有咁耐風流

無教咁多年中文，淨教家政，真係好舒服，不過，今年終於要教番喇，真係有咁耐風流喇﹗

有日有個中三學生，上完中文堂時無啦啦大聲講：「miss，你都未教過中文既。」
我：「咩未教過呀？」
學生：「我家姐話以前響度讀咁耐你都係教家政咋喎﹗」
我：「係呀，你家姐呢句說話無錯呀，不過我唔係未教過中文喎。」
學生好懷疑：「幾時教過呀？」
我：「響你未出世之前已經教緊。」
學生：「車，玩野。」講完就走左去玩喇﹗
原來呢個世界講真說話係唔得架，無人信架。

幸好，今年我做班主任既呢班學生暫時都好乖，亦幾可愛，比我想像中有趣；而中一班中文班既學生亦好守秩序好聽話，希望今年大家開開心心又一年啦。

所謂好頭好尾，我記得我第一年教果班學生都好好教架，好開心咁就過左第一年教書生涯，然後愈黎愈差、愈黎愈差、愈黎愈差......大前年遇過一班好頑皮但我好鍾意佢地既學生(可惜一齊做班主任果位就太.......)，今年，迴光返照，希望唔係假象啦。

一個開心既句號係幾緊要架﹗