新年又整錦鯉年糕

記得舊年好似整過，今年用左紅色，好似太紅，應該溝少d。我無食到呀，俾路人甲食晒。

食譜如下：

錦鯉年糕

 

材料
糯米粉600g
澄麵粉150g
白冰糖500g
椰漿400g
奶100g
水500g
薑一片

 

做法：
先將冰糖加水, 薑, 用慢火煮溶,
將薑取出, 熄火, 待涼, 加入椰漿, 奶攪勻,
將糯米粉, 澄麵粉混和, 逐少加入糖水攪勻, 過篩兩次,

 

錦鯉做法：
取出 500c c粉漿, 加入兩滴紅色素 red food colouring, 攪勻
魚模搽油, 放入少許紅粉漿, 大火蒸約2分鐘,
加入白粉漿至九成滿, 在頭, 尾, 魚鰭位置加入紅粉漿, 大火蒸12分鐘, 取出, 脫模在鋪有保鮮紙的大碟上(防黐作用), 趁熱黐上黑芝蔴做眼睛。

 

 

可蒸成一個20cm 椰汁年糕 (蒸一小時)
或可蒸40條小錦鯉

 

毛巾蛋糕

家教會旅行去挪亞方舟，此地只適宜小朋友去，所以我當日被悶瓜了。

其中有個活動係教整毛巾蛋糕，我見既然無野可以做就做吓啦。如果你係媽媽，可以教小朋友做呀﹗

材料如下再加兩條小毛巾。

先將白毛巾同藍色毛巾分開對摺再對摺。

再將兩條毛巾疊起一齊捲，放入紙杯，響上面加粒紅絨粒。

完成。

再將蛋糕連同心意卡放入禮物袋就可以送俾人喇﹗

阿姐都bully肥羊

家教會去旅行，小肥羊同一班豬朋狗友去食豆腐花。

小肥羊：「阿姐，唔該我個碗咩都唔落，淨豆腐花。」

狗友：「咁係咪連隻匙羹都唔加落去呀？」

小肥羊：「唔要羹點食呀？」

阿姐：「唔洗擔心喎，我地呢d係衛生羹黎既。」

豬朋狗友：「哈……，肥羊鍾意用衛生羹食豆腐。」

賊都做唔成

學生A響小食部買野扮俾左錢然後溜走，俾老師見到，被捉住。

老師：「你無俾錢喎﹗」

學生：「我有俾呀，你唔好屈我喎。」

老師：「我明明睇住你扮俾錢，然後又縮手，跟住走開。」

學生：「我俾左啦，你睇唔清楚啫。」

老師：「好，同你去同阿姐對質。」

學生同小食部阿姐講：「我頭先明明俾左錢你架，你唔記得咩？呢度d野食$6.5，我俾十蚊你，你仲找返$4.5俾我添。」

老師：「仲唔係講大話？﹗阿姐日日響度找錢，點會找多一蚊俾你呀，應該係找$3.5至啱數喎。」

學生見穿到補唔番至認自己無俾錢。

唉﹗賊都做唔成，都叫佢地好好地讀書架啦。

到石崗一遊

尋日病死左響屋企，我自己都唔知咩病，總之就係個胃同個肚硬係有d唔舒服，成身無力，企一陣就要坐番低，好似大病完一輪咁。於是十點半就瞓喇（其實呢排都係咁早瞓，個人成日好似超晒支咁，好鬼易攰）。

今朝瞓到九點幾至識醒。諗住出去行吓等個人精神d啦，就提議去石崗間「紅磚屋」行吓。點知路人甲行錯路，去左「士多啤梨園」，將錯就錯，行左一轉。

士多啤梨園隔離就係鄉村俱樂部，d人租田種左好多野，有番茄啦

有不同種類既菜啦

有蘿蔔啦，佢地拔緊出黎喇，好大個架，整蘿蔔糕就啱晒啦

仲有瓜添

行吓行吓，仲見到有個球場，係天水圍飛馬個練習場黎架，咁啱佢地響度練習緊

行番過去士多啤梨園就入左去摘士多啤梨喇，園內除左有士多啤梨之外，仲有好大朵既向日葵，同埋五代同堂，不過狀態麻麻地。見唔見朵花頭頂有隻野呀？唔係烏蠅，係飛機黎架，石崗有個機場嘛，今日好多飛機飛黎飛去呀﹗

真係好多仲好大粒添架，小朋友黎到一定好開心呀﹗

粒粒都又大又紅，仲令立立架

路人甲好似唔洗俾錢咁，係咁剪係咁剪，而我呢，我d選擇困難症愈黎愈嚴重，揀唔到，因為粒粒都好大，又驚剪到粒唔夠大，總之就有病啦～～～我

我地呢塊田係種法國品種既士多啤梨既

響田度行黎行去，揀呀揀，好多好香好靚既士多啤梨呀

有收穫，梗係開心啦，成個人精神晒，都話有得玩我就精神架啦

今日雖然係星期六，但未有團入黎，無乜人，晏d就可能人山人海仲俾人剪晒d士多啤梨添呀﹗

你睇，幾靚﹗

就剪住咁多先

磅好入埋盒，盛惠＄100。其實係每磅＄60，我呢度差d唔夠兩磅。佢話係有機種植既，我都唔知係咪真架，見佢d葉塊塊都鬼咁完整，不過，貪得意玩吓囉，有得食有得玩，ok啦﹗

俱樂部有好多草地，我見到都開心呀，何況小朋友？﹗

行完一輪又有d攰喇，咩病呢？

一零年第一hike

自從聖誕節上過神山後，返到香港就無再行過山lu，前日為左今年第一次既行山，出發左喇﹗

星期六傍晚一條友入左去白沙澳青年旅舍join埋一班新舊朋友仔同路人甲，食左個盆菜（有朋友買埋入去），瞓左一晚，星期日一早九點就出發喇﹗

今次行程係：白沙澳－－石屋山－－雞公山頂－－榕樹澳

至於天氣，真係唔話得，星期五落雨，星期六大煙霞，到星期日天晴到以為行左去泰國。

沿途景色：

白沙澳青年旅舍，我住樓下尾房。

一起步就遇到牛氏一家。

白沙澳呢度d鬼人響我幾年前行經呢度時，佢地已經住緊響度，搞到周圍好靚，事隔幾年，佢竟然圍起晒（應該係霸返黎既），整得比以前更靚，唔講仲以為係外國添呀﹗

仲封鬼左間大屋個正門添。

附近其實仲有唔少呢類咁有心既「鬼屋」架，好正﹗set得好正﹗

不過呢間紅門屋前面段斜路就鋪晒「綠色地氈」，落雨就實跌死。

途中當然有唔少靚既植物啦﹗

上到石屋山遠眺馬鞍山及船灣淡水湖。（都有煙霞呀，唔夠清）

上到雞公山山頂，風景超好。（又係煙霞大左d）

由雞公山山頂回望雷打石。由山腳爬升300米，800米長，龜速35分鐘到山頂。一個月先行一次山，係咁上下啦。

到喇﹗

下次要等幾時至有得行呢？﹗真係要搵到「腳」或者等路人甲得閒至得喇﹗

轉機返深圳－－曼谷

3／1／2010，話咁快就到左旅程第十二日，亦都係最後一日喇﹗

呢日無咩做過，響suk11食左個免費早餐，又遇返當日班佛山女仔（都係住呢度），提議我地去chatuchak，於是就去左行左兩個幾鐘。

呢間就係suk11喇，好鍾意呀，佈置得好有趣，而且唔貴，只係二百二十蚊港紙一間房一晚。

房間好日式。

周圍好泰式。呢度係大堂。

房出面既走廊。

食自助早餐lu，樓梯側。

入口。

BTS，我雖然黎過曼谷三次，但係都無搭過，第一次搭，唔知點解，我覺得曼谷好有東京feel，可能都係個共通點－－亂、先進。

行完chatuchak後，返去suk11附近做左兩個鐘泰式按摩，550B，比深圳更平。經過口咁多次不同形式既按摩，我終於知道自己最鍾意oil massage。

跟住又係響附近搵間好好地既餐廳，食左個lunch。等食期間，發現呢間野好懷舊，好正﹗

又係冬蔭公蝦，賣飛佛﹗

由於黎既時候坐巴士都幾轉折，大家都想舒服d咁去機場，本來想坐機場巴士，但又由於佛山女子提供情報，坐的士都係300B，同兩個人坐機場巴士價錢一樣，所以，坐的士去機場，半個鐘已經去到機場喇﹗

都係坐airasia，總括黎講，我對呢間廉航既評分都幾高，唔錯﹗

曼谷－－深圳機票：＄677