做運動

好耐無做過運動，12月頭病左半個月，響屋企坐到腳都軟埋，路人甲同我出去踩返轉單車，唉﹗踩左無幾遠啫，就已經好攰喇﹗



代課前，難得天氣好，終於的起心肝出去跑吓，其實係行吓至啱，行左個幾鐘，都有十公里架﹗宜家見到個天好好天都無得去行喇，係咪犯賤呢﹗

代課生涯

這兩年多，我只曾代過三次課，一次是代一位體育老師，不用教學，只上課維持秩序，輕輕鬆鬆代了四天；另一次，代一位家政老師，要教授要煮食，但課堂要求比我少，輕鬆；第三次，就是這次，代產假，教中文，要教授要改簿，最差是要教「無諗住聽書既學生」。

代到今日，已經兩個星期，我好開心當年既決定----離開，是絶對正確的﹗

做個流浪婦

去完印度，返香港後兩日，又再肚疴，不過今次應該係因為感冒。肚疴的第三天，呢晚要去David 哥家吃飯，但路人甲下午要外出辦点事，為免他來來回回的接我，我跟他一起外出，在車上休息等他。他覺得這樣委屈了我，但我告訴他，其實我覺得住在車上也沒問題，很久以前我已經有個奇想，就是當錢都花光了，找個附近有体育馆的政府免費車位，就住在車上。哈哈，你說我是癲的嗎？！

 

大陸人

其實唔係話要歧視大陸人呀，但係有時文化差異真係令我有少少唔明白佢地既行為架﹗舉下例啦：
星期六晚我去左赤徑宿營，有一個自稱「北京大學」既團體都係當晚入住。晚飯時間，我響廚房預備緊(三個團體各自用緊三個洗滌盆)，我切左一大堆菜後，放左把刀響個洗滌盆枱面(當時枱面仲有一d用具，個狀態係「用緊，未拾枱架」)，然後我攞左d菜出去廚房外既飯堂，又響雪櫃度攞左另一d材料入廚房，所用時間可能只係一兩分鐘，但當我返到廚房時，把刀已經唔見左，好彩我要切既野已經切完。後來，我見一位大陸阿姐用緊我果把刀。其實，可能佢以為我已經用完，離開左廚房，但當我返入廚房之後，佢地又無話還返把刀俾我，又無同我講聲「唔好意思」喎。
行緊山時，我行左出一舊響山邊既石上面影風景，有兩位操普通話既阿姐路過想影相，其中一位行過黎我身邊講「可以借過嗎？」第一、我未影完，你可以等一陣嗎？周圍又無人同你爭個位。第二、我當然可以讓個位俾你，但你唔洗行咁埋，我腳下無路架大佬﹗行左半日山，聽得最多係普通話，而一般迎面而來，三五知己橫霸一條行人路又唔讓路俾你(好多時候我都係一個人行緊架)，要你一係停低，一係行出行人路讓佢地既，就係呢d人喇。
結論係：可能佢地唔霸就無生存空間架喇﹗

霆語錄

我既侄仔五歲，但非常精靈，成日語出驚人。

霆語錄1：
三姑媽：聽講你有女朋友lu喎﹗
俊霆：係呀，佢好靚又好叻架﹗
三姑媽：咁你係因為佢靚又叻，所以鍾意佢呀？
俊霆：唔係，係因為開心。
... 三姑媽：哦﹗你同佢玩得好開心。
俊霆：我都唔識佢，未同佢玩過。
三姑媽：@..@
俊霆：爺爺，我個女朋友住邊層樓呀？叫咩名呀？
-----------

霆語錄2：
我讀到大學時就可以彈高音結他架喇﹗
(三姑媽心想：佢真係走在時代既尖deung喇，人地彈base佢彈高音結他，哈)
----------

霆語錄：
霆媽：三姑媽，你同俊霆去边度黎呀？
三姑媽：去左燒錢。
霆媽：咁即係去左做咩呢？
俊霆：即係去左玩電動跑車囉！
-----------

霆語錄：
俊霆：三姑媽，你對咩鞋黎架？
三姑媽：普通去街鞋囉。
俊霆：咁係咪有痴力架？
三姑媽：無架，点解咁问呢？
俊霆：咁点解你唔会跣低既？
（当时係行緊馬屎州岸边）

車埋你啦

有車，有時係好方便，但有時遇著d朋友以為你架車係的士時，又係幾唔方便架喎﹗
有d人好得意，以為你揸住架車係唔洗油既，就算去地球既叧一面都話咁快架唧。於是，就有以下既情況出現喇：
一、以為你果架係的士：
朋友A去新界西探朋友B，朋友B不是住在市中心，朋友A走既時候要求朋友B車佢返位於新界東既屋企，來回要差唔多一個鐘。

二、以為個地球真係好細：
親戚A個阿媽無論去到天崖海角食飯，永遠都會要求個仔送d親戚朋友，唔理有幾遠，唔理幾多點，唔理阿仔聽日洗唔洗返工。

其實，作為親戚朋友，如果順路，如果你唔介意等揸車果個走得，去停車場攞完車，拾好個位俾你坐，唔係好識路兜多兩個圈，結果可能你去搭車仲快的話，車埋你都ok既。以前我地成班朋友出黎玩，玩夜左無車要搭的士既話，住同區既朋友都會車埋d朋友返屋企，好ok呀，但如果仲有交通工具呢，大家都會自動波去搭車，唔會要求朋友車返屋企，有小朋友都係咁話，帶得個小朋友出街就預左係點樣，無理由要朋友做的士司機。如果順路或者同一區唔會阻人地太多時間，車埋都好合理。
香港交通咁方便，有時真係自己坐車好過要人地車啦，你快返到屋企時，人地又舒服。如果一車有幾個朋友，車完呢個又要車果個，先至送你返屋企，一黎搞左好耐至返到，二黎個朋友都攰啦。

但係有d朋友又好得意架喎，話車d野黎你屋企(or公司)，又要就佢時間，又要車到去街口，唔理你方唔方便都要你去街口攞野，如果你要求佢行多一兩分鐘車呢，佢就會覺得你難服侍喎﹗

不過，一樣米養百樣人，我覺得啱時你又會認為我錯啦﹗

天與地，年少無知，林若寧填得好

香港人好奇怪，呢首歌hit左，但無咩人讚林若寧填得好，"the city is dying" hit左，又無咩人知道係邊個寫句對白，只hit埋joe junior。
我其實好少留意流行曲，因為都唔知隻歌響度唱咩，只係記得Eason Chan有幾隻Wyman填詞既幾有意思。
天與地咁紅，當然有留意埋呢隻歌啦，歌詞好有意思，每句都令我有d野想講。

作曲：黃貫中
填詞：林若寧
編曲：黃貫中 / 劉志遠
監製：黃貫中

Lyric @ Lemon Music Group 檸音樂歌詞網

年少多好　頑劣多好　不甘安於封建制度裡
迷信上街真理會達到　
(年少當然好，時間多的是，年少時頑劣根本無煩惱，因為根本唔洗跟d咩規矩，反叛既日子應該係最令人印象深刻既，搞遊行搞上街，大概都算係反叛既一種，真理未必會真的得直，但總算表達過)
旗幟高舉　群眾聲討　不惜犧牲一切去上訴
(你睇吓學校果d校規有幾多個學生會企出黎話學校唔啱？唔敢嘛﹗但係真係有好多都不合時宜，有d仲好白痴架喎﹗舉例：興窄腳褲時，你著到闊一闊都無人理你，相反，興闊腳褲時，你條褲係skin tight呢，無問題喎﹗返學唔俾帶電話，原因係太貴重，係違禁品，帶左返學會俾人記缺點，但係個書包仲貴過個電話呢，又唔洗記缺點喎﹗不惜一切去上訴既，就只有果d老師憎到佢死既學生囉﹗)
權貴的想法太俗套
(錢就梗係俗套架喇，不過，宜家既年青人都已經一早俗套晒啦﹗)
只可惜生活是一堆挫折　只可惜生命是必須妥協
(香港既小朋友一出世就已經開始經歷比其他先進國家既小朋友更多挫折，由考唔到心儀幼稚園俾阿媽攬住喊開始，咩都要同人爭餐死，大學畢業都要住劏房，挫折唔大呀？﹗唔妥協又有咩方法呀？)

年少多好　貧困多好　一蚊積蓄足以快樂到
廉價結他抒發我暴躁
(我都記得，當年窮到燶，儲到錢去一次旅行，開心到咩咁，就算只係去五日泰國呀，都已經緊張到幾晚瞓唔著喇﹗)
財富得到　年歲不保　捐輸不必講究有回報
(好多人好努力咁揾到錢喇，但生命已經去到尾聲，錢唔帶得落棺材，夠咪算囉，至於點樣先叫做夠，見仁見智啦，知足常樂囉﹗至於幫人，真係唔好諗住有回報，但一定有既無形回報--快樂，就一定係你幫人果刻已經攞左架喇﹗)
人世間總會有異數
(唉﹗異數，其實好多，細細個老師教"一分耕耘一分收穫，唔付出就有收穫係異數黎架"，邊度係吖，你有彩數，咪係異數囉﹗)
只可惜生活是一聲發洩　只可惜生命是一聲抱歉　怕追到

如果　命運能選擇　十字街口你我踏出的每步更瀟灑
(係呀，如果可以選擇，人人都想自己揀，我想揀我係北歐出世生活，操普通話既香港身份證持有人，得唔得先得架﹗)
如果　活著能坦白　舊日所相信價值不必接受時代的糟蹋
(坦白係會死人，會俾人軟禁架﹗時代既變遷的確糟蹋左好多野，你睇大陸無野可以放心食喇，禮義廉恥係咩黎架？)

年少多好　朋友多好　一番爭執不會有被告
遊戲競爭不會記入腦
(呢句我唔係幾同意，響學校見d惡魔既行為，我唔係幾同意年少係單純既)
年歲增長　無法修補　青春的詩總會老　時間多恐怖
(呢句老生常談，每當我見到朋友既仔女時，尤其果d就黎中學畢業既BB，我都會諗：吓﹗我咁老架喇？你話幾恐怖呢﹗)

如果　命運能選擇　十字街口你我踏出的每步無用困惑
如果　活著能坦白　舊日所相信價值今天發現還未老
如果　命運能演習　現實中不致接納一生每步殘酷抉擇
(演習？到有得演習既時候，你咪一樣會抱怨，生命無take2先至有趣架嘛，就算點樣錯點樣衰，只要係自己揀既都要樂於接納，但可惜有好多億人無得揀)
留守　過去的想法　我會否好像這樣生於世上無目的鞭撻
(過去，都話左係過去咯，舊野有時係好，但宜家係宜家，記憶同想法可以忘記，但正確既價值觀不能拋棄)

http://youtu.be/2_7UTxWNQM4

生日禮物

路人甲最近生日，我無禮物送俾佢，只係揾港孩教我彈左首生日歌俾佢咋，都練得好辛苦架﹗

 

生日快樂﹗

咖啡伴侶

路人甲最新一期愛上煲咖啡，我對咖啡毫無研究，佢點煮我都會話好味架喇﹗

而佢又好認真咁去搵d工具，結果搞到好似好pro咁﹗

響尼泊爾買既咖啡粉，雖然唔係極品，不過平得黎都好好飲架﹗

咸濕仔．唔好食．地圖袋

唔好食：

話說屋企有條讀緊幼稚園，瞓覺仲要著尿片既細路B，好聰明醒目。

有一日，一家人食緊飯時，阿paul好唔環保咁煲左排翅湯，讀緊中學既肥野夾起梳翅問：「呢d咩黎架？」

我同另一個醒目既家庭成員就梗係用一千零一秒答佢：「好難食架，唔好食呀，俾我啦﹗」搞左一輪，佢當然無中計啦。

之後既某日，我攞住細路B罐奶粉問打緊機既細路B：「BB，請我飲得唔得？」

佢望左我一眼：「唔得。」

我：「我好想飲，好鍾意飲喎﹗」

佢竟然繼續望住個電視：「好難飲架，唔好飲呀﹗」

咸濕仔：

某星期五，我同細路B一齊睇J2既「六舊腹肌拯救隊」，佢睇住沙灘上著住三點式大大個胸既洋妞問我：「點解佢地咁樣既？」

我答佢：「去游水囉﹗」

跟住佢就轉身望左我個身一眼，好似話：「唔對路喎」咁既樣，有d唔滿意又另番個頭過去喇﹗

我將呢件事話俾佢阿媽知啦，佢阿媽話最近同佢行街，佢經過「3D肉蒲團」張立體poster既時候，指住張野同阿媽講：「d姐姐呀﹗」

佢阿爸聽完呢兩單野之後就問佢：「個d姐姐係唔係唔應該咁樣著呀？」

細路B本能咁搖頭，但係響一秒之後發現自己唔應該搖頭，就好尶介咁轉為點頭。

佢阿爸都未笑完，又再問：「佢地啱唔啱呀？」

細路B擺出一個無奈既表情，好無奈咁，好似生意失敗咁搖頭。

地圖袋：

屋企有人問：「喂，邊個識得買地圖袋呀？」

我當然首推路人甲啦。

正當屋企人想再俾多d資料時，有人大聲問：「你講果d係咪佢想買果d呀？」

我：「吓？行山用黎套住張地圖既地圖袋嘛﹗」

屋企人：「唔係呀，係手袋呀﹗」

其他屋企人：「車……宜家邊度仲有人用地圖袋架﹗都out晒啦﹗」

我：「唔怪得我誤會喎﹗」

「胡亂唱」演唱會

好似好耐無打過blog喇，有兩個blog應該一早打既，不過，唔知忙咩，搞到今日至打。

二月尾聽左一個唔係咁多人會喜歡聽但好好聽既演唱會。

去聽呢個演唱會，首先要知道邊個係區新明，要認識邊隊係小島樂隊。哈哈﹗廿幾年前既樂隊，仲要唔係真係好紅既，真係唔係咁多人記得呀﹗

場演唱會響九展既演講廳做，坐唔滿(佢仲留左半個場俾自己友)，但氣氛十分好，全場一齊拍手，一齊唱既位好多，而嘉賓亦好鼎盛﹗在場聽演唱會既演藝人都好多架，我見到劉美君、劉天蘭，阿葛、蔡一傑、幾個商台DJ......

呢個就係區新明喇﹗

開場既嘉賓係Kolor樂隊，即係唱圍城果隊呀，唱現場非常好。 而區新明唱番好多舊歌，例如：她的心，佢手結他仍然好勁 仍都有唱吓新歌架 最高潮位係 Joey Tang鄧健明(太極), Patrick(太極), Ernest(太極)出場，jam歌，仲唱紅色跑車同埋hotel California添﹗

嘩﹗成晚兩個幾鐘，一陣間就過左，因為實在好聽﹗

@..@註：我細細個就聽佢架喇，hehe!

貓頭鷹一族

聖誕節去台灣時，有朋友仔送我一隻布貓頭鷹

我覺得呢D好易整，所以唔會買，不如我整番隻送俾佢。

拖到今日，終於整左三隻，三隻都唔同樣(sorry，我唔想完全copy)：

skinny A(福)

naughty B(祿)

Beauty C(壽)

(荃加福祿壽)

無熱溶槍，無匙扣繩，得兩塊舊布，希望朋友仔唔嫌棄我手工差啦﹗

佢地先至勁呀﹗

港台新一輯「沒有牆的世界二」既第一集，講一班傷殘人士去台灣第二高峰雪山登山，我覺得我地有手有腳，行動自如，上到高峰唔難，但係佢地真係一小步一小步咁行，都上到三千幾，真係好勁﹗

我出發去台灣（去年聖誕節）前，上過一次大帽山施樂園，咁啱呢班人都響度，不過我見唔到佢地，好似話上左山training，我只見到訓練員Tracy。Tracy以前帶過我d學生玩野外活動，所以我識得佢，而且間唔中就會響d camp site見到佢，佢係「職業野人」黎架﹗

當日知道港台黎拍野，不過就唔知係拍呢一集。

節目裡面既主角講既野，我好認同，係咩？自己睇啦。Click我啦﹗

忽然發現上yahoo

前幾日搵旅行資料，唔知點樣click click吓，忽然發現yahoo旅遊個柬埔寨頁面其中一個被推介既「柬埔寨金邊（一）」http://hk.travel.yahoo.com/article.html?aid=5635好熟面口，d相似曾相識，再仔細相認一下，呀﹗係我個blog黎架﹗哈哈哈哈哈﹗

七月開始，只投過一篇「珠海之旅」去雜誌，可能佢地覺得珠海無咩特別，無登，第一次嘗試投左稿無人登，有d失望﹗之後，唔知點解好懶寫稿去投，無再投過喇﹗一直到宜家，都無投過，連相片都無投過，d咩咩咩比賽都無參加，無晒興趣添﹗

其實，六月時，我見lonely planet請中國寫手介紹中國，身為中國人，一定要出分力啦，於是我send過我個履歷表去lonely planet（貪玩咋），點知佢真係回我，俾左個guideline我，叫我響一個星期內寫一份跟lonely planet既模式既稿（介紹一個地方），幾千字咁，搞左一個星期，send左去，回覆大概係：你既文章很好（我相信呢d係禮貌黎架啫），可惜風格跟lonely planet唔係咁配合……。於是，件事就完左喇﹗

以前，有好多朋友叫我寫旅遊書，我覺得佢地真係睇高左我（雖然我都係睇唔起時下有d所謂旅遊書既旅遊書），寫書，真係有料至得架﹗

而且，當有負擔咁去旅行時，性質已經唔同左，雖然仍然係旅行，但多左份責任，無咁爽囉（可能收錢時好爽）﹗

賺女人錢．易

不嬲都覺得賺女人錢好易，女人無論點都喜歡花費，無論係買野俾自己抑或買野俾人，無論件野對自己黎講有無用，無論啱唔啱用，都會比男人容易做出俾錢既動作。

我相信宜家連d商家都發覺到呢樣野，連一向以男人為主要對象既產品，宜家賣廣告既重點銷售對象都轉左係女人喇﹗就好似呢排成日見到既X成廣告，個三個女仔又唱又跳又懶cute咁，就係賣緊d攝影器材喇﹗好早之前已經發覺d廣告唔同左架喇，好似d相機廣告咁，搵晒d女model，而八佬匯就一早搵左祖兒啦﹗點解？咪只因女．人．錢．易．賺，咁簡單囉﹗

好似相機咁，宜家一出街就好易會見到d女仔一人一部單反，究竟係咪識用呢？（都唔敢問係咪識影喇）而佢地見你攞住部唔係單反既物體就會好似想話：「小姐，唔識影咪霸住個位啦，你部野zoom唔到就走啦﹗」咁樣。有d小姐就連影相既基本野都未搞清楚就買左先喇，我個人覺得ok架，要多用至會識架嘛，但係響自己既技術未upgrade到既時候就走去upgrade部機，出部搵食機黎影，呢d咪係d商家佬最like既顧客囉﹗無錯，有部靚機影到靚相既機會係大好多，但係響識好少唔識好多既情況下用部靚機，又用唔盡佢，又用得好似用緊傻瓜機咁，機呀機，你就好似d有錢既麻甩佬揸住部發拉你響中環鬧市度等完一個又一個紅綠燈而從未體會極速或者炒完一部又一部一樣，有錢無料，以為盡享別人羨慕眼光。

唔知呢d係咪香港人既習慣，抑或係香港人有錢頭腦太簡單，好似無論咩都好，都要無咁大個頭走去戴鬼死咁大頂帽，買樓買車買相機，搵工追女生細路，樣樣都無話睇吓自己，有幾多錢幾多料幾多特技，究竟手上件野配唔配自己？﹗我唔係話緊你話緊你，只係想提醒自己，珍惜手上呢部傻瓜機，咪俾d商家佬有機﹗（無啦啦rap左添，哈哈﹗）

蛇與豬的對話

雀斑媽媽一家、蛇、豬，同埋一班朋友仔去食飯，豬見雀斑媽媽個囡囡d頭髮好攣，就問：「囡囡，你爸爸媽媽一定係攣架喇﹗」

蛇：「吓？你點知人地攣呀？」

其他朋友：「係囉，攣點生阿囡囡呀？」

豬：「吓？」

蛇：「你睇佢咁短，點知佢攣呀？」(指住阿爸爸d頭髮)

阿爸爸真慘，又俾人話攣，又俾人話短﹗

今年宜家至開操？

自從12月去完神山之後，基本上係無真正運動過，但唔運真係唔得，對大肶啫喱化，byebye肉出晒黎，於是，今日開操。

同同事食完lunch吹完水就行左去體育館個健身室做gym，13蚊一個鐘，抵玩啦﹗不過，一個鐘就算死命做都係唔多夠喉架﹗

做完之後，個太陽仲係勁一勁咁，於是行落一層去圖書館打書釘，睇書仲耐過做gym，哈，見個太陽就收工，我急急腳搏老命係咁行，身水身汗行左半個鐘。

點解要開操？路人甲下既命令，要操番起先帶我去玩，操唔起就佢自己去玩，咁，死人都操fit佢啦，有得玩喎﹗

好句

某日，某同事攞住張野過黎俾我地睇，嘩﹗簡直係好野，咁好野梗要分享吓啦﹗

1. 窮則獨善其身，富則妻妾成群。

2. 結髮之夫不上床，糟糠之妻不下堂。

3. 問君能有幾多愁，恰似一班太監上春樓。

4. 三個臭皮匠，臭味都一樣。

5. 人生自古誰無死，下個就要論到你。

個同事係響sina度搵到既，呢幾句最頂癮﹗

雨後彩虹，double rainbow﹗

星期三放早，去左探路人甲媽咪，順便去幫架車換油。

我陪左媽咪上樓之後，路人甲去左換油，無幾耐，佢打電話黎叫我睇彩虹。嘩﹗係double rainbow呀﹗響新彊第一次見到，以為響香港無咩機會睇到架喇，點知都睇到。後來post左張相上facebook，姨甥仔仲好開心咁話係「歲月神偷」裡面個哥哥講果種彩虹，佢好鍾意呢套戲架﹗

金句

除左黎明，人人都會有金句。

金句一：

「羸唔到都唔好輸吖嘛﹗」世界杯旁述員說。

 

金句二：

「化作春泥更護春」（原文：化作春泥更護花《花潮》）同事Y響晚宴上亂拋書包時說。

金句三：

「我老細係個女人，鬧人唔係人咁品﹗」（原曲：女王辦公室）卜卜脆個學生俾卜卜脆鬧完之後係咁重覆咁細細聲唱。

金句四：

「宜家d新聞真係咩都有架，時時都有d丈夫打老公架﹗」（原稿：丈夫打老婆）大隻搞gap同事響討論時事時講出。

金句五：

「哈哈，我d學生都話我上堂好搞笑，成日搞爛gap架﹗」（應該讀開口音gag）大隻搞gap同事響教員室不斷話自己d gap好爛﹗