抄家

最近學校全校都要查簿，抄家一樣，大家死命做、做、做......晚晚八九點至放工。好憎限時限候要我交咁多野，做到發忟憎，幾時先收工呀？﹗去旅行，去旅行，我要秋天都可以去旅行(唸咒中)。

做到short左﹗

中文房最近趕貨(其實不嬲都趕架喇，只係最近特別趕)，唔知係咪咁樣，有同事short左﹗

今日，中五要出練習，同事O預備左一疊資料，同事C見要幫手，就話：「趕貨無辦法啦，剪貼都唔緊要啦﹗」於是就攞支漿糊筆出黎起勢查喇﹗

兩秒後，同事O見狀：「你支……潤唇膏……」

同事C：「你要潤唇膏呀？攞去喇﹗」然後作狀遞俾同事O，有d串串貢味道。

同事O：「唔係喎，你支係潤唇膏黎架喎。」

同事C仍對自己支漿糊筆好有信心：「我響櫃桶度攞架。」然後將手上面查左「漿糊」既紙貼上練習度。

同事C終於發現，潤唇膏係痴唔到野架……﹗

我坐響附近就梗爆笑啦，佢除左老點全個中文科一人攞起一張傳閱文件後，又一傑作，真係SHORT鬼左﹗

 

**其實如果調轉黎，以為漿糊筆係潤唇膏應該更搞笑，呀……應該幾潤。

 

將軍澳車禍的施姓父子

(【明報專訊】將軍澳九巴翻側慘烈車禍中，慘遭磨爛面的8歲男童濠仔昨日接受初步治療手術，小小臉蛋及後腦縫了逾百針，但仍無懼痛楚，咬緊牙關說︰「OK，無問題！」)

車禍中的施父竟然在這種極傷極痛的情況下，可以淡淡的面對，沒有咆哮，沒有怨聲載道，沒有要生要死，只會正面地以「既來之則安之」的態度去處理自己的情緒，而施小朋友亦顯出勇敢的一面，一家都是樂觀的，正好給香港人作為一個模範。

我們常常因小小的事便怨這個投訴那個，或者一頭栽進黑暗的世界裡，讓自己以為沒有出路，要自己承認自己是地球上最慘的人，原來，有更好的方法去面對困難，有更有效的方法去打倒哀傷，有更正面的態度去生活。

施氏父子，多謝你們﹗你們令我大開眼界，一直都話「仗義每多屠狗輩」，一位貨車司機，一位八歲小男孩竟能有這種勇敢且正面的生活態度和處事方法，請受小女子一拜，拜服拜服﹗你們除了「輕鬆」面對逆境外，還「能夠」關心別人，捐款予其他傷者，實在教香港人上了一課生命教育。希望你們的遭遇能為其他人帶來幸福吧﹗

突然傳來劉美君的歌詞：「從來不怨命，只要認」，這又是否一種積極的態度呢？我想，只要快樂地去「認」，應該算是積極吧﹗

祝福施氏父子和其他傷者快點康復。

發up風

寒窗廿多載，營役雙十年，

遊歷得見識，回家侍堂前。

走過天涯無憾事，

滿臉風霜沒過嫌﹗

侍服高堂倆，娓娓道鏗鏘，

如仍留世上，再走南北場。

此夕難測來日事，

人生如夢走一場﹗

如願，足矣﹗

**呢排睇得多「宮心計」，又想發吓up風，可惜只係亂up一通，唔通又唔順。唔好鬧住，差係差左d，玩吓啫﹗

 

叻女？

改野改得悶悶地又打吓blog先﹗

上一篇講個同學既價值觀同我好唔同。首先，我無講過佢既睇法好d定我既睇法好d，咁當然我自己覺得自己既觀點令我自己舒服，朋友又開心啫﹗而佢既睇法可能亦會令佢好有上進心都唔定。總之人各有志，各適其式啦﹗

有一次，又係呢位同學，我同佢講：「阿X同學同阿Y同學散左之後就好似嫁左人咯，個老公好似係律師黎既。」

同學：「吓？咁好野嫁個律師呀﹗真叻女﹗」

我：「吓？嫁個錫自己又顧家既老公就話好啫，嫁個律師有咩好呀？又唔係要打官司；自己係律師就話叻女啫，個老公係律師又唔係自己，有幾叻呀﹗」

同學聽完無俾反應我呀，可能我已經得罪左人喇﹗哈哈﹗

有blogmate問我怕唔怕個同學睇到呢d blog，我話睇到就最好啦，有d野用文字好過用說話既，同埋，我公開打得出黎就預左係人都睇到，我無背住佢講佢是非呀，只係舉個例黎講吓自己既睇法咋﹗

價值觀不同

早一排同舊同學食飯，其中一個同學仔本來答應話會出席既，點知放左飛機。知情既同學話我知呢位同學因為就快轉去教育局做野，而未來老細又咁翹約左呢晚食飯，所以黎唔到。

我聽到就：「嘩﹗」左一聲，打算繼續講，知情同學就立即話：「其實佢宜家個rank只係同普通GM一樣架咋，無升級架。」

我聽完，繼續我想講既野：「唔理佢咩職級，咩人工啦，佢轉得工就梗係有原因架啦，最少唔洗勞氣，又可以轉吓工作環境，係開心事啦﹗我唔關心佢搵幾多，有無升職喎﹗」

同學聽完就無再講個位同學既收入同職級喇﹗都話朋友之間真係唔係個個都會關心你係咪開心架啦﹗

其實，呢位知情同學既價值觀一直都同我有d出入。佢曾經批評過一位同學升左職就放慢晒手腳：「佢呀，升一級就夠架喇，無諗住升上去架﹗」

只升一級有咩問題呀？各人有各人既生活方式、理想同要求，只要佢自己本人覺得ok，無怨言，其他人又憑咩去批評人地無志氣呢？﹗

呢位同學睇野，第一時間就用錢同權位去衡量，我夠覺得佢可憐啦﹗

 

學生肥M

今晚夜歸又胃痛，仲未瞓到，唯有打blog啦﹗

第二篇

學生肥M係個圓頭圓面成面瘡既四眼肥仔，留班，死咁懶，污糟﹗

事件一：

學生肥M好喜歡串我，尤其唔抵得我靚，經常人身攻擊。

有次，學生A話我聽佢唔可以留堂，原因係要返屋企，私人補習老師會黎補習。

學生肥M又趁機搭咀：「屋企果個索咁多，梗係返屋企補，好過響度補啦﹗」

類似情況經常發生，我無佢咁好氣﹗

事件二：

學生肥M一日到黑係咁搵人傾計，終於有一次我響佢排緊隊時同佢講：「你唔講野係咪會抖唔到氣架呢？﹗」

學生肥M停左咀兩秒，用手禁住個心口，「吓吓」左兩聲：「真係幾索氣呀Miss」

事件三：

學生肥M欠我功課已經一個星期，罰左又追過，成日都話無帶，又話未做完，我都無佢咁長命呀﹗留左幾日堂都話未做晒﹗今日我俾左份功課佢地，係下個星期五先交既。放學時，佢走黎交功課，唔係交欠交個本喎，係交下星期五先交個本喎。

我：「呢本？下星期至交喎，交左欠個本先仲好啦﹗」

學生肥M：「我未搞掂呀﹗有得你收就收住先啦﹗」

我：「有得收我梗收架，不過你再係咁樣，下次要大聲嗌『Miss，收野喇﹗』咁我應該先至收到呀﹗」

學生肥M：「唉﹗星期一交啦。」然後就拍住個同學仔個膊頭，死唔斷氣咁傾住走左喇﹗

我都係時候要教吓呢班友仔d禮貌喇﹗

事件四：

學生肥M又試唔知講左咩廢話得罪我，我扯開話題問佢：「你住個頭係咪好潮濕架？」

其他同學停左兩秒，然後就get到我講咩，跟住就爆笑，可惜學生肥M仲未知我講咩，一臉茫然咁問：「咩呀？」

我：「如果唔潮濕，咁點解你個頭日日都咁濕，仲全日濕架喎﹗」

全班再爆笑。

學生肥M一d都唔怕羞：「我無洗頭之嘛﹗」

其實我仲想問佢：「咁你係咪都唔洗面架？」不過費事玩到佢咁盡啦，呢乪肥野都係無自信既友仔黎既，落堂時我只叮囑多佢一句：「今日記得洗頭喇﹗」

下星期再見佢時，我既對白應該要變成：「你今日洗左頭未？」