﹗

上個星期有朋友仔生日，於是約埋一班人一齊出去食餐飯，有幾個朋友例遲，結果等到佢地黎到時，我已經食得七七八八。佢地出現時，仲帶埋一個人(好明顯絕不能夠納入我既朋友list裡面既人啦)黎，我登時既念頭係：都食完囉，對住條友又唔會開胃繼續食架啦，不如走啦﹗但係兩秒之後，另一個我又同我講：車，做咩要為左d無謂人而令到自己同班朋友歡聚既時間縮短左唧？﹗結果我留低左。

成枱人都知道我打算暑假去英國探親加遊山玩水，但係某d理由又令我未必去得成。條友竟然首先開口問我：「買左機票未呀？」本來一句普遍既問候，我係絕對歡迎既，但係佢根本就係撩交打個隻，陰陰咀笑住問你，「幸災樂禍」印晒響個額頭度。我都費事睬佢。

後來，d朋友講開做激光糾視，我把口無講野，但係心裡面就諗緊一場對白：

我：「係呢，唔知你(即係個條友啦)對眼以前逗雞果個問題係點樣醫架呢？係做激光架？」

條友：「我唔係逗雞。」

我：「sorry, 我唔知你以前係盲架，咁宜家睇到野未呀？」

條友：「我以前唔係盲既。你唔好亂講。」

我：「sorry, 我都估你宜家都係盲架喇，你唔講我真係唔敢肯定呀﹗唔怪得知咁樣做野啦。」

當然啦，成段野無發生到，只係我自己坐響度聽緊佢地講野時諗黎氹自己笑啫﹗點解唔同佢玩下野？佢撩我打佢啫，我唔一定要睬佢既。我成日都咁樣教d學生架啦﹗