雨中雪嶽山

19／9一早，行半個鐘入雪嶽山公園，響公園食個好飽既早餐。

野菜飯。

海鮮pancake。一共盛惠19000w。其實響公園食就實貴d架喇，不過，又想睇吓有無其他野食，所以決定入黎睇吓囉。

公園門口有熊人歡迎你。

第一堆橙葉。

接近公園門口既新興寺。

由寺旁既路行入山，開始時都係一d好易行既路，不久就開始上山喇，最初都係一d梯級，後來就漸漸變成岩石路，不過，d石都算易行。

飛仙台河上既石刻。

沿路係千石洞溪谷。

有d路鋪左鐵梯，但愈高愈難行，有d位置要手腳並用咁爬住上。

其中有四個鐘係不斷向上行，幾索氣架，不過上到山見到有景都開心晒，只係後來一路上個景變成白色，雨好大，心情有d灰﹗

經過七小時慢步上山，終於到左小青旅舍。外面又濕又冷，到左之後就留左響房休息。本來我地想住中青旅舍，但上網睇時已經無位，而呢個小青旅舍既宿位係先到先得既，呢間係女宿，另外好似有兩間男宿。我地早黎，旅舍俾左個角落位我地，幾好。

就係咁樣左一排右一排，一間房瞓十幾個人喇﹗

坐低之後發現個地板會發熱，拿拿聲攞晒袋裡面d淋濕晒既野出黎烘乾佢啦﹗

呢d就係我地既晚餐同早餐喇﹗碗白飯廿幾蚊港紙架﹗

夜晚瞓既時候，個地板太熱，搞到我瞓唔到，到成點鐘，個地板開始涼番d我先瞓得著咋，第二朝六點又醒左喇﹗

有用資料：

1．小青旅舍7000w一位

2．氈2000w一張

3．飯3500w一盒、餅乾2000w一包、水3000w兩公升

韓國束草雪嶽山

17／9晚，幫路人甲提早慶祝完生日後，佢就送我去機場坐零晨機去首爾仁川機場喇﹗

三個幾鐘既機程，本來想瞓，但又瞓唔到，於是食飛機餐（原來半夜都有飛機餐食架，我呢d搭慣廉航既鄉下妹又點知呢﹗）睇戲，睇左套prince of persian，只係一套成龍上身八十年代港產式既新西片，無咩特別，睇完差唔多到喇﹗

響機場搭左機場巴士去東首爾（一小時車程），再轉不停站巴士往束草（三小時車程）。

1130到束草總站後，搵左一輪要搭既巴士站，點知就係響落車既總站側邊。1200我地搭7－1號巴士去大浦港食海鮮（大浦就響往雪嶽山途中既海邊，車程15分鐘）。

呢度就係入口喇，都唔算非常多人，不過好多野食架﹗

仲見到好多不知名既海鮮，好似呢d咁搞笑既魚，都係第一次見咋﹗

呢度好地道，好多韓國人都響度食海鮮，唔似係一條遊客街，係一條好長既海鮮市場街，有d檔可以即買即劏即食，我地梗係食啦。我地搵到呢度無咁多人靜靜地既檔，問吓價錢就坐低左喇﹗就係呢檔喇，我地坐響個男人隔離個枱。d韓國人唔識英文，連好簡單既都唔識，最初以為呢度鄉下d，點知首爾d人都唔好得幾多，連機場duty free個女仔問我有無coins，變左cones，英文程度差得緊要，連緬甸d人d英文都好過呢個好似好發達好進步既國家，真奇怪﹗

兩條好大條既魷魚、一條左口、一條小魚，游游下水俾我地劏左成為刺身。有菜有kimchi有醬有飯，26000w，抵到賴屎﹗差d食唔晒﹗

食完hea完就坐番巴士上雪嶽山（15分鐘車程），費事走黎走去，決定攞埋背囊上去玩完至搵地方住。

響雪嶽山近公司門口已經有纜車上權金城，幾分鐘即上到山上。再行少少樓梯就到左觀景點喇﹗

最初行到上黎，白茫茫，咩景都無，點知企得一陣，又咩都見到晒，再企吓添又白茫茫，不斷都係咁樣，其實好有趣，睇住d霧湧過黎又散開。雪嶽山主要係一d唔滑既岩石，好易行。

呢度就係權金城喇，小朋友著住對拖鞋都上到黎架﹗

呢日要好好珍惜個日落，因為天氣預報聽日唔好天。

六點幾，坐番呢種纜車落山，行出公園搵地方住。

行左半個鐘，見到間好似好貴既hotel，走入去問吓價錢睇吓房，嘩﹗即住。30000w一晚一間有兩個房既單位，有埋廚房，超大超舒服﹗我就係瞓呢個地板喇﹗

朋友果邊，真係一人一個單人房一樣呀﹗

然後落樓下條街搵食啦，呢度14000w，什菜飯＋豆腐飯，好味架﹗

食飽，休息，明天要用力呀﹗

有用資料：

1．機場巴士往東首爾15000w （1000w約兌$7）

2．往束草巴士16100w

3．雪嶽山公園入場費2500w

4．纜車來回8500w

5．7－1號巴士，1000w一程。

韓國花絮

從來無諗過會一放大假就去韓國旅行，因為佢文化歷史唔及中國、先進有規劃唔及日本、自然風景未夠特色、飲食文化未夠特別……，我總覺得佢係一個兩頭唔到岸既國家，中國唔中國，日本唔日本咁，今次去，都係因為有朋友抽起我條根，搞到想去雪嶽山行一轉，預左無紅葉，但無預到連黃葉都咁少。

今次去完韓國，又抽起我條睇紅葉既根，真係要諗諗佢，邊度又平又靚先得喇﹗

今日零晨至返到屋企，打住d花絮先啦﹗

去完六日，玩過咩呢？

食即劏即食刺身。

又新鮮又平。

行山，行韓國第三高山，雪嶽山，1709m，可惜天氣不佳，差兩小時腳程至上到頂。睇住雲海先啦﹗第一日有日落睇吓架﹗

第二日，上山時途經廟宇，祈福蠟燭。

滿山仍是綠葉。

綠葉為主，紅葉要搵，而且唔紅。

好難得搵到幾片紅既。

間唔中又有少少。

睇大山大水。

第三日下晝，天氣開始好喇﹗

住古宅，好抵﹗

由我張床望上去，好舒服既一間小房。

睇節慶表演，精彩，氣氛好香港幾萬倍，你會feel到d韓國人係好relax咁享受政府為佢地安排既野，而唔係好似香港咁，死迫難迫。

睇交更。

市區遊蕩。

食人參雞湯。

買護膚品。

詳情待續……

社山大樟樹

尋日仲未好得晒，但係路人甲約左朋友去踩車，我見都可以踩吓，於是又去埋一份。

第一站，近近地踩去單車窩開飯，聽路人甲講過呢度d野幾好食，果然真係唔錯，坐響大樹下涼風陣陣，唔錯，可惜我有野咬，佢地就無事喎。

食完又坐完，出發去搵大樟樹。事源有個舊同事問我林村棵大樹響邊，路人甲話好似社山村有棵，唔知係咪，於是今日就去尋吓喇﹗

搵左一輪，又係搵唔到，不過響鍾屋村同新屋村度左捐右捐，又幾好玩喎﹗結果俾我地搵到喇，由社山村新路個牌條車路直入，左邊見到呢度轉入去：

地上面仲有字帶路，基本上沿住綠色既地面行就得架喇﹗

果然係一棵四百幾年既古樹，好粗好大棵。

棵樹有木道圍住。

佢粗到似乎十個人都未必攬得晒﹗

但係佢俾白蟻蛀得好厲害，有半棵樹被白蟻蛀緊，而且成棵樹都唔健康，生左好多支出黎。

然後就踩出大埔辦d私務，之後，路人甲似乎唔夠喉，於是踩去科學園。一轉入大直路，我已經叫佢地：你地隨便「爆」啦，唔好等埋我，我用自己個pace去踩。

天黑前，返到屋企沖個涼再去食壽司，哈哈，咩病都好番晒﹗

踩左35公里，但係已經有d攰，都係唔夠fit。