第十三、十四天，Bodrum

4/5/2011，第十三天，星期三，晴，Bodrum

今日差不多成日都係坐車，1130出車去Denizli轉車去Bodrum，成四點幾至到達，然後又發現訂左既hostel係響半島既另一邊，要坐車至去到。大家大包細包，又行左去海邊，唔想行番上車站，於是發揮講價本色，幾乎半價坐的士。

小巴站，呢度既小巴真係出奇地有型有款，靚到想買架走呀﹗

Bodrum係個半島，渡假勝地，如果天氣再熱d，係陽光與海灘既地方黎架。我地住既hostel都好靚架﹗都係TL34一位咋﹗

剛到埗就差不多天黑喇，拿拿聲走落去沙灘行一行先﹗

行完返黎等食晚餐，一個平靚正既燭光晚餐，餐廳貨色，TL20，安安靜靜，舒舒服服﹗

_______________________________________________________________

5/5/2011，第十四天，星期四，晴，Bodrum

響hostel食完個專人服侍既早餐之後，就搭小巴出城喇﹗半個鐘車程即到(TL4一程)。

首先，去左行castle，其實亦係水底博物館，好多響水底度打撈上黎既文物。

好似呢d雙耳細頸陶罐，2000年前既文物黎架﹗

土耳其人響重要晚地方，例如：皇宮，會養吓雞同孔雀。我都係第一次咁近見到孔雀，無網圍住，可以行埋去合照。

唔係zoom埋去架﹗係行埋去影架﹗

呢個係English Tower，都幾有英國風味。

銅器時代沉船展廳內一景。而最為搵笨既就係卡羅安公主廳(Carian Princess Hall)，收TL5入場，唔俾影相，個廳大過我屋企少少，唉﹗

由Castle望向Bodrum，又幾靚喎﹗

行完之後，響門口等緊朋友時，有個鬼仔突然伏響地下，佢阿媽好斯斯然咁問佢做咩，佢話佢俾入面支大炮打死左，然後又繼續伏低，仲伸埋條脷出黎添，哈，如果係香港既家長，又呢又路，鬧死左LU﹗

行完castle，行過隔離去買聽日去Greece既船票，然後食左個early dinner之後，大家分頭去行街，我就當然去行街仔啦，行行吓唔知行左去邊架，路人甲又無黎，不過，又行得番去車站喎，仲發現車站旁邊既街市賣既野比大街平好多，生果呢，就當然要響呢度買，唔響大街果幾檔買啦，平好多架﹗

第二日我再黎，老闆見我傷風，叫我買左D好似中藥咁既野飲，真係舒服d喎﹗

又坐番半粒鐘去寧靜的hostel喇 ﹗