牛奶盒變身

飲完牛奶，個盒就用黎整左個靚盒用。
用舊布碎包好，加片風乾左既檸檬做鈕扣，fit晒﹗

一雞兩味

早前去秘魯，買左條花花腰帶，但係太長，諗住返到香港裁短佢。

剪左一截出黎，掉左佢好似好浪費，於是加條皮繩，整左條手帶，幾靚喎﹗

又搞吓環保先

留起左幾個盒已經一段時間，今日抽起條筋，整左佢地黎用先：
一, 鮮奶盒變沙鏟
用左兩個不同大細既鮮奶盒，剪左一部分出黎，就成為左沙鏟，可以搞吓d盆栽喇﹗(但係呢兩個手工唔多精緻)

二, 衣物柔順剤變膠袋儲存盒
剪走個盒頂，響前面同底部各剪一個窿作為攞膠袋既位置，後面就剪一個小窿用黎掛起個盒

完成，以後d膠袋就可以靚靚咁放好晒喇﹗

廢箱廢袋

其實，呢個廢箱再用既方法已經用左好多好多年架喇，尋日執野時再整理一下d箱。

我變......

舊左就要妝下身架喇﹗

同場加映：

有咩用？

墊垃圾桶囉﹗

記趣：

話說有一次去旅行時，有人不斷咁叫旅友買野時唔好要膠袋，連買濕貸都叫人唔好要。我一時睇唔過眼，串串貢既個性又現身喇

蛇：你，你屋企唔用膠袋袋垃圾架？膠袋其實可以用得好環保架喎﹗

對方：呀﹗人口少，垃圾少呀﹗

蛇：其實，你咁支持環保，又成日去旅行，咁你有無買「碳排」呀？

對方：......um......咩黎架？

蛇：係航空公司為左補償飛機航行時造成既二氧化碳污染......(好努力咁繼續解釋多唔夠十秒)

對方：(一邊聽一邊反應)......哦......哦.......嘩﹗好得意呀﹗(突然指住身邊店舖既某樣野，蹲低左係咁睇)

蛇：bea---------

記仇：

仇真係唔應該記，希望寫完之後就好似飲左孟婆茶咁，咩都唔記得啦﹗

我真係幾喜歡環保呢個玩意既，當年仲教緊書時，我會義務咁幫環保組教吓學生，帶吓佢地去比賽。環保組阿頭見我咁幫手，d比賽成績又好好，於是同老校講想招攬我入組，仲係副組長添﹗

可惜，老校對我印象唔好(唔知幾時得罪人囉﹗)，一口拒絕，只答應可以俾我做個成員。環保組阿頭將件事坦白話我知，問我想唔想做成員而唔係副組長。

車﹗我當初根本無諗過要入組，聽完成件事之後，我梗係話我無諗住入組啦﹗其實，佢唔話我知既話，我會答應囉，橫掂都幫緊手咯，入埋組，順理成章啦﹗但係，位老人家咁樣對我，以為我幫手做野係博升職，我家陣就話你知，我唔撈都仲得呀﹗使你升我職？升你d刷鞋幫、笑臉虎啦﹗低能﹗

------------

咩事呀？我講左咩呀？發生咩事呀？

遙控器藏身處

路人甲又整多左個遙控器返黎，於是我的起心肝，整番個遙控器插座，不過，整完之後，路人甲又係例牌又呢又路，個遙控器又唔夠cushion呀、又太細呀、又放唔晒呀......結果咪又係用﹗

上次去台灣買左盒好好食既太陽餅，食完之後，我呢d阿婆，見個盒咁硬淨，梗係唔掉住啦﹗

我將盒裡面放餅個格既中間剪開(因為遙控器比較長)，然後將佢剪成兩個三隔；又將太陽餅個硬盒中間剪開，變成兩份

將放餅果格貼響硬盒上，然後貼上一塊布，剪好布邊，搞掂﹗

一共整左兩個，可以放四個遙控器，唔洗錢架，好野﹗

 

自家耕種

百物騰貴，用完既蔥，留番個尾段，放入泥裡面，又可以有新蔥食，仲非常方便添，一想起要用，剪一剪就有喇﹗

薑都係啦，睇吓，就快有得用喇﹗

牛仔裙大變身

都唔記得幾時pack起左呢條牛仔裙打算掉左佢架喇，響學校執包袱既時候，俾我發現左佢，於是又攞左返屋企洗乾淨佢，做咩好呢？

呢個夏天流行賴屎褲，於是車條著吓啦﹗

好簡單，車埋個褲浪就搞掂喇。

咁剪走左個浪既布又點算好呢？呀，車個袋啦﹗

幾靚架，袋小小野，啱啱好。

藍色牛仔布加條原色皮繩，最good fit啦﹗

兩件小玩意

天氣越來越熱，十月尾仲可以游水，又係時候搞吓環保喇﹗

呢個袋起碼有七八年歷史，已經殘晒﹗個面好肉酸喇﹗

於是我去深水埗買左毛毛布番黎，同佢番新，又用得喇﹗

舊年電爆左個頭，路人甲買左呢盒焗油俾我，用完之後，見個盒好硬淨，於是……

用左黎放化妝品，非常好用﹗其實如果有時間，仲可以整靚佢，不過我放呢個盒既位置係唔多見到個盒面既，所以慳番﹗

太多

由九月到宜家，個半月喇，d返工衫仲未重複過，可能有人覺得咁樣好叻，好威，但係我反而覺得太多，有d衫真係一年著得一次，使用率太低喇，而且，有d著幾著之後，根本就已經out左，唔可能再著出街，好好地一件衫，又浪費左喇，其實可以攞去舊衣環保回收箱既，但係附近又無呢d箱，自己又無咁神心特登拎去回收，唉﹗

仲有起碼一個月唔會重複d衫呀，實在太多喇，唔～可～以～再～買～喇﹗（其實九月起都無買過啦﹗）

今個學年可唔可以唔買衫呢？其實都無必要買啫﹗比起好多人黎講，我真係太多衫喇，我諗﹗

廢紙再用

呢排教緊學生做緊d環保既手作仔，我示範左一個好簡單既，等佢地覺得容易做先，然後俾d書佢地睇下抄考下，再叫佢地又諗下有咩可以做。呢個係咩示範呢﹗

就係memo pad喇﹗

做法超簡單，首先cut齊d廢紙，然後搵條橡根紮住個頂部，再響最頂位置塗上白膠漿，等佢乾左之後，攞走條橡根，就成為一本memo pad喇﹗如果想靚d，可以響紙上面印d圖案，咁咪開心d囉﹗

其實我仲做左另一個memo pad架，不過唔記得影相。就係用保鮮紙盒個條卡紙同鋁片做cutter同個頂，再用d靚既雜誌紙貼靚d卡紙位，完成之後就可以張d廢紙逐張逐張cut（撕）出黎喇﹗好實用架﹗

新環保產品

點解呢件野係環保產品？

話就我二家姐買左條三百幾蚊既褲俾我老豆，但係長左少少，於是我就幫佢改短佢啦，剪左個兩塊每塊得個吋零既褲腳出黎之後，覺得d布料確實係幾靚（減左價都三百幾蚊就梗係靚野啦），結果我唔捨得掉左佢，諗起我老豆成日用電腦，咁就車多兩行線，整左個wrist cushion俾佢囉﹗仲繡埋佢個英文名，阿David，（佢好潮架，有blog，有email address，有玩msn，有埋skype，識download歌同網上遊戲，咪以為佢好後生呀，７４歲喇﹗）諗住一套兩件實好開心啦，點知佢話：「呢d野我一早用過啦，唔係幾好用﹗」唉﹗咁珍藏把啦老豆，無咩人有我d手作仔架﹗

快d去換野啦

猶記得"I am not a plastic bag"曾掀起搶購熱潮，更炒至幾千元一個，又被網民改為"I am not a classic gag" / "I am not a plastic gag"，真的得啖笑﹗

護膚品牌KIEHL'S最近也推出環保袋，來響應22/4的世界環保日，會否掀起搶購潮就不得而知，但Kiehl's的環保概念非常有heart，她所有的產品均簡約設計，兼可循環再造。而專門店內更有「舊瓶回收箱」，鼓勵客人將用完的瓶子投進箱內，回收再造。

為加強顧客對環保的支持，於2008年4月18日至5月21日期間，只要將任何兩個附有可循環再造標籤*的個人美容護理產品正貨裝容器交到任何一間Kiehl’s專門店，Kiehl’s即送上一份心意──經典潤膚沐浴露 (30ml) 以作鼓勵。每位顧客最多可獲得經典潤膚沐浴露 (30ml) 乙支。

同時，只要到任何Kiehl’s專門店 (西武店除外) 捐出港幣$30，即可將這環保購物布袋帶回家中，所得善款將全數撥捐環保團體「綠領行動」，向小學生推廣使用環保購物袋。此外，於4月18 日至5月21日期間，只要顧客自備環保購物袋在Kiehl’s購物，Kiehl’s便會捐出港幣$1予「綠領行動」(以每張發票計)，以答謝顧客向紙袋說「不！」，並對愛護地球的回應。

我同路人甲一齊去換，一共換左兩支，非常咁抵玩﹗

我的環保手作仔

我部分的環保小手工

這是曲奇餅罐的蓋，鑽個小洞，加個小鐘便可。

 

這是IKEA的九格箱，本是中空的，不太好用，於是我用A4白紙的空箱包上花紙，便成了小抽屜了。