第五天﹒Agra

4／11／2012
1050，火車遲左50分鐘至到Agra，一出火車站就俾個開價RS450車我地去hostel既搵笨司機纏住，咁貴，我地當然唔上當啦，但係佢一直阻住我地搵tuktuk車，好彩好快有個路過既司機肯車我地，否則我企得兩企實媽爆條友。

我地今次住Taj Mahal旁邊，非常近，間hostel係就係簡陋d，但勝在平又ok乾淨。

1130，響hostel食早餐，book定架的士去Fatehpur Sikri，車程一個鐘，1230起程。
呢個宮殿既石雕真係一絕，靚到無朋友。 

d石雕靚到以為係木雕黎架

皇帝會響柱上面坐響度同坐響地下既臣民議論政事

行完宮殿就行埋旁邊既Jama Masjid

地下一塊塊既係墓碑黎既

Nawab Islam Khan's Tomb，入內要先潔淨，方法係有個細路會倒d水俾你洗手，但洗完更加污糟

呢位係我地請既guide，佢地男人入墓園要戴呢個筲箕響頭度，造形都好搞笑吓架﹗


響Salim Chishti墓入面可以許願，許完綁條紅線響呢度就得架喇，聽講好得架喎，我無試，唔知真定假

行左足足三個鐘，1630開車返hostel。因為hostel出面就係購物大街，所以一下心急買左對鞋，點知就買貴左喇﹗真係要格價架﹗

食完飯早早就瞓喇﹗

溫馨提示：
1．包車去Fatehpur Sikri Rs1100一輛，五小時
2．Fatehpur Sikri入場費 Rs260
3．Fatehpur Sikri guide Rs800 約三小時 （已包括tuktuk上城市Rs100，相機費Rs25每位，鞋收費Rs25每位，tips Rs200）
4．Hotel Sheela Rs600一房一晚

第四天﹒Varanasi

3/11/2012
0500已經要起床喇，原因係今朝要坐船仔遊恆河。我地book左hostel既船，可能貴左少少，但唔洗同人迫，又唔洗俾d船夫煩，算啦﹗
0530上船，天仲係好黑，好難影到岸邊既人

見到岸上愈來愈多人，呢位阿哥響度跳左好耐，呢身造形真係得呀﹗

呢隻船有VCD賣架

天光喇，更加多人喇

坐左一個鐘就上岸喇，然後就響幾個ghat度行吓影吓相

有人打boxing

有貌似跟旅行團黎沖涼既婦女浩浩蕩蕩咁去沖涼

原來有好多人由印度唔同既地方黎沖涼架，有好多人都唔敢落水，要互相鼓勵架

小朋友都沖

有人洗衫 

有人沖涼時不斷裝水飲，仲要裝d走，聖水嘛﹗

主壇附近都塞滿人，呢度遠少少，少d人

洗完既衫就係咁晒乾架喇，我估我地d床單都係咁樣處理架咋，唉，唔好諗咁多喇﹗

有人拜神

有人上堂

有人剃鬚

主壇人山人海

0900，返回hostel食早餐，打算去golden temple，但實在太多人喇，決定唔入去，結果變左去shopping，周圍行。
朋友話lonely planet介紹呢間飲lassi好正，想試吓，但我就唔敢喇，一黎我本身腸胃唔好，二黎一入到間鋪頭就聽到有人響廁所嘔到七彩。
呢間鋪既另一特色係佢門口經常有人抬屍經過，準備去燒屍。

1230，book左車去Sarnath （鹿野苑），因為塞車，所以用左一個鐘至去到。
司機響泰國廟前面停車，就入去行左個圈，你咩特別，其實如果唔係時間充足或者宗教原因既話，可以唔黎，因為真係無咩特別。

行左唔係好多地方，主要行吓遺址同埋博物館。行遺址時，有好多佛教徒響度做儀式，都幾好影架﹗
1530，坐車返回主街，今次唔塞車，半個鐘就返到喇﹗
我地截左架人力車去Assi Ghat （最南既Ghat），然後一直行返去hostel。
黎到Varanasi，一定要坐下人力車，真係好鬼刺激架﹗

響Assi Ghat行左一陣就已經有人走埋黎叫我地去鋪頭買野，我地問佢會收幾多回佣，佢話Rs20一個人，於是我地叫佢帶我地上水塔，唔去買野，照俾回佣佢。
由水塔望落去，又係另一種景色呀﹗

水塔

返hostel既路上都有好多靚建築物

仲有graffiti喎
2000，食埋晚餐，坐人力車去火車站，佢竟然踩得快過tuktuk車喎，勁呀﹗

Varanasi既火車站好污糟，成條路軌都係老鼠，月台都有好多，我地唯有上天橋等車。

2200，開車，目的地係Agra。


溫馨提示：
1．朝早坐船遊恆河   Rs100一位， 一小時
2．Golden Temple不許帶袋或相機入內（附近小店有locker出租），要檢查隨身物品（錢及證件），不可穿鞋
3．Sarnath包車，一輛Rs1000
4．Sanarth入場費用Rs100
5．Sanarth museum入場費Rs5
6．Varanasi--Agra火車票Rs990+Rs38（坐upper）， 582公里

去印度走水貨一樣

其實，去印度有幾樣野一定要做，無走雞架﹗
一、影印度人
印度人真係好鍾意俾人影相，只要你一舉機，佢一定擺晒post俾你影，仲笑晒咁添，有時嫌你影得少，仲要你影多幾張，都幾搞笑架﹗
二、入廟
印度係個多宗教既國家，周街都係廟，有好多都好有特色，好值得參觀。
三、去城堡
古時既印度就好似以前既中國咁，諸侯割據，所以幾乎每個城市都有古堡，有d幅員廣大，有d內部裝潢精緻。
四、購物
響香港，富有民族色彩既野都好貴，於是，去到印度就要買買買買買喇﹗

印度的第三天--Varanasi

2/11/2012
0910，火車到達Varanasi，尋晚雖然係第一晚瞓火車，但一d都無唔慣，仲瞓得好好，十點已經瞓著，今朝六點就醒左喇，一直瞓響度等火車埋站(因為我瞓中層，要等下層既人起身至可以落去坐)。
我地坐左上一架tuktuk車，佢企圖游說我地去佢介紹果d hostel，但我地堅決要去返自己果間，咁佢就話我地果間tuktuk車唔入得，落左車要行十幾分鐘。我地落左車之後，好彩有個途人帶路，否則都真係幾難揾架﹗我地住響恒河邊，d巷仔多到好似迷宮咁。
我地十點去到hostel，但未有房，於是上去佢個roof top restaurant食早餐，view 好(就響恒河旁)，野食亦唔錯﹗

呢間guesthouse都裝飾得好靚架﹗

間房都好有特色


settle down又book好左boat trip同埋去sarnath既車(其實兩樣都唔洗book架，不過我地唔知點解book左，可能覺得唔太貴又費事煩啦)，成一點至出去沿住恒河d祭壇(ghat)行吓。我地由hostel(近Dasashwarnedh ghat)向Panchganga Ghat方向行。響街上間唔中都會見到呢d holy man。

周圍都係巷仔，不過只要知道邊個方向係河邊就唔難去你要去既地方，而且d路人都好好人架。

我估成個印度最興旺既零售業一定係呢類布鋪。


我地行到去Manikaranika Ghat，睇左好耐，睇人燒屍，我地坐左響藍色帳篷果度，咁啱有個阿伯坐響我隔離，原來佢係呢個燒屍場既話事人，同我地講左好多關於燒屍既野，又帶我地行左去後面果幾座停屍間既屋，又上去天台俾我地影相(呢個範圍唔俾影相，尤其是會影到條屍既地方)，又帶我地行到好埋去睇燒屍。開頭以為佢會收我地錢，點知又無喎，只係叫我地俾錢幫個無錢葬老公既女人，但一定要我地一俾就俾Rs600(每人)，我覺得一黎我唔知我係咪幫緊個女人，二黎幫人都限我俾幾多好唔like，所以我堅決唔俾。

從其中一座停屍間既天台影落去

尖頂果幾間都係停屍間，呢度每日燒二百幾條屍，唔會因為日落而停工，全日運作，後來我地響一間小店飲lassi(就係LP介紹果間blue lassi)時，見到d人不斷經過店前條巷枱屍去燒，非常頻繁，條屍同我擦身而過，都幾特別架﹗

呢個著白色衫既男仔就係剛剃頭負責做送親人一程既崗位(好似我地中國人負責「擔幡買水」果位咁)


後來三點幾行到去Sindhia Ghat，見一大班男人向河邊湧去，當然跟去睇吓啦，原來係沖涼時間。

幾多垃圾佢地都唔介意，因為呢條係聖河嘛。

行到去Panchganga Ghat附近，見到有好多捕魚桿呀﹗

之後行左上去Dharhara Mosque，一間唔係好大既廟，無咩特別。

五點左右，我地行左返去hostel(紅色果間)，飲左杯lassi，先至行過去睇祈禱會

六點幾就開始祈禱儀式，我地去到時已經人山人海，但估唔到最靚既位竟然無人坐，我膽粗粗走埋去問人可唔可以坐，收唔收錢，竟然咁正中既位係可以坐但唔收錢喎，當然坐低啦﹗

其實成個儀式似場表演多d。

大約一個鐘左右就完左個儀式喇，成個鐘都係睇幾個企響祭壇上面既靚仔(唔知係咪揀過既，幾個都特別靚仔架)，攞下呢樣搖吓，拎吓果樣轉吓。完場時，主持人每講一小段野，d人就舉晒手歡呼，好high架﹗

温馨提示：

1. Delhi--Varanasi 758km，坐火車約需14小時
2. 住Ganpati guesthouse Rs1000一晚雙人房
3. 在印度，無論早午晚餐，人均消費都係大約Rs100-Rs200 (HKD15-30)