最近曾財爺單野，又令我想起一件舊事。
話說當年同另一個同事負責小食部同飯商既投標，X校董有朋友做呢d生意，當時X校董表現得相當關心，開會時，處處幫朋友既標書講好說話，甚至乎話可以叫朋友既公司重寫標書。
成個會犯左幾多法，我唔知，總知叫你呢樣唔准寫響會議紀錄度，果樣又唔可以寫響會議紀錄度，我感覺係：被迫參與生平第一次犯法勾當。
結果，X校董個朋友中標，另一個負責呢單野既同事驚有事，八月中都辭職，辭職後仲特登打電話黎叫我keep好d文件，免得俾人亂插一刀。
後來唔知邊個去ICAC投案，ICAC黎查，當然查問我啦，問完一大輪，個調查員都話好可惜響會議紀錄度無任何可以用黎charge既證據。
無論受過幾多教育，有d人既本性係無得改既﹗
人性本惡﹗
呢幾日返左舊校代課，雖然都係返工，但係同以前就好唔同喇，首先係工作量少好多啦，其次係心情輕鬆左。
入到教員室(唔係我坐開果個啦)，D同事無咩反應，我明架，我同呢邊D同事又唔係熟，仲成日黑口黑面咁，哈哈，反而D校工就好熱情呀，我以前對佢地都好好禮貌架﹗
而學生呢，聽得最多既係「好耐無見」，然後係「依﹗miss你返左黎呀？開番家政啦﹗」，仲有「你做咩唔教呀？宜家我都唔知佢(宜家教佢既老師)講咩，都唔明既﹗」
有同事問我有無學生搵我聚舊，我教初中咋，唔係高中，D細路邊有咩聚唔聚舊吖，況且，我教緊既時間都唔鍾意同D學生太close，咁多年黎，熟既學生數埋都無十個，有人或者覺得有好多學生朋友好開心，但我唔會囉，所以，到宜家都係「老師」同「學生」既關係。
有幾個熟少少既學生有上我個blog或者add左fb，但係，其實，我都唔係好想架。其實，我真係唔係好啱響香港做老師啩，因為，我只喜歡上課教書。
退休喇﹗退休喇﹗
同事歡送我既禮物，係一個好實用既焗爐：
多謝咁多位同事﹗你地要繼續頂住呀﹗我知好難頂，不過，為左份糧(為第二d野既話，走得架lu喎)，頂硬上啦﹗
講真，辭職，真係好開心，唔洗再響一間管理得不知所謂既學校度過日子，有d似放監。但係，有d朋友話：你理得佢點管唧，咪鬼理佢，教完書改完簿咪放工囉﹗
哈哈﹗我唔得，攞黎賤﹗
比較熟既同事好早就已經知我唔想做架喇，大家有晒心理準備我會離開；其他同事呢，有d就算共事左十幾年，都無祝福一句，哈哈，鬼叫我平時鬼咁有性格咩，對住d我唔like既人時，就算唔得罪人都經常黑面；至於學生呢，我不嬲都唔講私事既，無通知任何一個學生，不過當然亦一定有同事爆響口啦，聽到我走既消息，最開心既莫過於d成日死蛇懶鱔又經常俾我串俾我鬧到八彩既學生啦﹗
今次提早收工，真係要多謝果位林校長，響佢既迫逼下，我都唔洗食藥或者住醫院，真幸運；另外亦都要多謝另一位校長啦，我家陣去旅行唔洗申請，幾時去都得，幾好呀，上次令佢要響佢d熟既下屬面前歪曲事實，將我變成傻瓜，搞到我唔見千幾銀，真係難為佢喇﹗
當然，最真心想多謝既係路人甲啦，佢一直響任何一方面都支持我，俾我好多好好既意見，多謝晒﹗
生活中，任何一項事情都可以算是一種投資，有時，眼光獨到，獲利不少；有時，雖然看勢不準，卻會獲利甚豐；有時，用心投入時間及心血，但一無所獲。
「世事多變，豈可盡如人意﹗」、「知否世事常變，變幻才是永恆﹗」步入不惑之年，經驗和經歷告訴我，這些雖然只是歌詞，卻所言非虛﹗論到我自己的投資，幾乎可以用一敗塗地來形容。讀書，投資不多，收獲不豐，理所當然；工作，投資甚巨、用心、投入，卻幾乎破產收場，只怪自己眼光差，投資在一隻垃圾股上；真正金錢上的投資，不能說破敗，但未賺過一分錢。就只有感情，我獲了厚利。
論交友，我從來是個懶人，也怕煩，並不會主動關心他們，但我卻有一班很要好的朋友，雖然為數不多，但貴精；與家人的感情，我也沒有刻意經營，卻有兩個和諧的家，一個在娘家，一個在夫家，家人對我都很好。至於丈夫，只有這項投資，我可說自己獨具慧眼。他不是什麼精明能幹的人，也不是什麼成功人士，更不要說有什麼獨特之處，但他確是一位好丈夫。
五月三十一日，我終於把投資最失敗的一個戶口關閉了----我交了辭職信，也申請了「自願提早退休計劃」，即是，以後都不會再執教鞭了。我沒有感到什麼哀傷或失望，反而，我很高興，我終於可以離開一個令我感到挫敗，令我懷疑自己能力的地方。我認真深究過這項投資的失敗原因：是我太認真，是我不懂得什麼叫人事關係，是我不識時務，當然，這個結局也是運氣使然﹗
我知道把原因推卸給「運氣」是何等不負責任，但我見過「運氣」讓一些無能之士變得位高權重，也見過「運氣」使一些有能之士只默默耕耘而沒有收穫。
作為老師，我很重視學生的品德培養，但這裡不重視；我也很重視學生的成績，自問很用心去教，同儕觀課時，我也常取得甚高的分數，但又如何？我教是我教，他們肯學嗎？高層認為：教學是很好了，也很認真，但不懂得跟家長和高層抬槓，太過有己見，不肯苟同校政，罪大惡極﹗
既然，天空海闊，為什麼還要留在一條破船上去消磨生命？
很高興自己肯作出一個別人覺得我傻的決定，但是，活出生命是有很多方法的，既然已無心去收拾這項失利的投資，便應該為自己開通另一道門，再出發﹗生命不一定是七十、八十或九十才是盡頭，趁還有力氣，好應該做一些讓自己感到很快樂和很滿足的事。
恭喜自己﹗
送給同樹A：
打你個白頭佬，打到你日日要走佬；打你個白頭佬，打到你頭頂生草(不過其實已經係喇)；打你個白頭佬，打到你勁俾同樹數(呀~~~呢個都已經係咯呵)；打你個白頭佬，打到你秒秒俾人.....母(唔得，講左粗口添)......
送給同樹B：
呢d cheap友，見到想走；
要佢出錢，難過登天；
平時朋友，講錢走頭；
掩住荷包，話無現鈔；
疏財仗義，無呢d字；
成日話窮，轉頭就鬆。
送給同樹C：
打你個殘渣亮，打到你走晒樣(呀~~佢個樣已經唔係好得架lu喎)；打你個殘渣亮，打到你做埋車頭相；打你個殘渣亮，打到你勁俾同樹掌(雖然大家都想，不過做唔出)；打你個殘渣亮，打到你成世無人養(佢咁樣做野，真係要等人養)......
*得饒人處不饒人既蛇仔得罪晒
打遊記比較費神，適宜靜心時「製作」，但又好想打吓blog，於是打d快而簡架啦﹗
校園欺凌，一般都係學生之間既事，但係，教師之間都經常發生，我仲係當中一員。
話說「抄」老師人善良但比較遲緩(諗野、或者俾人玩時既反應)，脾氣又好，所以我地成日bully佢，bully佢既事件多不勝數，時有發生。近日例子有：
某日，「抄」老師請左兩位同事去中高檔食店high tea，第二日返到學校，當然俾其他同事知道左啦，而知道之後既結果就當然係叫「抄」老師請埋其他同事以示公平啦﹗又當然，「抄」老師一定唔會咁爽手就請我地食tea啦﹗咁結果係：
每逢下午五點幾既時候，大家都返晒埋位開始改野，齊人喇，我地就會舊事重提。尋日，我同卜卜趣老師就你一言我一語咁bully阿「抄」老師喇﹗
大家一路改野一路用「鬼語」：「抄老師，我個tea呢~~？」
「抄老師，你俾返個tea我呀~~？」
「抄老師，無陰公呀，我個tea去左邊~~？」
「抄」老師頂唔順，好嬌俏咁：「我唔理你地呀，我去廁所。」
我同卜卜趣好無聊咁唔放過佢，跟埋去廁所，左一格，右一格，夾攻「抄」老師，繼續用「鬼語」：「抄老師，你仲唔俾返個tea我地~~？」、「抄老師，我個tea無左呀，無得好慘呀~~﹗」
Not老師又搭咀：「抄老師，請食tea；無得食，心思思。」
老師們：「俾人唱喇，仲唔請？﹗」
「抄」老師果然內功深厚(係忍耐既耐)，仍然不為所動，我地個tea仍然無著落。
面書：罰你就係衰人，唔罰唔鬧，大家hehe哈哈就係好老師，大佬，罰你都要時間同精神架，我做咩犯賤呢？自己又辛苦，學生又覺得你衰，仲俾說話你聽﹗交吓行貨咪算囉，人心當狗肺......
回應：呢細路係咁架啦，唔鬧佢既就係好人，尤其是新一代，又唔話得，又唔鬧得，又唔識得尊重人，咩嘢都以為自己啱哂！
面書：做左野既老師就乞人憎，唔做野個d就得人鍾意，搞到宜家d學生無大無細，無責任感，無承擔，無禮貌，無是無非，無自省，無交帶，只有任意莽為﹗我收佢份功課收左三日都收唔到，留堂抄野，係我多餘；補默補測，係我煩；留書要罰抄，係我衰；咩都係老師唔啱，仲要俾說話我聽﹗我就快講粗口「媽」爆佢地架喇﹗
回應：依家D細路..太多資訊喇...好識同你講權利，但唔識咩叫義務！咩都淨係識取得最大利益，但就唔知背後o既付出，真係好人都激壞呀..
你算好野架喇！如果我做老師，可能開學頭一個星期就已經變為殺人犯！
回應：好多大人／新聞／媒體都不停話俾後生聽如何搵快錢；邊個邊個炒乜炒物短期獲利幾多倍。好自然後生都會發現原來急功近利先係“正途”／“出路”，又點會覺得需要付出呢！！ 可悲！！
面書：我都驚我有日會打巴佢地呀﹗
我都開始懷疑「做野係唔需要付出」係啱架﹗以為對住d細佬唔同對住d大人，你俾個心出黎，佢地會知道你對佢好，但係，原來，宜家d細路十二三歲就已經係大人黎架喇，仲會用你對佢好既野黎「嘲諷」吓你，你嬲咩？﹗佢仲開心。我嬲唔出，只係覺得有d心淡囉﹗連細路都係咁，呢度真係社會既縮影﹗何處有烏托邦？
結論：唔做，慳番﹗
中文房最近趕貨(其實不嬲都趕架喇，只係最近特別趕)，唔知係咪咁樣，有同事short左﹗
今日，中五要出練習，同事O預備左一疊資料，同事C見要幫手，就話：「趕貨無辦法啦，剪貼都唔緊要啦﹗」於是就攞支漿糊筆出黎起勢查喇﹗
兩秒後，同事O見狀：「你支……潤唇膏……」
同事C：「你要潤唇膏呀？攞去喇﹗」然後作狀遞俾同事O，有d串串貢味道。
同事O：「唔係喎，你支係潤唇膏黎架喎。」
同事C仍對自己支漿糊筆好有信心：「我響櫃桶度攞架。」然後將手上面查左「漿糊」既紙貼上練習度。
同事C終於發現，潤唇膏係痴唔到野架……﹗
我坐響附近就梗爆笑啦，佢除左老點全個中文科一人攞起一張傳閱文件後，又一傑作，真係SHORT鬼左﹗
**其實如果調轉黎，以為漿糊筆係潤唇膏應該更搞笑，呀……應該幾潤。
唉﹗數數手指成八九年無教中文，淨教家政，真係舒舒服服咁度過左一個好悠閒既歲月呀﹗今年開始，要教中文，仲教兩班，雖然未至於「拿」手唔成勢，但都係要不斷改簿改簿改簿、備課備課備課、開會開會開會，日日同d學生角力，搞到有d失魂，路人甲話我：「唔知你做咩要咁緊張，又唔係要博升職，做多幾個月之嘛﹗」我都唔知喎，可能係責任心既問題啦，又可能係驚自己搞唔掂啦，總之，已經試過三次唔記得當值同開會，呀，唔係真係唔記得，次次都係響之前二三十分鐘仲記得，到時一搞學生d野就咩都唔記得晒，死未？﹗
唉﹗我呢d真係做慣乞兒懶做官呀，莫講話無職升又要做多咁多野啦，就算有得升職而要我做咁多野，我都未必想呀﹗(套用某人升完職講個句：你估我想升架？﹗)
有日仲有位無謂人士問我：「你慣唔慣呀？」
我咪好有禮貌咁同佢講：「有好多野都要搞清楚，多左好多野做，有d唔慣啦﹗不過蛇既適應力好強既。」
無謂人：「哈﹗多野做，你咪當還囉﹗」
還咩呀？我問學校借左d野咩？無謂人講既野果然無謂。
話說nana姐辭職走左，但係就一d責任心都無，中四d分未入晒，學生功課未派晒，自己d遺物完全唔理，暑假duty無履行，練習無出到......，一句講晒，一走了之，真係唔知咩人黎既﹗
早響開學前，已經有同事好好咁幫佢執左張枱，因為新同事黎到時，nana姐都無返過黎執野。今日，同事發現佢仲有幾箱遺物，於是逐張睇係唔係學生d野，可唔可以登分，結果......
我地搵到佢既年薪酬表、報稅表、同事既請帖(裡面仲有餅卡)、教師證明文件......唉﹗連呢d咁緊要既野都唔返黎攞番，究竟nana姐係個咩人呢？神奇女俠？
宜家d後生仔後生女，我真係唔知佢地響度做緊咩，做野可以做到亂晒龍，而且，大多數都好識得扮好有紋路咁做野，呃d天真既高層，唔知佢地係咪咁樣呃個學位返黎架呢？﹗
講真，我就無同nana姐有咩合作機會，不過，只係開過一次會，我已經唔like呢位同事，果然，我千年蛇妖，道行有番咁上下，一睇就知龍與鳳﹗哈﹗(寫咁多野黎原來係想讚自己，死未﹗)
終於停課，比我估計早左，但係......真係淨係停課咋，即係學生唔洗返，老師繼續返工，返到七月十三號。
返黎做咩？我都唔知，仲要一點俾你出去食飯食到兩點半，四點至准放工。
我對於一d make sense既野好支持架，但係對於一d唔make sense既野又無得反抗，我心裡面一定係咁串字(例如：till, diu......註：老師都係人，呢d野個心諗下都得掛﹗)。
其實，如果有野未做晒既話，我相信老師一定會自動自覺返黎完成埋佢至放暑假，因為我相信我既同事都係專業既，有職業操守既，可惜.....只係有人無咁樣諗過我地，真遺憾﹗
每日返工唔知做mug東，我相信連九月要做既野，放暑假前就已經可以做晒喇﹗....呀﹗唔得，人地係都要八月至話你知教咩班教咩科，老師又可以響空檔時為未來既學年預備d咩呢？﹗可能係一個桔﹗﹗﹗﹗
