原來係IQ題

今日叫班中一張自己個袋材料包裡面張紙(A4)一開四，全部學生立即做野，只有其中四個望住張紙面有難色，我塊面就轉晒色，因為我知佢地應該係唔知咩叫「對摺再對摺，平均張張紙撕開四份」（我手舉一張已撕左既紙做例）。其中兩個醒少少既，望下左右隔離d同學仔，已經知道點撕喇，另外兩個呢......

一個張張紙摺左好多好多痕，但係唔知點撕，諗左一輪；另一個就張張紙撕左十幾份唔同大細出黎。

結果，同學仔都搞掂左喇，我就唯有繼續啦，等到d同學仔各自去剪布呀，車野呀，我就靜雞雞走去佢地面前攞另一張紙撕一次，佢地就如夢初醒咁：「哦」

原來我係問左一題IQ題（對於佢兩個黎講），仲係一題幾深既IQ題。

﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣

講開IQ題，我就真係俾我個姨甥仔考起，問題係：

叮噹同keroro出街，點解keroro次次都俾人打先？（估一個童話故事）

佢講完個答案我知之後，我笑到反轉。