I love HK 開心萬歲

今晚食飯時講開徐子珊同欣宜好似樣，家姐就話睇過一套「開心萬歲」裡面有佢地，好好笑，於是返到屋企立即睇，果然笑死我﹗

本來睇過同樣都係TVB出品既第一套「七十二家租客」，一d都唔好笑之後，無打算睇呢套架，不過今晚真係笑屎左，響英國都笑到成身汗呀﹗

由頭到尾都充滿笑位，最好笑係孖妹，兩對孖妹都好好笑，人多得黎唔覺堆砌，節奏快，對白都幾好笑，而且如果你係屋村大既話，又有番我咁上下年紀，對d懷舊野有d感情既話，呢套應該係唔錯既選擇﹗

志明與春嬌、唐山大地震

志明與春嬌

尋晚睇金像獎至記得睇左呢套但未響度介紹過，佢係一套幾有驚喜既香港電影黎架，唔錯﹗

故事好地道亦唔複雜，對於我呢類唔煲煙既人類黎講，認識一下煙鏟先生小姐既生活，仲幾有趣添﹗成套戲好合情合理，好有陣香港味，我一路睇既時候就一路讚緊個編劇好野，一條咁生活化咁簡單既題材寫得出一個咁流暢，又令你睇完個幾鐘都唔覺得佢響度講緊無情節既故仔，我仲記得當時係咁諗既：「蝦﹗煲煙你都作到故仔，你細個實情係大話精黎架喇﹗」

至於男女主角，無咩特別，無咩需要或講求演技，所以，唔明點解楊小姐可以提名角逐女主角獎。

唐山大地震

話左唔睇呢d戲架喇，點解？費事喊啦﹗我咩屎都喊得一餐，就連去旅行咁開心都可以玩到邊喊到邊架：同揸車師傅呀、行山導遊呀、玩熟左之後要走時……喊；俾狗圍住吠……喊；落狗屎出唔到去行景點……喊；見到個景好壯觀……喊；無交通工具走唔到要困幾日……喊。不過，當然，我只係果d自己喊完無事既蛇，唔會呱呱嘈攪到人既﹗

講番套戲啦，最大收穫係流左一公升眼淚囉﹗

地震果場d特技好誇張，唔係幾好；反而震完之後，個女仔醒番果場令人印象幾深刻；最記得既對白（大約意思）：「地震之後既屋可以再起，但係地震完全震碎左阿媽個心，阿媽心裡面既屋完全震得粉碎，唔能夠重建。」、「人地（男朋友）都唔要我咯，重返去做咩呢？﹗」、「每年開學，阿媽買書簿都係買兩份架﹗」；最令我感動既道具：蕃茄。

故事只係一開始講左地震當日，大部分情節都係講地震後呢一家人點樣過活：

男主人：地震當日死左 （生死有命，呢秒唔知下秒事，有得食好食，有得玩好玩，有得相聚好相聚喇﹗）

女主人：死守唐山，為的是一家人齊齊整整，死左既阿女同老公有得返屋企；點都唔再嫁人，為的是老公為左自己而死，一個對自己咁好既人，點可以背叛？ （而家d人既角度咪叫「萌塞」囉，蛇既角度係「有情有義」）

阿仔：無左隻手，讀書唔成，但事業有成 （都話兒孫自有兒孫福架啦，做人老豆老母真係唔好買定一千幾百萬保險，驚死自己死左個仔唔知點算呀，變態的香港家長，唔好連BB有無便便都擔心一大難餐啦﹗）

阿女：死唔去，俾人收養左，成日以為阿媽救個細佬唔救佢，以為阿媽唔要佢，所以一路都無返去搵阿媽 （以為以為，咪用自己個心去猜度人地個心，就算阿媽只救細佬，咁又點呢？﹗自己個細佬黎架喎，相反，救左自己既話，阿細佬就會死架喇喎，咁就算自己唔死呀，都係用人地條命黎換自己條命，又好好咩？阿女，諗歪左喇，抵你咩住個擔黎做人，難為你阿媽囉﹗）

李小龍、告白

睇左兩齣想講吓既戲，今日終於有時間寫喇﹗

李小龍

第一樣要讚既係李治廷，如果有睇making of既話，就會睇到佢由一個周身肉既小肥仔練到真係有肌肉既李小龍模樣，仲學到形神俱似，睇得出佢好用心去演。

另一樣要讚既係佈景，無論係街景(哈哈，又係去我鄉下拍架)抑或係屋企個景，都好認真。

除此之外，個故仔好流暢，但就係欠缺左少少驚喜。值得一睇﹗

告白

無諗過咁好睇。

要講吓幾個人物：老師、疑犯A、疑犯B、疑犯A同B既阿媽、新老師、班長。

片中話因為法律制裁唔到殺佢個女既人，所以老師要自己設計去報復。確實，好多人都以為d細路好純真，但我就唔同意，佢地設既計，扮野既功力，有時真係會嚇呆你。而法律又好保障呢d「小朋友」，致使一d細路錯完再錯。我幾認同阿老師既做法架，佢既無落手落腳去害d疑犯，但又可以令佢地知道自己既錯。連同疑犯A既阿媽，我都覺得佢地既下場係應得既。我一D都唔覺得老師好惡毒，反而我覺得佢好可憐，好無助。

疑犯A係既可憐又可悲既角色，佢殺個女仔全因為佢無朋友。當佢發現俾疑犯B出賣既時候，佢應該係有一種唔理性既報復心理，想向疑犯B報復，不過，佢又唔係真係咁變態殺完人當無野發生。

疑犯B係既可憐又變態既角色，佢當人係一種工具，只對自己個阿媽有種情意結。

疑犯A同B既阿媽都係一般家長既縮影：溺愛、高期望、將自己既慾望投影於自己個仔身上。結果，自己個仔受害囉﹗你睇香港d細路就知啦﹗

新老師係最無辜既角色，佢一心想幫疑犯A，但反而害左佢；一心想教好班學生，但俾老師利用左都唔知。套戲無交代佢既下場，但我估正常既反應係會變得唔正常囉﹗

班長係一個殺人犯，心態好成熟，佢死既其中一個原因係因為佢搶過疑犯B既風頭。

一套戲，短短兩個鐘，可以將幾個角色既複雜心理描寫得詳細而又唔刻意，各人既告白都俾觀眾有驚人既發現，好睇﹗

Eat Pray Love, 東風破

呢排好忙，結果想起：我要睇戲喇﹗於是，睇左兩套。

1． Eat Pray Love

十月去尼泊爾旅行時見到呢本小說，有阿大口珠姐做封面，但係又唔覺佢上左畫，結果書無買到，租左隻碟睇。小說個大綱係話個女人去左三個地方：印度、印尼同埋意大利，去尋找安慰同真愛。諗住都應該好睇，但結果有d令人失望。

女主角因為唔知自己響度做咩，唔知段婚姻為咩，好想「變」（美國人真係好like "CHANGE"架咩？），於是提出離婚。首先，我唔同意呢個做法先啦，宜家d人一覺得揀錯左，即刻放棄架喎，阿女主角個老公仲係好鍾意女主角架，而且套戲亦交代唔到女主角做咩咁想離婚，個說服力好低。但係，佢好快又同左另一個男人一齊，結果係唔開心咁分開左。當一個人連自己想咩都唔知時，剛剛結束左一段應該係經過思考先至結合既婚姻時，同第二個男人一齊但又知道自己唔係好鍾意人地時，就開始左一段新既關係，你話女主角搞咩呢？好好玩咩？

然後，就話要去意大利食食食，都係無原因架，點解係意大利唔係中國呢？﹗「食」係可以減壓，但套戲講到女主角去食係好識得欣賞人生咁，又係說服唔到我囉﹗

跟住，女主角去左阿男朋友介紹而自己係唔理解既道場（印度）度修行，哈哈，我真係唔知佢做人為咩架﹗

最後，女主角響印尼開始左另一段關係，結局講到佢好似搵到真愛咁。真係真唔真都無人知架，佢咁五時花六時變。

成套戲一d感動位都無，說服力低，從而好難令觀眾（至少係我啦）睇得投入。響d bonus度，大口姐姐話睇左小說頭三十頁已經覺得好正（當然啦，仲有d導演呀，作者呀其他演員都係咁講啦），覺得全美國既女人都會鍾意。哈哈﹗原來d美國女人既生活係咁唔知做咩，係咁想去外面「歷險」，心靈係咁空虛既﹗﹗真係慘﹗

2．東風破

睇呢套戲，好大原因係上一套同一班底既《打擂台》好好睇，而結果，都係好睇，不過，兩套類型好唔同。

套戲節奏好慢，但格調好好，幾個角色都做得好稱職，令人睇得好舒服。套戲有個主題──你無揀錯，你揀既已經係最好。雖然，套戲無好hard sell咁去講呢樣野，但係，「揀」、「作決定」，每人每日都要做，成套戲幾個角色都為自己做左決定，係咪最好就只有自己先至可以批評喇﹗好多時，我地都鍾意後悔，如果後悔完可以再揀，後悔吓又無所謂喎，但如果無得揀呢？後悔黎做咩呢？﹗好似《Eat pray love》個女主角或者我地身邊既朋友咁，兩野就話頂唔順要離婚，又唔係阿爺個年代，宜家無人盲婚啞嫁，無人為頭家嫁個有錢病壞老公架啦，都唔明宜家d人點解咁「即食」，對家庭咁無責任感。唉﹗難為果d單親又唔識諗以為全世界欠左佢既邊青咋﹗

其實，我唔係幾明官恩娜點解做極都唔紅，樣靚身材正，唱歌結他有一手，幾可愛吖，不過，等等吓，都開始步入唔再年青既年代喇，仲要等幾耐呢？Teddy﹐我細個時幾唔鍾意既一個藝人，因為呢兩套戲，我改觀喇﹗苗可秀，我幾乎無睇過佢做戲，只係早幾個星期無記重播李小龍d戲，我睇左一套，苗小姐當時係無演技可言架，但係，佢響呢套戲度，幫官恩娜把脈個場，對眼真係好識演，非常好﹗另外，成套戲既場景都好靚，仲響我鄉下阿爺住既個條街度拍添，我都去過架，果度真係好有味道架﹗

打擂台

呢套戲上畫時，我已經好想睇，我覺得會好睇，結果，好好睇。

好多人睇到個演員名單後，可能已經唔想入場，但係，如果呢套戲係響三十年前上畫既話，嘩﹗大卡士囉﹗泰廸羅賓、陳觀泰、梁小龍、陳惠敏，個個都係武打巨星，再加個艷星邵音音，幾好睇呀﹗可惜，宜家係2010年囉﹗

套戲有個理念：「人生到處都係擂台，唔打就唔輸，打就要羸。」哈﹗人地擺個擂台出黎，無叫你一定要參加架，自願參加得，就梗係要做到最好，羸硬咁既款行出去架啦，「打就要羸」呢句我鍾意呀。不過，我唔係咁鍾意鬥，我唔鍾意將d擂台當成擂台，我既擂台係show room，大家鍾意就埋黎睇吓，好野就拍吓手，唔掂就大聲d墟兩野，咁就好喇﹗我諗我唯一曾經當過係擂台既地方，係我工作既地方，打到中場架喇，我真係唔鍾意咁樣打落去，「唔打就唔輸」，我打到中場退出，都未算輸呀呵？

套戲仲帶出另一個概念：「尊師」。宜家邊度仲有尊師呀，宜家真係只係一個概念黎架喇﹗宜家d老師全部都要同d學生「玩」成一片，d細路先會睬你，你大聲d咋，佢地已經反枱啦，無大無細左好耐啦﹗唉﹗我覺得外國真係有好多野係我地需要學既，但係唔係樣樣野都要學足，好又學，唔好又學吖嘛﹗中國人「尊師重道」既思想，真係極需要保存落去呀﹗好似以前有個女校長，佢對我好衰，連教育局既官都知佢對下屬好偏既，佢唔鍾意你既話，你就死硬，哈﹗我咪係其中一個囉。但係佢始終係我長輩，我真係無鬧過佢，亦無話響同事度鬧佢（呻吓自己點俾佢玩就梗有啦）。但係有個後生女同事就響同事面前「果個老虔婆」前「果個老虔婆」後，我雖然都係受害者，但係都係覺得咁樣鬧個前輩唔係幾好﹗

雖然，老人家既一套未必全對，但係佢地既人生經驗係我地未必有既，聽吓佢地既意見作個參考都無妨既﹗

Into the wild

路人甲響尼泊爾時，成日搵呢套戲，結果戲搵唔到，買左本書。

Into the wild係真人真事改編既，故事講個後生仔大學畢業後走左去流浪，仲要係好激果隻，係要去荒野度流浪。一開始睇，我已經好醒咁同路人甲講：「會做d咁既決定既人，佢一定有d問題，一定有野唔妥。」果然真係，佢同父母既關係出現左問題，去流浪似乎係逃避。

佢大約流浪左兩年多，響一次誤食有毒野果之後，無辦法離開荒野之下，身體愈來愈虛弱，就咁就死左喇﹗

呢套戲似乎唔係幾hit，我地響HMV都可以用33蚊就買到喇，但係套戲幾好睇架﹗

其實，有好多人會喜歡一個人去旅行，一個人去流浪，好聽d好似好型，事實上，我個人覺得，一個人去會多左危險，少左學習，無左溝通。點解？

多個人多個照應，就算有咩頭暈身慶都有個人幫手買吓藥啦，而且，一個人出入，點都危險d既，尤其是女仔。兩個人或者幾個人去旅行，有時有d人會覺得麻煩，但係我就覺得多d人開心d，而且，仲可以學習忍耐，學習同人相處既技巧。一個人去旅行，有野無得同人分享，我覺得個感覺會好孤單，而且，人係群體既動物，係需要溝通既。去旅行係可以好清楚咁認識你既朋友架，如果一班朋友去過旅行後，溝通過後，你會發現（愈少人一齊去愈容易發現）邊個係真正可以做到好朋友，邊個朋友原來只係誤會一場，大家可能連朋友都唔應該做。

不過，又會有好多人真係好享受一個人去旅行既，各有各既玩法啦﹗但係，呢套戲既主角其實唔當呢次係一次旅行架，佢可能係一次報復、一次體驗、一次歷險，所以玩得咁大。我就覺得玩咩都好，九姑娘話斎：「最緊要保住條命。」

又係一句啦：「去旅行啫，唔洗搵命搏吓fa？﹗」

2012、it's complicated、不敗雄心、潛行凶間、CIA光碟離奇失竊案

呢兩個星期睇左五套戲，一路都唔得閒打返d紀錄添，今日終於有時間坐定定搞吓喇﹗

2012

話說瑪雅人既年歷會去到2012年12月某日(我已經唔記得左邊日喇)會終結，然後可能會重新黎過，即係話，地球會毀滅再重生。各國領袖開會決定造方舟，俾所有有錢佬同有貢獻既人上去避難，而方舟就由中國製造。

一路睇，一路覺得套戲好流，包括劇情、特技同演員，應該係一套B級片，不過，當中都有d啟發。宜家地球災難頻生，又水災又火災又地震，連大到成個國家咁大型既冰川都漂浮出海喇，地球沒日？唔好話無可能，我地咁渺小，知道幾多呀？可能唔洗等到2012，可能聽日就係喇老友，仲唔快d同老婆仔女阿媽老豆開心吓？

中國製造？哈﹗好現實喎，中國宜家係地球村既最大工廠區，而臨急臨忙話要造方舟，只有中國能做到啦，點解？我都唔識解，我一直覺得中國政府係萬能架，無野係做唔到既，當然，包括所有正面同負面野囉﹗

而有錢有命呢樣野，不嬲都係架啦，無得拗﹗咁點先係有貢獻呀？同主辦單位有交情既人咪有貢獻囉，無論地球邊個角落，無論已發展或發展中既地方，不嬲都係咁架啦，你唔覺咩？﹗

It's complicated

睇佢，係因為梅麗史翠普，我以前唔鍾意睇佢，但睇過「穿prada的惡魔後」，鍾意左，後來睇埋「Julie & Julia」，真係佩服，演咩都好得。今次佢做返自己既年紀，同老公離左婚十年，老公仔細老婆嫩，竟然覺得有壓力，仲竟然想搵返糟糠，再續前緣，賤到爆﹗佢唔諗吓當日個老婆一個帶住三個，仔女細，老婆無事業，佢無理吓對d仔女既影響，拍吓屁股就走去同個靚女結婚生仔，家陣又想玩多次同樣既劇本，哈，好多男人都係咁架，自私，係男人既專長嘛﹗

套戲入面全部都係「老人家」，但劇情好，演員演得好，香港就唔會有老細俾錢開呢d戲喇，香港人唔鍾意睇皺既皮架嘛﹗

好戲一齣，仲有唔少笑位，非常輕鬆惹人好感，似個鄰家的女孩﹗

不敗雄心invictus

講述南非黑人總統曼德拉出獄並當選總統，整個南非就係一個爛攤子，各方面都需要佢去搞掂，而佢不單止響政治上下功夫，竟然留意到要響運動上下功夫。

套戲係好inspiration，唔算有咩驚喜，但係會吸引住你睇落去。恕我孤陋寡聞，對於南非既歷史，我幾乎一無所知，只知曼德拉呢個名，連佢既事跡都係從無留心過。但戲裡面既情節話我知(我相信唔會距離現實太多)，一個坐左近三十年監既人，原諒又好，政治手段又好，無響當權既時候去報復害佢既人，真係要有好大既心胸先得。我相信，三十年裡面，佢係無白過既，可能如果無呢三十年簡簡單單既生活，曼德拉未必有此大智慧，所以，我地話既「天將降大任於斯人，必先勞其筋骨，餓其體膚」係中國人一早已有既智慧黎架﹗

睇緊既時候，俾我最大感觸既係，我地香港人，真係無果種民族意識架，回歸左十年，你問對自己既身份同對祖國既感情有無增加？我相信好多人會話有，但係去到愛國lu咩？又未喎﹗運動比賽係一種團結民心既活動，所以由乒乓球政治至世界盃，都唔淨係關報紙體育版既事，係一個國家既事。你有無試過睇女排打贏大實會開心到喊呀？有無試過響奧運時見到中國國旗升起會一齊唱國歌(不過，好多香港人都未識唱晒)，會感動流淚呢？香港人只會：「yeah﹗/ 哈﹗贏左﹗ /  good! 」或者 「哦﹗係呀，好野喎﹗」就繼續上網、睇電視、炒呢炒路，有無民族感情呀？「有。」有幾多呀？一最少十最多。「呀......三啦﹗」香港人囉﹗

Inception潛行凶間

首先，改壞名，一套咁好既戲，改個咁「行」(行貨個行呀)既中文名，唔知既以為真係行貨，唔去睇添呀﹗

「周莊夢蝶，蝶夢周莊」，中國人好耐之前已經提出左啦，鬼佬宜家至諗到呀？﹗我非常同意戲裡面果班日日黎瞓幾個鐘既人既行為，因為如果響現實世界係充滿貧困、悲哀、不滿、失望既話，去發個好夢唔係更好feel咩？係假既又好，真既又好，人生都係真真假假既混合物黎架啦，夢境係假又如何？響夢裡面活得過癮，叉叉電，開心吓，醒來又再同現實搏鬥，何樂而不為呢？如果真係有呢d瞓覺吧，一定唔會再有人鍾意take野囉，生意應該好過網吧﹗

故事既結局特意留白(個駝螺不停咁轉但又好似想停)，等觀眾自己去發揮。有人話結局仍然係夢，有人話係現實，其實係咩都好啦，主角成套戲都不斷表示自己想返屋企，想見仔女，係夢又好，係現實又好，如願以償啦。但係有人認為，發夢又點算如願呀？查實，人生都係一場夢啫，大家宜家可能係發緊第四層夢，係唔會醒架，只會死架咋，死左就會見到自己瞓左覺既樣架喇﹗

CIA光碟離奇失竊案

劇情都幾無聊，但係就係想用一件咁無聊既事去串爆美國政府同所有美國城市人，有時間響屋企度hea既話，可以一睇﹗

Toy Story 3

第一、二集我都有睇，不過，今集最好睇﹗

今集都係講一班玩具既冒險故事啦，不過重點響被離棄同離棄上面。玩具主人長大左，自己就唔會再玩玩具，但係，點樣處置d玩具先至係最上策呢？點樣先至會令玩具既本身價值響番度呢？被離棄所產生既負面情緒既破壞力又有幾強呢？

玩具既主人本身就唔想放棄d玩具，但係隨住時間過去，人會變，包括人既需要都會變。新買番黎既玩具d細路通常都唔肯同人share，但玩得兩吓放左響櫃底不見天日；細個時當寶既玩具，大個左會當垃圾。唔好話d細路對玩具係咁啦，成年人對人都係咁啦﹗

大佬熊人因為被離棄，所以變左奸角，後來講到d手下變番忠，改邪歸正，我就覺得班手下本身就係奸架啦，唔會無左個大佬就變番好玩具呀﹗

睇呢套戲意外地令我諗起湊大我既婆婆，d玩具就好似代表左佢咁。曾經一齊生活過，感情一定好好架，到必須要分別時，就算唔捨得都要分開，關鍵係響分開之前有無好好地尊重佢，令佢離開得舒舒服服，開開心心﹗估唔到卡通片都咁感人﹗

*所以，我唔明白點解咁多阿媽唔俾心機湊自己d小朋友，有d經濟上有能力既媽媽都係寧願返工，請個菲傭姐姐就算數。細路仔係要陪架，佢雖然只當工人姐姐係工人，但係人係有感情架，你三兩年就換一個工人，即係培養緊個小朋友「無情」囉，細路仔細個時，邊個同佢相處得最多，影響就最大，感情亦最深，現代媽媽真係唔明？

我記得張國榮有個六姐囉﹗

Alice in Wonderland

  Alice in Wonderland

08年暑假，Megabox間IMAX開檔，我去左新彊旅行，路人甲就自己一條友去左睇Bat man，等我返黎後，佢勁讚好掂，超大銀幕；然後，隔左幾個月，Transformers上畫，路人甲好努力咁上網訂飛，但係無晒好位，結果去左普通戲院睇；上兩個月，Avatar上畫，都係買唔到IMAX既飛，結果去左機場睇4D，效果係ok既。

Avatar後，我強力要求路人甲買IMAX睇Alice in Wonderland，復活節去完緬甸返黎，佢話買到喇﹗

尋晚，我地去左睇7點半。睇完之後，對IMAX呢個新技術絕對係得一個字：正﹗再加上今次係立體電影，真係好好好立體，比機場既立體效果更好。

講番齣戲，個劇情同我細個時睇既故事根本完全唔同，但都不失為一齣幾有趣既電影，我覺得啱小朋友睇多d，但係我尋晚都睇得好開心。

 

Julie and Julia

睇後醒覺：

1. 原來美國有個阿婆叫Julia Child係咁出名既﹗失覺晒﹗

2. 宜家d blogmate其實等如以前既pen pal，只不過可能以前我地只係有一兩個pen pal，宜家大家可能有幾廿個blogmate囉。

3. 對某件事有熱情既話，有多時候都會無心插柳柳成蔭，就好似呢兩位女士咁，無諗住會有另一番天地，但就因為「熱情」於食物，所以出左名喎。

成個戲不斷時空交錯，互相襯托出大家既性格，情節有條不紊，雖然沒什麼高潮，但卻會讓你看得舒舒服服，牽引你細嚼劇情﹗

我都應該煮多兩野呀﹗

阿凡達、十月圍城

等左好耐，終於響生日前睇左阿凡達，到今日先有心機打吓blog。

我係響機場睇4D既，比3D只係多左少少水花、番皂泡泡、少少風咁囉，而立體呢，就真係好立體呀﹗

至於個戲，劇情真係非常咁一般，老實講，幾無新意，而果個哈利路亞山呢，唔該d國內同胞咪鬼爭啦，叨人地光都係為錢，個山如果係咁難認出係咩山，即係唔夠特色囉，聽講阿導演只係睇左張山既相，覺得幾啱用就拆開左黎用喇，響中國有咁多名山大川，除非係一d特定既地貌，否則，咁樣樣既山，真係多的是啦﹗

而個主角既avatar就真係毫無美感可言喇﹗所以，奧斯卡咁既結果我個人覺得好合理。有外國新聞話d人鍾意個外星既環境鍾意到想搬過去，好客易啫，全部都係螢光野黎之嘛，遲d應該會有主題公園招呼呢d fans架喇﹗

 

附加一句，個劇情有部分好似抄左「天空之城」喎，有無同感呀？

－－－－－－－－－－－－－－－－－－－－－－－－－－－－－－－－－－

最近又睇左「十月圍城」，只係覺得無論響咩野事上面，d人只會著眼個主角，對於背後既一班默默支持、靜靜努力既人就一d都唔重視，革命事業都係一樣，我地只知孫中山。

個戲ok好睇﹗

歲月神偷．永利街

記得某日同路人甲又響中上環浮游既時候，行左入永利街，好似發現左新大陸一樣，唔捨得走。當日詳情

呢兩日聽見「歲月神偷」係響呢度拍，仲攞左獎，真開心﹗

我呢條係老餅蛇黎既，d舊野就最鍾意，好似尖沙咀個香港歷史博物館，我就最鍾意去，第一次去既時候，好似去左遊樂場咁，開心過d細路。哈哈﹗我連去到澳門都行佢個澳門歷史博物館行到唔捨得走架﹗

最搞笑係，蛇老豆（David哥，七十有五）細個時住荷理活道，佢老豆（即係我阿爺）響上環有成條街（幾巴閉，可惜打仗咩都無晒，所以我仍然係條窮蛇，烏～～～），我就叫佢帶我去睇，雖然滄海桑田，但係都係好過癮﹗

當然啦，我屋企d老人家講舊屎d野，我就最留心聽架喇﹗

呢齣戲就算唔攞獎我都諗住睇架喇，不過都係唔入戲院睇囉﹗

natural of formosa福爾摩沙的指環

今早九點打開電視，響高清翡翠台睇左「福爾摩沙的指環」，是個台灣的製作，一個非常令我感動的節目。

全集一小時，簡述了幾位台灣朋友與大自然的關係。他們都是放棄現代的方便，懂得尊重大自然，知道什麼是休養生息，肯去實踐與大自然融合的和諧生活的人。

其實，這一種生活態度和對大自然的尊敬才是學校教育中最重要的一環，否則，我們生活的地方最終只會因為人類那種「用盡、取盡、棄盡」的態度而滅亡。一般人只懂每事從經濟角度去想，卻忽視了大自然才是我們最大的資產，傳統才是我們得到最珍貴的遺產。社會步伐是否一定要與生態、傳統及大自然對著幹呢？這是一個值得深思的大課題。我相信只有大自然才是最有智慧的，如果人類能在發展與敬惜大自然之中取得平衡，人類的生活才會得到最好的保障，才不會浪費了大自然送給我們的禮物。

人和大自然之間的和諧、海洋觀、生態觀、敬天惜地的態度都是這個節目的重點，真是一個價值甚高的節目。

看完節目，上網查一查，才知道原來福爾摩沙是台灣的另一個名稱。下面一條link有很多有關台灣大自然風光的介紹：http://natural.myweb.hinet.net/index2.html

**這一年裡，我的星期天大多躲在家「休養生息」，這才發現星期天的節目都很好看，比那些吵吵鬧鬧的無記節目來得有意思，亦讓我對這個世界認識多了。現在正收看「細說長江」，雖然已看過，是重播的，但仍然很值得一看再看。

十一國慶

十一國慶，香港天文台話明會落雨，於是，路人甲之前一晚好醒咁租左碟，諗住雨天安坐家中睇戲。點知......

十一，一早起身，個天既天氣好到不得了，但係我地又好想睇閱兵，於是睇完閱兵，再睇埋套戲，三點幾至出街食野，然後，都係租多一隻碟，返屋企繼續睇，結果，一日就係響度睇睇睇，睇完戲又係時候瞓喇，咁又一日喇﹗

睇左一套港產片，一套西片。

港產片叫「再生號」，一個字，亂﹗個劇本本來已經無咩創意又無咩驚喜，仲俾馬先生拍到亂晒龍﹗唉﹗

西片係安祖蓮娜扮演媽媽既changeling，不俗﹗故事講二十年代美國仍處於貪污，警察大晒既時代，一個男孩被拐，媽媽於尋子期間被警察陷害，經過牧師的幫助，才能脫險。故事是真人真事的，雖然情節沒有多大突破，但勝在節奏明快，安祖蓮娜亦交足功課。http://www.changelingmovie.net/

 

因為睇得太投入，電影前半段睇得我為阿媽媽谷氣，下半段就好想知究竟結局係點，搞到有dd多失眠添﹗

The boy in the striped pyjamas

這是一齣用另類角度去探討二次大戰德軍的暴行，是一齣感人且諷刺的出色電影。

電影改編自小說，劇情大約是講述一個德軍軍官家庭自從搬到集中營附近之後的變化。軍官的兒子偶遇集中營中的同齡小男孩，然後成為好友。有一天，他決定偷偷走進集中營幫朋友找失了蹤的父親，致使得到一個諷刺的結局－－死在父親一手經營的集中營最邪惡的毒氣室內。

片中有很多令我印象很深的片段，例如：集中營中的小男孩真的能製造那種令人憐憫他的能力，就算只是靜靜的坐在鐵網的另一邊，也叫人很想跑上前去安慰他，這不得不歸功於導演選角的功力呢﹗

另外，軍官太太對集中營的無知，就如同軍官兒子對戰事的無知一樣，令我感到驚訝﹗還有，原來當一個政府要哄騙民眾，是一點也不難，什麼歪理都可以從傳媒或教育傳送開去，就像我們當年的文化大革命一樣。

戰爭，必要嗎？如果再有世界大戰，我相信不會再需要什麼集中營，你投一個什麼彈，他投一個什麼雷，一瞬間大戰便完了，世界也就完了﹗

nature's great events

剛剛睇完珠珠台既nature's great events，真係抵睇到賴屎呀﹗

呢集有好多鏡頭好難得，真係有命都未必有機會見到呀，而家安坐家中，歎住冷氣，舒舒服服咁就可以睇得清清楚楚，真係抵呀﹗上次睇完planet earth，買一套返屋企，要幾百蚊架(雖然都係好值得)，宜家淨係俾電費就有得睇喇，抵﹗

睇左成集，「嘩」位十個都有呀﹗屋企有小朋友既，更加要睇，呢度睇住少少先：

 

睇youtube就梗係無電視咁高清啦，下個星期二2030記住睇喇﹗ **收番珠珠台廣告費先﹗

睇電視都忙？(補充)

上次其實已經提過，亞視「香港亂up」真係唔錯，不過上次寫呢個blog時竟然唔記得寫呢個節目，失敗﹗淨係睇鵬哥都夠好笑啦﹗















當然啦，仲有其他藝員都好好睇啦，好似扮華仔、扮臻美校監、扮蘇民峰...... 有時間睇啦，每晚2200，睇半粒鐘開開心心，跟住瞓個好覺﹗

非誠勿擾‧伊沙貝拉

舊年聖誕節響北京見「非誠勿擾」上畫，以為好悶既戲，後來見響大陸好收得，香港唔收得，覺得應該好睇喇，於是尋晚租左黎睇，無失望，有驚喜﹗

男主角其實幾可愛，仲好風趣，只係老左少少，同個靚字拉唔上任何關係，佢咁既條件搵老婆，係有d難度。戲裡面講佢見既幾個女人，都各有特色，亦好有娛樂性，而且有d仲好真實，加強左個戲既可觀性及娛樂性，亦豐富左成個戲。

女主角要求做男主角個女朋友，但條件係個心可以諗住另一個人，可愛坦白﹗我相信每個成年人都有好豐富既過去，掛住另一個人而唔俾老婆或者老公知既，可能佔90%，但女主角好認真咁講出黎，真係幾可愛﹗雖然話掛住啫，但我相信時間可以磨滅一切，當一個人同一個對自己好好既人一齊既時候，可能最初唔會去愛佢，但相處耐左就有感情架啦，就好似以前盲婚啞嫁時代咁，久而久之，只會愈黎愈愛架啫，如果時間過左去而呢位女主角只會抱住以前既一切唔放手只係佢唔愛自己囉﹗人大左就會知道愛情係一剎那既，感情至係永恆既﹗

另一套戲，又係以為唔好睇，不過都想睇吓講咩既，係「伊沙貝拉」。成個戲做得最好既係音樂同氣氛，金先生真係一個好人，佢除左幫d商業片配樂，仲會幫d無錢賺既劇團配樂，抵佢攞獎﹗

成個戲好有格調，拍得澳門好有風格，而梁小姐響呢個年紀可以演成咁，都算叻女，我一直覺得好識演戲既年青女演員係得一個，就係張柏芝，佢演第一部戲時，我已經覺得呢個妹妹好勁，而家多一個，就係梁洛斯，不過佢仲差左d緣，係觀眾緣，起碼我呢個觀眾總係覺得佢個樣三尖八角，唔係好順眼。

不過唔緊要啦，成張牆紙(長治)照住，識唔識做戲都無問題啦﹗

睇電視都忙？

以前唔係好鍾意睇電視，呢個以前係講緊讀大專之後既事啦，因為忙，因為覺得睇電視side時間，但係近年個人relax左，而電視節目既種類又多左，頻道又多左，所以而家間唔中都會因為睇電視而忙架﹗

例如最近，有幾個節目好好睇又或者應該幾好睇：

1. 逢星期一無記1900海底漫遊(講香港海底面貌，睇左一集講海龜生蛋，好睇)

2. 逢星期二珠珠2030自然大事件(未開始，應該好睇)

3. 逢星期四珠珠2030Oceans(睇左兩集，講吓氣候惡性變化對唔同海洋既影響，超好睇)

4. 今個星期二開始左無記2230現代塵世美(做左幾集都無睇過，好在可以上網睇番)

5. 星期一至五無記1755世界自然遺產(悶dd，不過都有趣)

6. 逢星期三珠珠2030Top Gear(講車既英國節目，好搞鬼，別開生面既車節目)

7. 星期一至五J2 0800或1800IQ博士(兩個字：懷舊)

8. 星期一至五J2 1600冒險王(講旅行既台灣節目，有時間可以一睇)

9. 逢星期一無記1715叮噹(三個字：情意結)

 

Knowing

呢套戲個中文名真係唔知，算係一套唔錯既災難片。

片中講述50年前有一位小女孩有預知能力，而且張未來50年既災難日期地點同死難人數寫響個時間囊裡面。50年後，男主角個仔攞到呢張紙，而男主角又發現到原來係一張預言。結果，男主角同所有地球人死晒，而佢個仔同女主角個女就俾揀選左帶左去另一個星球restart（重新黎過，再由阿當夏娃開始過），而帶佢地走既，相信係外星人啦，套戲無講明。

成套戲都好流暢，最可惜係成日都估到之後有咩事發生（可能只係我太聰明，哈）。

其實，雖然我係基督徒，但係我唔排除地球上每個人每個地方每件事既發生係有人、有磁場、有粒子、有宇宙力量，甚至有外星人影響緊，因為我地知既野真係實在太少喇﹗就算以前有人話耶穌係外星人，我都唔會排除，邊個可以證實唔係先？﹗其實套戲講到帶兩個細路去另一個星球restart都唔係無可能架，雖然話阿當夏娃係耶和華創造，但係耶和華係神抑或係外星人呢？我相信以我地宜家既知識及能力，應該未有人可以肯定正確既答案﹗