與家人遊台灣(第一天)

蛇仔去過好多次旅行，但好少同屋企人去，今次係因為老豆話想去，咁我就推左幾日既工作，同家姐姐夫安排左呢次台灣之旅。
行程大約係咁：
第一日：香港飛台灣，往九份
第二日：九份往十分，去宜蘭縣礁溪温泉
第三日：上太平山，玩大同鄉
第四日：玩大同鄉
第五日：由宜蘭縣返回台北
第六日：玩台北
第七日：玩台北，返香港
雖然第三四日遇著打風，但影響不大，而且，睇電視見台灣各地都好似打得好勁咁，我地所在既地方就一d問題都無，只落左場大雨。其實出發前睇天氣預報，預左台灣天氣唔好，成個星期都落雨架喇，但頭兩日好天到不得了，已經賺左﹗

18/8/2013
我六點就出門口，交通好暢順，七點廿分已經到左機場。
今次坐香港航空，起飛delay左少少，但只係遲左五分鐘到台北。有好多朋友都對香港航空不滿，但我次次坐親都無乜問題喎﹗
響機場搞左一大輪，成一點至坐到上去一早預訂左既八人車(連司機，今日日租全包TWD5000)，一上公路就見到101喇﹗

司機車我地去瑞芳食晏，牛肉麵同胡椒餅都好好食

食完之後，見到咁大場面既拜神會，又唱歌又燒豬。

後來經過北部濱海公路，見到個海咁藍，又落車影吓相喇﹗

影左一大輪，就去左金瓜石瀑布(資料)，水唔係好多，司機話d石咁既色唔係因為礦物，而係因為污染。

再上高少少，就會見到陰陽海

同埋頭先上山條路

又玩左一輪，再向黃金博物館出發。可借去到時，淘金時間已過，只有參觀坑洞，洞內比我想像中無咁涼，而且都幾短，無乜特別。
要去參觀坑洞，就要由呢條小街向上行喇﹗

行完坑洞出黎，風景好靚﹗

因為老豆老媽都攰，所以坐低左響太子館出面間冰室，一邊睇表演，一邊食又抵食又好食既棉棉冰，我就去行左陣太子館，都係一般日式建築，又唔俾入屋。
食完冰，去埋四連楝睇吓日治時期呢度d主管既家。

參觀完，係時候去九份既民宿check in喇，因為我地怕夜左九份會無乜野食(司機話既)，所以就算經過左九份個山頂(睇日落一流)都無停車。結果，一搞掂晒check in，安頓好老豆老媽，我即刻就出去影日落啦﹗

仲遇到個好熱心既叔叔，俾我地上佢屋企個天台度睇(我地後面果個山就係似king kong果個山既背面喇)

今次住既民宿應該係大把香港人都識既九份温沙堡，地方唔錯呀﹗而且唔貴，TWD6600已經有咁大間房，走動既地方又多，住到六個人喎﹗

房裡面仲有好多好有心思既擺設

休息左一陣，大家就出去揾食喇(民宿老闆話，老街比較早收，但樓梯街果邊九點至收)。我地揀左戲院對上果間悲情城市，都幾好食﹗六個人食TWD2100埋單，又飽又好食囉﹗
再影多兩吓夜景，是日結束﹗