第七天，Kahta

28/4/2011，第七天，先晴後陰，星期四，Kahta

今早0700到達Kahta，係響巴士上瞓瞓吓覺俾人叫醒，果個人原來就係我地book左酒店既manager，神出鬼沒﹗

阿經理一黎就sell我地聽日既行程，貴到唔需要諗。佢仲出埋軟功：請食早餐。不過我地都係無幫襯。搞完一輪，終於可以上房，唉﹗間間房都有問題，又係搞左一輪至可以洗吓衫，沖吓涼。

1100出去搵聽日去Urfa既小巴，順便食lunch，然後返酒店出發去人頭山。呢個人頭山既tour係私人tour，加埋住宿，TL95，呢區黎講算平，但係平野就唔好有期望喇﹗普普通通咁啦﹗

行程：

Karakus Hill (睇Column)

Roman Bridge

Old Castle

去完三個景點，行左一段山路，終於上到人頭山喇(Nemrut Dagi, 2150公尺)﹗呢邊係睇日出既，我地睇日落，所以要去另一邊

後面堆小石山係人造既，係陵墓，係公元前一個統治呢區既一個成日以為自己好似神咁勁既國王建成既，後來因為地震，圍繞陵墓既眾神石像被震跌。

石像左起：Antiochus I(起呢座野既國王)、Tyche(命運之神提基)、Zeus(眾神之王宙斯)、Apollo(太陽神阿波羅)、Hercules(大力士赫克力士)。兩邊分別有一對老鷹同獅子。

繞過呢堆雪就係睇日落既另一邊喇﹗不過，呢日天氣唔好，無日落景，非常咁陰天。其實兩邊都唔大架，d人頭都唔算好高(2公尺)。

嗱嗱嗱﹗又做犯法野喇，我見d遊客走晒，個山頭又無其他人，咪走入去同個頭影番張相囉﹗其他朋友見我無俾人拉，咪有樣學樣囉，玩起上黎就嘈到阿管理人員走黎吹BB囉﹗好彩吹完唔追究。

由Kahta去人頭山，不停車要一個鐘，天黑或日出前就要個半鐘，返到酒店已經好夜喇﹗