三/四日陽朔龍脊精華遊建議

桂林市基本上同中國其他大城市無咩分別，而且素質仲比較差同落後，一般既旅遊點唔太吸引(對我自己黎講啦)，可以作為一個轉車站就算喇﹗

行程建議：

三日精華遊：

day1前一晚搭五點幾火車上桂林，第二朝六點幾到(或坐大巴，八點幾開車，第二朝中午前到，或者day1一早搭飛機，中午左右到)。搭車去龍脊，點搭都係中午到。下午行晒三個景點。(如果搭大巴或飛機，下晝既時間就花響搭車去龍脊)

day2一早去桂林轉車去陽朔，途經銀子岩，玩個半鐘，下午踩單車，一定要踩小路。(如果day1無行龍脊景點，呢日上晝就要行番一朝，跟住既行程就要響銀子岩同踩單車度二揀一喇，建議到下銀子岩)

day3一早遇龍河漂流(半漂，上游)，下午留在西街或乘車去福利(day2無踩單車既話，呢段時間可補番)。六點左右乘車出桂林，轉車往機場，晚機返深圳(好似係九點幾機架)。

四日精華遊：

day1, 2同上。

day3乘車往楊堤漂流或徒步往興坪，睇完日落返回西街。

day4同三日精華遊既day3。

龍脊陽朔之旅第八天（下）

影左一輪，又影下黑白啦﹗

行左三粒鐘，搭車返陽朔食lunch＋tea，響西街既後街有條好短既cafe街，我地行左一圈，揀左呢間，Kelly's Cafe。開頭坐樓下，都已經唔錯架喇﹗

後尾落毛毛雨，走上樓上坐，仲正﹗坐樓上，好舒服﹗好有歐洲渡假feel。

d野食都好味呀﹗

坐到五點幾至返酒店pack行李，搭1805班直車返桂林。同Peggy就此拜別。1915到桂林汽車站後，行左大約十五分鐘就到左火車站，我食個桂林米粉，路人甲就食左個快餐RMB8。

食完仲未夠時間上火車，寫下記錄啦﹗見到我側邊呢個係咩黎嘛？

呢個係捉魚用既魚籠，我同路人甲都同一時間睇中佢，要黎做咩呢？哈哈，燈罩﹗

去程時，我叫路人甲去硬卧睇下，佢睇完之後淨係話好多人，咁我話返個程試埋硬卧啦（其實去個程我都不知幾想瞓硬卧呀，慳番好多呀﹗），結果一到桂林個日就買定回程票喇﹗

坐左十三個鐘，16／4上晝1050就到左深圳，我地仲打左陣書釘至返香港。

唔算滿分既旅程，但係好寫意，好開心，好滿足﹗

龍脊陽朔之旅第八天（上）

15/4/09，今日係最後一日響陽朔，夜晚就要踏上歸途喇﹗一早起身慢條斯理拾好背包，0930去晨光酒店樓下間「七重天餐廳」食個all day breakfast，超滿足﹗RMB25有大大杯奶茶，鮮榨橙汁，香蕉pancake，多士，炒蛋，食到飽一飽，再吹多陣水至去搭車過福利。

呢個早餐感覺上食得好嘆﹗

1100上到去福利既車，1130就到左喇﹗響車上面遇到個老伯狂講d人黎呢度拍戲係點點點，以前拍劉三姐時佢又點跟人去睇拍戲，仲話：你地未睇過拍戲唔知架喇﹗

好搞鬼﹗

去到福利，我地周圍亂行，感覺好真，屋係真既住家，居民仲未識「搶錢」，仲未識唔俾你影相，仲會好nice咁同你吹下水，感覺上比興坪仲正﹗

呢度有好多空置左既村屋。

街上到處都係肥雞。

中午放飯時間，學生哥都返屋企食飯。

福利係一個造紙扇既小鎮，街頭巷尾都放左呢d扇出黎。

造好之後就變左咁靚喇﹗

一般既民居都好簡樸。

係咪好好feel呢？﹗

呢個位置向左手邊行會有阿婆收你過路費，好無謂，不過都俾左佢，盛惠RMB3。

阿姐響河邊洗衫。

呢兩隻牛牛響條河度放低兩舊就過左對面岸喇﹗

呢度d竹全部都係青BB架﹗

阿伯反影我地，搞笑﹗

呢個婆婆好sad咁，影低佢先﹗

福利呢排屋好有日本feel。

每逢2、5、8都係呢度墟期，我地又去趁墟lu﹗

其實即係街市，不過平日唔開。

哎喲﹗我行過賣活家禽既地方呀，會唔會有事架﹗

龍脊陽朔之旅第七天

14/4/09今朝一早天氣又係陰天，都唔理喇，尋日打左電話約遇龍河漂流既師傅，今日食完早餐就搭車去金龍橋喇﹗

今日食左呢種雜糧煎餅，同水餃，味道唔錯﹗

用左45分鐘去到金龍橋，0930漂到1445，成五個鐘。

呢條就係遇龍橋喇﹗有成六百年歷史架﹗

遇龍橋上看風景。

真係正到連腳趾公都豎起呀﹗

沿途風景，一字記之曰：「正」。

全程無摩打，只靠師傅對手，你睇師傅幾型仔﹗

不斷都係咁正既景，同師傅吹下水，同路人甲食下野，影下相，五粒鐘，如果呢度係意大利，呢條係貢多拉，我就破產喇﹗所以，咁既價錢有咁既享受，邊到搵呀﹗

衝霸呀，好好玩架﹗我對腳就係咁樣唔覺唔覺晒傷左喇﹗

倒影，同圍都係倒影，仲係好靜好靜咁，舒服到………

響舊縣碼頭附近食飯既地方，見到佢劏完魚又劏雞。我地無響度食飯，因為個早餐勁飽，如果食埋飯，三點都未漂完呀﹗

等師傅食飯既十分鐘，我地周圍影下相。

上筏之後，進入舊縣至朝陽碼頭既無人地帶，好正﹗

師傅話呢個叫漢堡包山。

輕功水上漂？

漂完之後師傅送我地上岸搭車，返到西街就搵左間「七重天餐廳」食tea，等Peggy出現。

同Peggy相認之後，吹左個幾鐘水，又走去陽朔公園個山睇日落，位置唔係好啱，唔係好睇到。跟住去食飯，西街口間「西街傳人」味道唔錯，再食多碗甜品，前面呢碗叫八合一蓮子羹（唔好味），後面既叫做三合一芝麻糊，各RMB5。

最後，同Peggy走去按左一個鐘，主要按個膊頭（RMB50），先至返酒店休息。好充實，好滿足﹗

－－－－－－－－－－－－－－－－－－－－－－－－－－－－－－－－－－

有用資料同溫馨提示：

1．去金龍橋要搭去金寶既車，響金龍橋落車，一落就係碼頭喇﹗

2．最好之前約定師傳，咁樣會平過去到碼頭先搵竹筏，亦平過西街d阿姐開俾你既價錢。

3．遇龍河漂流分三段：金龍橋至舊縣為上游；朝陽碼頭至工農橋為中游；工農橋以下為下游。預約師傅公價為上游RMB110；上及中游為RMB180；下游是大竹筏漂既，師傅唔會漂，即係話工農橋就係終點。

4．如果有時間，一定要全漂（即上及中游），舊縣至朝陽碼頭一段極少人，非常正﹗如果無時間，漂上游比較好﹗

5．政府會收RMB86／50過路費，係師傅俾既，師傳仲要俾車費運竹筏返遇龍橋（RMB20／30），所賺唔多，而且如果全漂的話，一日漂得一趟架咋。如果要做筏工，仲要用千二三蚊買隻竹筏、太陽傘呀、救生衣、救生圈呀、椅呀，仲要俾培訓費，訓d咩呢？游水同划筏，咁先至有得開工，而隻竹筏只用得半年左右就要買過隻新架喇，因為衝霸係會整壞隻筏架，但係用膠筏就更唔襟，所以，唔好講價喇﹗

6．關於過路費，d師傅罷過工，又寫過信，都無用，幾無奈，但係我個師傅都好樂觀，笑住好開心咁講：有咩辦法呀，有得划就划囉﹗反而漓江就無人收呢d過路費喎，你話幾奇呢﹗

7．我今次搵唔到網上紅人封師傅，因為佢個電話壞壞地，聽唔到我講野，於是我搵左北京小姐介紹既朱師傅，佢非常好人，又好傾，電話：13788437846

8．陽朔至金龍橋車費RMB5，45分鐘；工農橋至陽朔RMB2.5。