蛇竇

2012年1月10日星期二

廣州四日遊之三

25/12/2011

一早八點幾就行去附近既泮溪酒家飲茶，其實上次已經黎過架喇，覺得呢度幾好，而且細個時黎親廣州，阿David哥都會響呢度大宴親朋，d親友都唔知邊度黎得咁多既，開幾圍，食幾輪，食極都有親友黎食野既，真神奇﹗
黎到荔灣，應該要食艇仔粥既，但係我地叫左豬紅粥(Y14.8)，出奇地好食，粥好棉，好香﹗

我地黎廣州既其中一個目的係食拉腸(Y14.8)，真係好滑架﹗

最好野既係蝦餃(Y17.8)，一粒裡面有五隻蝦，真係好食﹗個大包呢(Y17.8)，就有d失望喇﹗

食飽之後，盲中中咁行去對面馬路問人坐咩巴士可以去到小洲村，結果係坐25號去海珠區，然後再問人坐咩巴士去，哈哈，好順利咁坐左565號，到左﹗(呢幾條線都可以去到架﹗)

落左車又憑住大家無里頭既直覺揾路入村，哈哈，又好順利入到去，雖然呢度唔係好骨子，但係有好多影相既好位置，d cafe又整得好有心機，但係已經開始變成旅遊區喇﹗

行完一輪，行左去村口食野，呢個叫罐麵

好出名既蠔殼屋

唔係佈景，係歷史遺址，型呀﹗

裡面有展覽睇呀﹗

影完呢張，俾阿婆鬧：唔好影呀﹗

呢度既芝麻糊真係好滑，我最like個磨，如果我有一個就好喇﹗

竟然有graffiti

有幾百年歷史既石橋+幾廿歲既阿婆

好有趣既氣根，好紅﹗

好有歷史味道既理髮廳

呢度有好多小食架，張枱仲係隻舊艇黎架，好得意﹗

呢度應該係有翻新無老作既場景

行到成五點，又盲中中咁坐架巴士出赤崗站轉地鐵去曉港站，行去江南大道南既炳勝食飯，本來唔洗行咁遠既，都係怪張舊地圖，又怪沙田圖書館無地圖借啦
。呢間無天河區果間咁闊落，不過，食物一樣好味﹗三文魚骨煲，Y33，好香好食﹗

白灼墨魚仔，Y48，爽呀，好似食緊魚生咁，好抵食﹗

黑叉燒拼燒豬肉，Y58，真係好香，未食過咁野味既叉燒呀﹗仲有鯪魚球浸西洋菜，Y38

食飽又係時候揾地方住喇，坐的士去太古倉既七天，一晚Y157，雖然細d，但乾淨抵住。

settle好之後，行過去太古倉，真係好似北海道既金森倉庫架﹗行到佢十點半熄燈至離開，返去沖涼瞓覺，完成完美既一日。

2012年1月4日星期三

廣州四日遊之二

24/12/2011
尋冕張床幾好瞓，今日都算精神。
今日行程，首先，行過對面馬路食左碗巧美麵館既雲吞麵，d麵真係幾彈牙﹗(Y15一碗)
食飽就行過去鹽運西正街行吓d舊街，我發現廣州既住宅區都真係幾舒適架﹗

之後行去藥洲遺址，又幾有趣喎，響個城市中有個咁既地方，飲吓下午茶都唔錯喎﹗其實呢度已經有好幾百年歷史架喇，以前d官就係黎呢度hea架喇﹗

呢區好多呢d舊樓，有d荒廢左，有d變左住宅。

流水井街，好有趣既舊街，呢度以前係書院黎既，叫做考亭書院。

行完一輪，行過去人民公園睇吓個無謂城市原點，不過，我就係響呢度發覺廣州市民比香港人幸福，因為佢地真係可以好free咁響公園度唱呀、跳呀、耍呀......咩都得，香港人呢，響公園咩都唔做得，唉﹗

十一點，行到去廣大路既學而優書店咖啡室，環境好好，仲以為自己去左日本呀﹗

我地睇吓書，飲吓野，影吓相，又行上樓上書店睇吓書，好快就十二點半，又繼續行喇﹗

經過城隍廟，當然要入去求支好簽啦，講笑，行吓就有。裡面金光閃閃，好鬼有錢。

之後到左萬木草堂，以前係學校黎架，裡面都幾古色古香架﹗

但係個後園又好潮喎﹗

以前呢度係宿舍黎架﹗

行行吓街，發現有間三. 二九黃花崗起義指揮部舊址紀念館，諗住入去行吓，點知一行入去條巷度，就見到有間細細既清真寺

逛左一輪，就行左去紀念館睇吓，裡面好有舊廣州既味道架﹗

食完我地最喜歡既拉腸(廣州既腸粉真係滑到無朋友)同粥之後，行左去中山紀念堂(入場費Y10)，只係響外面行吓

日落前，去左越秀公園，全部都係斜路，行到死死吓，睇左幾個景點之後，都覺得冇咩特別，最精彩係行落之後，見到檔山東夾餅，真係好食到呢﹗好食到唔記得影相添﹗

好喇，玩完一日，都要揾地方住架，我地決定去上一次黎廣州玩時經過見到，幾有西關風味既賓館。坐左幾個站地鐵，去到時，佢話full左，我地相視而苦笑，諗緊去邊好，有個阿嬸就上前話取消間房，哈哈，有房喇﹗(Y178一晚)

關西既建築：一套三件

settle左之後，就行去上下九步行街順記食野，兩條友狂食都只係Y32埋單，好食又抵食﹗

黎廣州，就算要響住果方面俾多d，但係坐車呀，食野呀，各方面都平過香港好多，d野又好好食，真係抵玩過響香港呀﹗

2012年1月2日星期一

香港人好奇怪，呢首歌hit左，但無咩人讚林若寧填得好，"the city is dying" hit左，又無咩人知道係邊個寫句對白，只hit埋joe junior。
我其實好少留意流行曲，因為都唔知隻歌響度唱咩，只係記得Eason Chan有幾隻Wyman填詞既幾有意思。
天與地咁紅，當然有留意埋呢隻歌啦，歌詞好有意思，每句都令我有d野想講。

作曲：黃貫中
填詞：林若寧
編曲：黃貫中 / 劉志遠
監製：黃貫中

Lyric @ Lemon Music Group 檸音樂歌詞網

年少多好　頑劣多好　不甘安於封建制度裡
迷信上街真理會達到　
(年少當然好，時間多的是，年少時頑劣根本無煩惱，因為根本唔洗跟d咩規矩，反叛既日子應該係最令人印象深刻既，搞遊行搞上街，大概都算係反叛既一種，真理未必會真的得直，但總算表達過)
旗幟高舉　群眾聲討　不惜犧牲一切去上訴
(你睇吓學校果d校規有幾多個學生會企出黎話學校唔啱？唔敢嘛﹗但係真係有好多都不合時宜，有d仲好白痴架喎﹗舉例：興窄腳褲時，你著到闊一闊都無人理你，相反，興闊腳褲時，你條褲係skin tight呢，無問題喎﹗返學唔俾帶電話，原因係太貴重，係違禁品，帶左返學會俾人記缺點，但係個書包仲貴過個電話呢，又唔洗記缺點喎﹗不惜一切去上訴既，就只有果d老師憎到佢死既學生囉﹗)
權貴的想法太俗套
(錢就梗係俗套架喇，不過，宜家既年青人都已經一早俗套晒啦﹗)
只可惜生活是一堆挫折　只可惜生命是必須妥協
(香港既小朋友一出世就已經開始經歷比其他先進國家既小朋友更多挫折，由考唔到心儀幼稚園俾阿媽攬住喊開始，咩都要同人爭餐死，大學畢業都要住劏房，挫折唔大呀？﹗唔妥協又有咩方法呀？)

年少多好　貧困多好　一蚊積蓄足以快樂到
廉價結他抒發我暴躁
(我都記得，當年窮到燶，儲到錢去一次旅行，開心到咩咁，就算只係去五日泰國呀，都已經緊張到幾晚瞓唔著喇﹗)
財富得到　年歲不保　捐輸不必講究有回報
(好多人好努力咁揾到錢喇，但生命已經去到尾聲，錢唔帶得落棺材，夠咪算囉，至於點樣先叫做夠，見仁見智啦，知足常樂囉﹗至於幫人，真係唔好諗住有回報，但一定有既無形回報--快樂，就一定係你幫人果刻已經攞左架喇﹗)
人世間總會有異數
(唉﹗異數，其實好多，細細個老師教"一分耕耘一分收穫，唔付出就有收穫係異數黎架"，邊度係吖，你有彩數，咪係異數囉﹗)
只可惜生活是一聲發洩　只可惜生命是一聲抱歉　怕追到

如果　命運能選擇　十字街口你我踏出的每步更瀟灑
(係呀，如果可以選擇，人人都想自己揀，我想揀我係北歐出世生活，操普通話既香港身份證持有人，得唔得先得架﹗)
如果　活著能坦白　舊日所相信價值不必接受時代的糟蹋
(坦白係會死人，會俾人軟禁架﹗時代既變遷的確糟蹋左好多野，你睇大陸無野可以放心食喇，禮義廉恥係咩黎架？)

年少多好　朋友多好　一番爭執不會有被告
遊戲競爭不會記入腦
(呢句我唔係幾同意，響學校見d惡魔既行為，我唔係幾同意年少係單純既)
年歲增長　無法修補　青春的詩總會老　時間多恐怖
(呢句老生常談，每當我見到朋友既仔女時，尤其果d就黎中學畢業既BB，我都會諗：吓﹗我咁老架喇？你話幾恐怖呢﹗)

如果　命運能選擇　十字街口你我踏出的每步無用困惑
如果　活著能坦白　舊日所相信價值今天發現還未老
如果　命運能演習　現實中不致接納一生每步殘酷抉擇
(演習？到有得演習既時候，你咪一樣會抱怨，生命無take2先至有趣架嘛，就算點樣錯點樣衰，只要係自己揀既都要樂於接納，但可惜有好多億人無得揀)
留守　過去的想法　我會否好像這樣生於世上無目的鞭撻
(過去，都話左係過去咯，舊野有時係好，但宜家係宜家，記憶同想法可以忘記，但正確既價值觀不能拋棄)

http://youtu.be/2_7UTxWNQM4

廣州四日遊之一

好多年無響香港過聖誕，今年都係要出去行一行，唔去得遠，返廣州都係一個我幾喜歡既目的地。
23/12/2011
響香港hea到十點至出發，上到深圳坐和諧號，十分方便，去到廣州都只係十二點半，其實可以再早D架，不過我地嘆慢板啫﹗等車期間，仲join左7日連鎖酒店做左會員，因為本身我地都諗住會住呢類酒店既﹗
一到廣州東站，就不斷向南行，一路都唔覺有野食，於是行到天河北路，只好走入間人和連鎖快餐，求其食個飯，唉﹗咁就無左一個食野既quota喇。所謂食在廣州，上黎廣州當然係想食好野啦﹗
食完之後行左去天河體育館，竟然有展銷會，個場地大過香港果個。