菠蘿炒飯

我見原個菠蘿都只係賣廿蚊，於是就買左一個返去加d青豆雜菜果仁，炒左個飯，好靚又好味﹗

聖誕怪怪糕

聖誕節時，本來想整聖誕樹brownie，但又唔記得買齊材料，結果又無cream又無士多啤梨，就整左呢幾個好樣衰既brownie喇，不過，好好味﹗

蒜苗

早一陣子，買左一大包蒜頭返黎，之後，我又去左旅行，返黎之後，d蒜頭標左芽，所以我索性加少少水，放左幾日，就長到咁高，可以炒蛋喇，好香呀﹗

自瓜製腸粉

呢個腸粉好ok喎，街買一樣呀﹗
做法：
1. 粘米粉150克+水300ml，拌勻，靜候2小時或以上。
2. 粟粉，澄麵，油各1湯匙+鹽1/4茶匙，加入(1)，拌勻。
3. 加入水150ml，再拌勻。
4. 大火蒸3分鐘，捲出，灑上芝麻。

芝士果仁紅莓卷包

用基本方法預備好麵糰，再將麵糰切開四份，每份轆成長方形，鋪上芝士果仁紅莓，卷起，切開四份，發酵十分鐘，塗上蛋漿。
放入二百度焗爐焗約十五分鐘。

自家製麵包(不用麵包機)

舊年買左本麵包書，就整過幾次，幾次都好成功。
我無麵包機，因為屋企無地方放，而且唔會成日整，仲有係d好既麵包機都好貴﹗
呢幾個麵包都係基於一個方法做，只係有唔同既變化啫﹗

餐包

腸仔包

芝士火腿包

基本麵團製法：
1. 將2克酵母溶於温水內及拌勻，待十分鐘。
2. 將完全溶解的酵母水加入所有材料內(高筋麵粉130克、鹽1克、糖15克、蛋12克)。
3. 用手在盤內搓成粉糰，搓至麵糰光滑。
4. 放入10克牛油，繼續搓揉粉糰，直至拉開粉糰時出現薄膜。
5. 用手推圓麵糰。放在盆內蓋上保鮮紙發酵(當室温26-30度時，時間約45分鐘，如在冬天，可用蒸的方法，但放入粉糰後便熄火)，直至發至兩倍大。
6. 用搥打方法按粉糰三四次，將粉糰的空氣排出。
7. 將粉糰分割後再次搓圓，用保紙包好靜放10分鐘。

燕麥曲奇

由英國返黎之後，整過一次曲奇俾路人甲食，佢話好味，仲帶左一d返公司請同事食。
今日路人甲去聽講座，我唔洗煮飯，於是又整多次曲奇，今次加多左d材料，希望更加好味啦﹗

呢個曲奇最好既地方係：好易整，又好味﹗
1. 將125克牛油+1湯匙糖膠+2/3杯黃糖叮溶。
2. 將2杯燕麥+1杯麵粉+1茶匙梳打粉拌勻，可以加入果仁之類既材料。(我今次加埋朱古力粉+提子乾+果皮+合桃)
3. 將(1)倒入(2)裡面，視乎濕度加入奶，搓成粉團，160C焗14分鐘。

甜薯班戟卷

路人甲喜歡食番薯，也喜歡食pancake，所以呢個甜品啱晒﹗

1. 番薯切薄片蒸15分鐘，趁熱壓爛，加入2湯匙煉奶和1湯匙牛油。
2. 班戟皮：120克麵粉+1湯匙黃砂糖+2隻蛋+300毫升奶+1湯匙溶化牛油，拌勻。
3. 煎好班戟皮，將餡料放在班戟皮上，捲起，以少許粉漿收口，將收口處向下，略煎。

可以在上面加糖膠，好味﹗

餐包

15/9/2011

今日無出街，於是響屋企整麵包：

材料：

strong bread flour 260g

sugar 50g

egg 1no.

yeast 1 1/2tsp

milk 90g

butter 50g

湯種：

flour 20g

water 100g

將湯種煮成較乾既球狀。將所有材料混合，發酵好，分八份，搓成球狀，再發酵，塗上蛋漿，180C焗15分鐘。

 

月餅(傳統+冰皮)

今日種完花，就整月餅喇，不知不覺下星期就係中秋節喇﹗

首先講吓個餡，今次整左兩種，一種係蓮蓉餡，另一種係綠豆蓉。

蓮蓉：

蓮子2份，糖1份，菜油1份

蓮子浸軟，去芯，煲稔

留少少水份，用攪拌機打成蓉，放入鑊中，加糖，炒溶，分三次加油至油份完全被吸收，炒至杰。

豆蓉：

開邊綠豆150克，糖75克，油30克，澄麵1湯匙，吉士粉1湯匙

綠豆洗淨，浸過夜，加水至齊面蒸30分鐘，取出，倒出多餘水份。留少少水份，用攪拌機打成蓉，放入鑊中，加糖，炒溶，分三次加油至油份完全被吸收，炒至杰。加入澄麵和吉士粉，炒至乾身。

月餅皮(傳統)：

麵粉180克，糖漿140克，生油50克，全部攪勻，放室溫至少三小時

放入焗爐前先在餅面噴水，180C焗6分鐘

取出掃上蛋汁，再以170C焗15分鐘至金黃色

放兩天待回油就可以食喇﹗好好味呀﹗

月餅皮(冰皮)：

糯米粉1杯，粘米粉3/4杯，麵粉1/2杯，糖1杯，鮮奶1 1/4杯，練奶4茶匙，生油4茶匙

將材料混和，放於平底容器蒸約35分鐘至熟，待涼，搓滑。加入餡料，搓好球狀後，在面放熟糕粉(即炒熟既麵粉)，放入模中，雪凍

燻蹄

響超市見到豬蹄好平，於是買返去試吓整燻蹄

1.      豬腳踭洗淨，出水

 

2.      煲內加入水(蓋面水)及調味料(鹽3湯匙，薑2片，葱1條，八角2粒，花椒1湯匙，紹酒2湯匙)

 

3.      煮滾後改用小火煮半小時，熄火，不要開蓋，浸過夜，翌日，將豬手反轉，再煮至滾，改用細火15分鐘，蓋好待凍，起骨。

 

 

4. 用保鮮紙包實，雪凍。

 

 

5. 切片。

 

 

tiramisu

見到d芝士咁平，於是買左材料返去整tiramisu

1. 3隻蛋白打起加3湯匙糖

2. 3隻蛋黃+芝士打勻，將魚膠粉加少少熱水，將1, 2溝好，加入魚膠粉

3. 2湯匙咖啡粉+rum酒，浸入手指餅

4.將浸滿咖啡水既手指餅放在餅盆內，然後倒入芝士漿(重覆2次)

5. 冷藏3小時後，取出，灑上朱古力粉

砵仔糕

砵仔糕

 

材料：

粘米粉  85克

澄面    55克

片糖    110克

水      2杯

 

1. 用半杯水把粘米粉和澄面拌勻。

2. 用半杯水把片糖煮溶，放涼，逐少倒入粉漿。

3. 模內塗油，將糖水粉漿及已煲稔的紅豆倒入，蒸約十五分鐘至熟。

 

燉怪獸

前一排，路人甲咳到不得了，我聽阿paul既指引，燉左呢d怪獸俾佢食左兩三次，清洗過程係幾驚嚇架﹗

連埋其他藥材同瘦肉一齊燉

呢排輪到我咳，好彩，食左西藥之後已經止左喇，否則阿路人甲可能會叫我燉怪獸俾自己食。

木瓜魚尾湯

好似好耐無煲湯，其實我最鍾意飲湯，煲湯亦非常容易，只係煩在夠唔夠時間煲啫﹗

響台灣旅行時，始終無機會飲木瓜鮮奶，早兩晚諗起，於是煲左木瓜魚尾湯，為土耳其之旅既土耳其浴既泳衣浴做定療程，費事失禮朋友，哈哈﹗

煲魚尾最緊要煎一煎佢，否則煲湯會好腥。

我煎魚有個秘方，就係油熱之後加幾片薑，用鑊鏟將佢地響個鑊度摔，咁樣煎魚，條魚就唔會痴鑊喇﹗

煎好魚尾，切好一個小木瓜，等水滾就放晒落去，再加多幾片薑，煲個半鐘，加鹽。有得飲﹗

魚尾煲爛晒，有d樣衰，不過，碗湯甜得無朋友，連路人甲都話正到不得了，連湯渣都食晒。

自製蘿蔔糕

應吓節，整吓蘿蔔糕先，路人甲最Like。

1．將臘味切粒，炒香（不加油，臘味份量隨意）

2．加入蝦米，繼續炒。

3．將5斤蘿蔔洗淨，刨絲。

4．將蘿蔔絲放入鑊中，加一茶匙鹽，一茶匙糖，一茶匙雞粉，略炒。加水至剛蓋過蘿蔔絲，加蓋煲至水份減少至約一湯碗，水份及蘿蔔絲分開盛起。

5．將600克粘米粉放於鑊中，加水及蘿蔔絲至濃稠，加入臘味。

6．倒入盛器中，蒸約40分鐘。可造三碗8吋直徑的蘿蔔糕。

7．蒸好，加上芝麻，好食。

滑到無朋友既蒸水蛋

我小蛇蒸水蛋好少失手，每次都滑到無朋友，整時要注意：

1．用凍水加入蛋漿入面

2．打完蛋後要撥走d泡泡

3．用中火，千祈唔好用大火

就黎蒸好時，放d蔥花響面，好味﹗

DIY燒肉

講左好耐話整，尋晚終於都整喇﹗

咁黑係d五香粉，不過無問題架﹗

個皮脆到無朋友，不過咸左dd，下次要落少d鹽﹗

裡面都好靚﹗

路人甲都話好食，不過個皮咸左d﹗
參考：http://hk.myblog.yahoo.com/tnp-AUS/article?mid=12458

DIY叉燒

簡易方法，但實在太簡易，簡易到無份量去跟，唯有斷估，結果，味道方面似乎可以減少少海鮮醬﹗

肉方面，明明係想買梅頭，因為路人甲鍾意食半肥瘦既，點知當我行到去肉檔時，把口就講左柳梅，唉，拎到返屋企洗先見到一條瘦瘦既肉條，整出黎會係全瘦叉燒，失敗左一半喇﹗

焗好喇﹗個樣都幾得架﹗

切開之後更加似樣﹗

方法係：用叉燒醬同海鮮醬醃一晚，用幾多醬就視乎舊肉既大小，我今次買左＄25肉，就用左各3茶匙，不過我覺得海鮮醬可以少d。用180度火焗45分鐘至一小時，都係睇舊肉既大小啦。