U magazine 第二次登我既投稿呀﹗Yeah!

繼上次投稿去U magazine寫「由喀什走到中巴邊境」後，今次因為呢個暑假被困香港，想搵d野寫吓打發時間，於是又諗起投稿去Umagazine喇﹗今次寫「偷得浮生遊陽朔」，係復活節時去既﹗

就係呢本喇，今日新出既﹗

今次一共兩頁半，佢地張我篇稿個開頭改左d，但係我覺得我個版本好d，he﹗

而d行程呀，tips呀，都係我寫架，最開心係佢將遇龍河筏工朱師傅個聯絡電話都登左，我睇到之後，心裡面一直大叫：「朱師傅，你日日有工開，唔洗愁喇﹗」

原稿：

偷得浮生遊陽朔

想要有個活動多多的假期，又想要舒舒服服地享受陽光與音樂，靜靜地看書看風景，或者結識來自世界各地的朋友，不用坐飛機，不用額外申請年假，那麼，輕輕鬆鬆地在桂林陽朔渡你的周末吧﹗

 

星期五下班後，坐火車卧舖到桂林，一覺醒來，剛日出便到達桂林火車站了。由桂林市到陽朔，只需一個多小時車程，安頓後，便展開了一個既豐富又悠閒的周末了。

 

陽朔西街是一條經歷一千四百多年的老街，街道兩旁古玩字畫店、酒吧、咖啡廳、工藝店林立，雖然只有五六百米長，卻吸引了比香港蘭桂坊還要多的「老外」，「老外」的密集程度比北京的使館區還要高。日間，大家可以盡情的在西街吃吃買買，閒坐在咖啡廳聊天看書，漫步漓江邊，坐坐熱氣球，飄到半空欣賞山水如畫的景致，悠閒無比；夜間，大家又可以放縱地在強勁的音樂下起舞，跳個大汗淋漓，或者到附近看由張大導策劃，當地筏工擔綱演出的「印象劉三姐」。

 

想舒展筋骨的話，可以租一輛自行車，在田間騎行，感受鄉間氣息，或沿十里畫廊，逐一探訪著名景點；如體力充沛的話，可乘車到附近的楊堤，徒步走往興坪古鎮，途中除了可以欣賞漓江美景之外，更可在廿元人民幣背景的風景原型處留影。如半途發現力有不逮，亦可雇竹筏漂流於漓江上，欣賞兩旁的喀斯特地貌。到達興坪後，跑上老寨山，遠眺四周，漓江大拐彎就在腳下，景色美不勝收。

 

如果嫌遊漓江的竹筏馬達聲煩人的話，便一定要到遇龍河漂流了。筏工一邊划竹筏，一邊跟你閒話家常；你一邊享受河上的寧靜，一邊吃著水果甜點，豈非人生一大樂事﹗漂流全程要衝28個小堤霸，有的堤霸高 一米 多，當你坐在竹筏上坐得有點兒納悶之際，剛好遇到堤霸要衝，筏工會把你連人帶竹筏的衝過堤霸，驚險刺激，精神又為之一振了﹗

 

星期日傍晚，乘車往桂林市，轉乘火車卧舖，只是一個晚上，早上又返回工作崗位拚搏了﹗

 

 

半日相展遊

今日星期三，又係展覽館免費入場日，我同路人甲去左沙田個香港文化博物館睇相展，其實路人甲去過架喇，佢陪我去多次架啫。

呢個係「香港攝影系列」展覽一，叫「光影神韻」，展出既作品來自三位攝影大師：陳復禮、簡慶福、黃貴權。三位都已經係老伯伯黎架喇，佢地除左技術了得之外，後生時應該非富則貴，否則都無本錢搞攝影，仲參加埋d鬼佬攝影會，參加沙龍比賽。

都話有d野係真係要用錢至買到架啦，咁當然，攝影既sense又係買唔到既，有人學黎學去都係原地踏步，有人一開波就已經咩黃金分割，咩光圈快門好快明晒，有人攞住部單反搞九萬年都係影唔到一幅似樣既相，有人攞部DC仔就已經影到d好有感染力既相，呢d sense咪買唔到囉﹗

其中，我最喜歡既係簡伯伯既作品，有畫意得黎亦好有味道。睇晒三段訪問片段，幾好睇，尤其是係黃醫生果段，而簡伯伯果段就睇得好開心﹗

宜家人人都有部單反，識唔識影係一回事，有無技術係一回事，有部單反就係攝影師喇，其實真係有幾多人真係有心影好d相呢？﹗

又嬴左個唔知咩獎

話說好多個月前唔知睇邊度話有個咩澳門相片收集定係咩鬼攝影比賽，咁我就send張相去啦。

上個月去完旅行返黎，我老豆話有人叫我去攞澳門船票，開頭仲以為係呃人既技倆，點知我老豆話我嬴左唔知咩相比賽，咁我諗諗下至醒起。

尋日終於去左攞船票，原來係「澳門旅遊局香港代表」既office黎既，佢仲話d相會做road show，由28/8開始，響香港幾個商場巡迴展覽，又會印本書仔響展場度派。

哈﹗死喇呢次，因為我send個張係路人甲個樣黎架，佢成日話唔要咁高調，繼上次u magazine之後，今之已經係第二次搞到佢拋頭露面添﹗哈哈﹗

第一次展覽係響中港城，八月廿八、廿九日。有時間去捧吓場啦(我上去攞船票至知，希望唔會記錯啦，上網都search唔到係個咩比賽黎架，哈﹗)

**fit晒，18號同班同事去澳門玩又慳番一筆喇﹗

路人甲知我心意

今日返左學校做中文科教材。

都話成八年無教過中文啦，我停止教中文既時候，仲係上一個課程，而家呢個同我認識果個課程係完全唔同模式架喇﹗

我要負責做一個單元既教材，放暑假前已經搵過殘渣亮(佢係初中負責人)想問吓佢d資料同課程既野，但係搵唔到。到呢個禮拜終於要開工做野殺到埋身喇，又幾經辛苦至搵到佢，點知佢答我既野完全唔到point，我要知既野有九成五係其他同事幫忙話我知既，佢都有幫我既......5%啦。

今日我又俾佢老點，花左個幾鐘做既野化為烏有，我梗係發老脾啦﹗阿脆卜卜見我咁樣，立即幫我搵到阿殘兄話無既野俾我，於是我又拿拿聲做啦﹗

離開學校之後，見到路人甲。

路：「點呀？好攰呀？」

我：「你可唔可以幫我做一件事呀？」

路人甲望左我一眼：「想殺邊個？」

我聽到之後即刻開心晒，因為我呢句對白以前係未用過既，之前又無同佢提過有關既野，路人甲咁醒目，咁知我心意，梗係開心晒啦﹗

書法班成果

雖然個書法班未上完，但係已經教左一首詩既隸書寫法喇，每堂逐句寫d，都寫左幾堂架喇﹗

老師終於都讚我話「差唔多喇」，係呀，讚左架喇，其他同學佢無講呢句添呀，淨係話呢度個度點點點錯，咁佢當然都有話吓我啦﹗

呢張係響屋企寫既功課，橫寫：春有百花秋有月，夏有涼風冬有雪，若無閒事掛心頭，便是人間好時節。

其實寫得d字又大又細，仲有好多改善空間。

呢張直寫，響上堂時寫，逐個字睇好似寫得好少少，不過d成張個spacing就好似無咁好。不過個「風」寫成日都寫到鬼咁大隻﹗

邊張好d呢？

Knowing

呢套戲個中文名真係唔知，算係一套唔錯既災難片。

片中講述50年前有一位小女孩有預知能力，而且張未來50年既災難日期地點同死難人數寫響個時間囊裡面。50年後，男主角個仔攞到呢張紙，而男主角又發現到原來係一張預言。結果，男主角同所有地球人死晒，而佢個仔同女主角個女就俾揀選左帶左去另一個星球restart（重新黎過，再由阿當夏娃開始過），而帶佢地走既，相信係外星人啦，套戲無講明。

成套戲都好流暢，最可惜係成日都估到之後有咩事發生（可能只係我太聰明，哈）。

其實，雖然我係基督徒，但係我唔排除地球上每個人每個地方每件事既發生係有人、有磁場、有粒子、有宇宙力量，甚至有外星人影響緊，因為我地知既野真係實在太少喇﹗就算以前有人話耶穌係外星人，我都唔會排除，邊個可以證實唔係先？﹗其實套戲講到帶兩個細路去另一個星球restart都唔係無可能架，雖然話阿當夏娃係耶和華創造，但係耶和華係神抑或係外星人呢？我相信以我地宜家既知識及能力，應該未有人可以肯定正確既答案﹗

遊過隔離村食入伙盆菜宴

路人甲個同事間村屋入伙，請晒所有同事及家眷去佢地個鄉公所食入伙盆菜宴。盆菜我都食過好多次，不過響鄉公所食就係第一次，真係好好氣氛，好高興架，不過就嘈左少少。唉﹗男丁有田有地，起好間屋除左自己住，仲可以租俾人，個個月有收入，真爽﹗

我同路人甲都食得好開心呀，更開心既係佢就響我地隔離條村，食完兩分鐘返到屋企。