ細路細個時，唔叫我阿媽做阿婆，但係就叫佢做阿ＰＡＵＬ。我老豆就話呢個係阿媽個英文名，不過唔知邊條友又話呢個係男仔名，唔可以俾我阿媽用。

於是，我老豆就話：「咁叫Dolina啦﹗」

我地：「點解呀？」

老豆：「中文即係墮lin喇，你睇下你阿媽咪知道啱晒你阿媽囉﹗」

大家：「又係喎﹗」

外母你搞野

話說我地屋企個個星期六都會返阿爸阿媽度食飯，尋日端午做節，無咩特別，都一樣返屋企食飯。

食完飯，大家通常圍住張飯枱唔走，做我最拿手既野—吹水。

大家姐：「哈﹗點解有Ｄ肥師奶，個身好似水桶咁，但係對腳又鬼咁瘦，一對香雞腳咁。」

我：「係啦，都唔啱比例既。係都應該係我地香雞腳吖嘛﹗」

大家姐：「係啦，我地對腳偏偏唔似阿媽。佢條腰雖然水桶咋，佢下身都唔肥架﹗」

阿媽聽到呢句，立即彈起身，轉身背向我地，反手響自己個羅友處畫圈：「係呀，係呀﹗我個pad都好fit架，你地睇下﹗」大家既目光真係集中響佢個羅友度，除左兩條友。

我：「阿媽，你好唔好意思呀，響咁多個女婿面前叫人睇你個law。」

二家姐：「哈．．．．．．佢地要即刻扮咩都聽唔到，扮唔知你響度做咩，哈．．．．．．」大家笑到癲左。

阿媽你咪搞野啦﹗

我妻子要我和另一女人約會

很感人的一篇文章, 現與你分享! 

***我妻子要我和另一女人約會***

結婚了廿一年後，我發現了一種別出心裁的方法，可以讓愛的火花永保新鮮。

不久以前 ，我和另一位女士約會，其實那還是我妻子的主意， 

有一天她說：「我知道妳很愛她。」我很驚訝，立刻爭辯說：「但我愛的是妳呀！」「我知道，但你也愛她呀！」 

我妻子要我去看的女士是我的母親。 

她已經寡居了十九年，然而我忙碌的工作和身為二個孩子父親的責任，令我分身乏術，以致很少有時間和她相聚。

那晚，我打電話給她，邀約她第二天和我一起吃晚餐和看電影。 

「怎麼了，你還好嗎？」她問道。 

母親是那種會認為晚上那麼晚打電話，又突然邀約她，一定不會有什麼好事的人。

「我想如果有機會和妳單獨約會，一定很有意思。」我回答。

她想了一會兒，然後說：「我非常樂意。」 

那個星期五下班以後，我開車去接她時，心裡有一點緊張，因為從未嚐試過這樣的約會 。當我到達她家時，我看她對這樣的約會，似乎也有一點緊張。

她在門內等著，身上穿著大衣，裡面那件禮服還是最後一次慶祝結婚紀念日所穿的呢！

她的頭髮還特意捲了一下，臉上的微笑像天使一般。

上了車後，她得意洋洋地說： 「我告訴我的朋友，我要和我的兒子外出約會，他們都好羨慕，迫不及待要聽聽我們約會的情形。」

我們去一家雖不豪華，但十分雅致，溫暖舒適的餐廳。 
我母親挽住我的臂彎，好像第一夫人一般。入座以後，我必須幫她看菜單點菜，因為她的眼睛現在只有大的字才看得見。

用餐一半時，我抬起頭來，看到母親正在凝視我，嘴角帶著懷舊的笑容說：

「記得當你小時候，總是我為你看菜單的。」

「那現在妳正好可以休息，輪到我來為妳服務了。」我回答。 

一面享用晚餐，我們一面聊天，聊得很愉快，談了許多最近幾年來，各自生命中的一些事。我們聊得太久了，所以趕不上電影。當我送她回到家門口，她說「我要再和你一起外出 ，但下次讓我作東好嗎？」我答應了。

回家後，妻子問我：「你的晚餐約會如何？」

「非常有意思，比我想像的好多了！」我回答。

幾天以後，母親因心臟病猝發而去世。這事發生得太突然了，讓我完全措手不及。

不久以後，我收到一封信，裡面是上次我和母親約會的那家餐館的一張收據，上面有一張字條寫著：「我已先付了賬，因為我確定自己不可能再有機會去了，但我還是付了兩人份的賬 ──你和你的妻子。你絕對想不到那一晚的約會對我有多大的意義，我愛你。」

從那一刻起，我深深體會，一定要及時說：「我愛你」，並且要常常撥出時間給我們所愛的人。

世上沒有任何事比自然如來因緣和你的家庭更重要，多花時間和他們在一起，因為這些事絕不能拖延到「以後有時間時間的時候」。 

「樹欲靜而風不止，子欲養而親不待」是人生一大憾事。 聖經不是也告訴我們嗎？ 

「凡事都不可虧欠人，惟有懂得愛，要常以為虧欠，因為愛人的，就完全了律法或解脫了。」羅 13:8

後生仔又出招

事件一

後生仔身為數學老師，負責計算各同事既監考時數，竟然連考試Ｌ出錯條公式都唔知，要等到麥當奴叔叔今次負責計先發現問題，累得半個世界要監多左。

事件二

中一學生趕住要交ＤＴ功課，放學時ＤＴ室一個墟咁。有個女仔做緊野時俾個男同學用熱溶膠整親隻手，後生仔當時行開左，個學生又趕住做功課，無搵後生仔。做好功課之後，個女仔話俾後生仔知自己受傷，後生仔竟然話個男仔走左咯，唔理單野，無做任何野（當然啦，到第二日人地個班主任知道件事時，佢就話諗住個男同學走左，第二日至處理啦）。

第二日，個班主任知道件事之後要處理啦，問番後生仔，佢竟然話：「通常Ｄ學生響ＤＴ室玩，我都會罰佢地抄野。」

佢仲未知個重點響邊。宜家有人受傷呀，最緊要梗係通知雙方家長啦，點知個學生番到屋企點講呀，點知個學生個傷會唔會惡化呀，點知個學生會唔會驚俾屋企人話唔講件事出黎而個傷口又有咩事架。但係佢個腦仲仍然停留響點罰個男學生度，吹佢唔脹﹗

點菜

早個星期，同班同事去食飯，其中有幾個已經走左既舊同事都有黎。

當晚約左七點，滔Ｂ（英文名可以叫Toby喎）俾我地呃左幾次都仲係咁準時，真可愛﹗Ｄ人到齊晒又吹左一陣水之後，已經係八點，咁我地就叫壽星仔滔Ｂ叫菜啦，佢攞左個餐牌，好似想背左佢咁睇左一輪，滴住汗咁話唔知叫咩好，於是必sir幫手叫左兩個，我叫埋其他果Ｄ。

到就黎食晒枱上面Ｄ餸時，

我問：「洗唔洗再叫Ｄ野呀？」

大家：「．．．．．．．」

我望向滔Ｂ，佢用左一千零一秒兼好決斷咁答：「叫啦﹗」

我諗佢真係唔夠飽，因為平時佢唔會咁決斷既，於是個餐牌就自動游左去佢手上喇﹗

滔Ｂ重複左以上點菜既動作，必sir今次無理佢，我亦只係拋下一句：「你大個仔喇，自己叫啦﹗」就繼續同人傾計喇。過左一陣，我怕佢仲未決定到，會餓死餐廳之內，

就問佢：「你叫左菜未呀？」

滔Ｂ：「叫左喇。」

我：「叫左幾多呀？」

滔Ｂ：「兩個。」

真係問一句答一句，夠簡潔。

又過左一陣，枱上面已經清晒所有野，新叫既餸終於黎喇。碟餸一出場，簡直係用左spotlight射住佢，大家Ｏ晒咀。

七嘴八舌：「咁熟口面既？係咪食過呀？頭先叫過架？好似食左喇喎﹗」

滔Ｂ滴住汗：「吓？係咩？叫過喇咩？我唔知食左喇喎﹗」

大家安慰滔Ｂ：「其實我頭先都未食呢味。係咩？有叫過咩？好食吖，食多Ｄ啦﹗我頭先淨係食左條菜咋﹗」

於是大家好落力咁食，好快食晒成碟野。

又等左一陣，第二碟到。大家笑住Ｏ咀（呢個動作都幾難做架），淨係睇個石dull都一定認得係之前叫過既通菜。

大家：「呢味．．．．之前都叫過架﹗」

滔Ｂ：「吓？係咩？」

大家：「呢碟係通菜，頭先食左啦﹗」

滔Ｂ：「頭先果Ｄ係通菜咩？我唔知呀﹗」

食完之後，大家想叫甜品。

我：「滔Ｂ，你叫啦，今次一定唔會有事，我地之前無叫過甜品架﹗」