地心探險記

今日，好刺激，好好玩﹗

路人甲既行山團今日去地心探險，於是我冒死跟埋去，實在超好玩﹗

呢個係入口，真係估佢唔到，呢個只係一個窿，仲要俾水浸住，肥D大隻D都入唔到。

裡面只有好少部分有石屎保護，其餘都係石頭。

已經行到好入喇，1000英尺喇﹗

棄置左既用具同物件。

地心裡面有好多條路，唔識路真係會迷路架，我地都試過唔肯定出口響邊而爬上爬落好幾次架。

一條非常筆直既沙地路，我拉住條繩，又踩唔到穩陣既位，又怕自己企唔穩踢咁舊石落去整親人。落完之後，對手攰到不得了。你睇D人望落去既角度就知條路有幾直啦﹗

地心入面仲有好多「遺物」架﹗

爬完落就梗有爬上架啦﹗爬啦﹗

地心總部，有兩間房。

房入面仲有兩張床。

「遺物」之一。

地心110同240係大道，沿住行會安全D，我地今日除左行呢兩度，仲行過一D「小路」。

「遺物」之一。

又要捐窿喇﹗

「遺物」--杏仁餅罐。

入面成地都係泥同水，仲間唔中有水由頭頂流落黎。

最後一段，長命斜，行到死﹗

完成四小時既地心探險，出黎時仲要爬牆先可以成功返回地面。成個行程既驚險又刺激﹗

彩虹勇士號

星期日剛從浮羅交怡回來，便立即出中環二號碼頭參觀彩虹勇士號。呢日係最後一日開放喇﹗

因為我地係會員所以可以參加導賞團，而一般既市民都可以上船參觀，只要去碼頭報名就可以喇，不過，無人講解，亦唔可以參觀船艙。

上船前，發現原來佢地加多左一日參觀日，就係26/2，時間係10:00-15:30，如果想參觀就不可再錯過喇﹗加長時段既原因係因為佢下一站係韓國，但係韓國宜家海上可能有戰事，變得唔安全，所以佢會留港耐D。

參觀船艙，工作人員(女士)同三副(綠衫)正講解有關彩虹勇士號既事。

船艙內船員休息既地方，船上共有16位來自14個國家既船員。佢地每日會當值四小時。

船長室。其實呢條船原本係一條漁船黎架，GREENPEACE買左翻黎之後，將佢加長左10米。呢條係二號，黎完今次既亞洲之旅後就會退役，由三號頂上。

代表彩虹勇士號既圖騰

我同三副合照，而呢條木海豚都有故事架﹗

岸上仲有展覽架﹗

泰亨村文山公園

下晝無野做，走左去泰亨村，呢頭姓文既，好似係文天祥既後代喎﹗

＊無帶相機，唯有用電話影低啦﹗

有成二百年既天后宮

連埋天后廟一齊既文帝古廟

廟前有一棵許願樹

又經過一間荒廢左既書室

然後黎到文山公園

咁都有比賽架﹗

文天祥石像

佢地先至勁呀﹗

港台新一輯「沒有牆的世界二」既第一集，講一班傷殘人士去台灣第二高峰雪山登山，我覺得我地有手有腳，行動自如，上到高峰唔難，但係佢地真係一小步一小步咁行，都上到三千幾，真係好勁﹗

我出發去台灣（去年聖誕節）前，上過一次大帽山施樂園，咁啱呢班人都響度，不過我見唔到佢地，好似話上左山training，我只見到訓練員Tracy。Tracy以前帶過我d學生玩野外活動，所以我識得佢，而且間唔中就會響d camp site見到佢，佢係「職業野人」黎架﹗

當日知道港台黎拍野，不過就唔知係拍呢一集。

節目裡面既主角講既野，我好認同，係咩？自己睇啦。Click我啦﹗

踩車．大埔－牛潭尾－錦田－大埔

初七人日，生日喎，梗係搵d野慶吓佢啦，踩單車係一個唔錯既選擇，而且，今日路人甲帶我行既呢條路真係幾好玩。

其實佢都未行過架，攞住個地圖就起程喇，我地唔想行車路，於是入左好多村，真正既「穿村」。路人甲憑住一張地圖同埋佢既方向感，我地成功跟足原定路線踩完全程：

大埔大窩西支路－和合石－欣盛苑－嘉福邨－雞嶺－丙崗－實驗農場－粉嶺高爾夫球場－麒麟村－新田軍營（可入內）－牛潭尾軍營－新田公路－模範鄉－逢吉鄉－水尾村－石崗市中心－石崗軍營－上村－林錦公路－林村－大埔大窩西支路 （全長44公里）－大埔市中心（全長47公里）

經過和合石之後仍然有一段行住馬路或行人路

過左雞嶺之後轉入丙崗就開始入村喇，我覺得入村好好玩，丙崗有條路係通往高爾夫球場既，所以就踩左入黎喇，好正﹗

高爾夫球場內唔可以踩草地（雖然我地都踩左少少）

之後我地穿過左好多村路，又過吓河咁，呢條路算好闊架喇﹗

黎到麒麟村

黎到新田軍營，原來可以入去穿過另一面既，只需要登記其中一個人既身分證就得喇，d軍哥好好禮貌，不過唔俾影相，呢度係外圍，可以影。

居喀軍墓地

過左軍營之後，去到逢吉鄉一帶竟然有山路行，我架mountain bike終於都上mountain喇﹗

到達水尾村

村內有棵「樹屋」，佢係一棵大樹愈生愈大，將一間荒廢左既石屋都「食埋」

之後去左石崗市中心食飯，經過石崗軍營時當然又影吓啦，不過d軍哥好快咁，神出鬼沒咁出現左叫我地唔好影，快快離開。

食完飯雖然好有氣力，就係響上去嘉道理農場呢度長命斜度，我都係踩左一陣就要落車推喇，而路人甲當然雙腳唔著地咁，一支箭咁上到頂等我啦﹗講真，推都攰呀﹗

最後，沿呢條林錦公路無驚無險咁到達大埔喇﹗

自製蘿蔔糕

應吓節，整吓蘿蔔糕先，路人甲最Like。

1．將臘味切粒，炒香（不加油，臘味份量隨意）

2．加入蝦米，繼續炒。

3．將5斤蘿蔔洗淨，刨絲。

4．將蘿蔔絲放入鑊中，加一茶匙鹽，一茶匙糖，一茶匙雞粉，略炒。加水至剛蓋過蘿蔔絲，加蓋煲至水份減少至約一湯碗，水份及蘿蔔絲分開盛起。

5．將600克粘米粉放於鑊中，加水及蘿蔔絲至濃稠，加入臘味。

6．倒入盛器中，蒸約40分鐘。可造三碗8吋直徑的蘿蔔糕。

7．蒸好，加上芝麻，好食。

Eat Pray Love, 東風破

呢排好忙，結果想起：我要睇戲喇﹗於是，睇左兩套。

1． Eat Pray Love

十月去尼泊爾旅行時見到呢本小說，有阿大口珠姐做封面，但係又唔覺佢上左畫，結果書無買到，租左隻碟睇。小說個大綱係話個女人去左三個地方：印度、印尼同埋意大利，去尋找安慰同真愛。諗住都應該好睇，但結果有d令人失望。

女主角因為唔知自己響度做咩，唔知段婚姻為咩，好想「變」（美國人真係好like "CHANGE"架咩？），於是提出離婚。首先，我唔同意呢個做法先啦，宜家d人一覺得揀錯左，即刻放棄架喎，阿女主角個老公仲係好鍾意女主角架，而且套戲亦交代唔到女主角做咩咁想離婚，個說服力好低。但係，佢好快又同左另一個男人一齊，結果係唔開心咁分開左。當一個人連自己想咩都唔知時，剛剛結束左一段應該係經過思考先至結合既婚姻時，同第二個男人一齊但又知道自己唔係好鍾意人地時，就開始左一段新既關係，你話女主角搞咩呢？好好玩咩？

然後，就話要去意大利食食食，都係無原因架，點解係意大利唔係中國呢？﹗「食」係可以減壓，但套戲講到女主角去食係好識得欣賞人生咁，又係說服唔到我囉﹗

跟住，女主角去左阿男朋友介紹而自己係唔理解既道場（印度）度修行，哈哈，我真係唔知佢做人為咩架﹗

最後，女主角響印尼開始左另一段關係，結局講到佢好似搵到真愛咁。真係真唔真都無人知架，佢咁五時花六時變。

成套戲一d感動位都無，說服力低，從而好難令觀眾（至少係我啦）睇得投入。響d bonus度，大口姐姐話睇左小說頭三十頁已經覺得好正（當然啦，仲有d導演呀，作者呀其他演員都係咁講啦），覺得全美國既女人都會鍾意。哈哈﹗原來d美國女人既生活係咁唔知做咩，係咁想去外面「歷險」，心靈係咁空虛既﹗﹗真係慘﹗

2．東風破

睇呢套戲，好大原因係上一套同一班底既《打擂台》好好睇，而結果，都係好睇，不過，兩套類型好唔同。

套戲節奏好慢，但格調好好，幾個角色都做得好稱職，令人睇得好舒服。套戲有個主題──你無揀錯，你揀既已經係最好。雖然，套戲無好hard sell咁去講呢樣野，但係，「揀」、「作決定」，每人每日都要做，成套戲幾個角色都為自己做左決定，係咪最好就只有自己先至可以批評喇﹗好多時，我地都鍾意後悔，如果後悔完可以再揀，後悔吓又無所謂喎，但如果無得揀呢？後悔黎做咩呢？﹗好似《Eat pray love》個女主角或者我地身邊既朋友咁，兩野就話頂唔順要離婚，又唔係阿爺個年代，宜家無人盲婚啞嫁，無人為頭家嫁個有錢病壞老公架啦，都唔明宜家d人點解咁「即食」，對家庭咁無責任感。唉﹗難為果d單親又唔識諗以為全世界欠左佢既邊青咋﹗

其實，我唔係幾明官恩娜點解做極都唔紅，樣靚身材正，唱歌結他有一手，幾可愛吖，不過，等等吓，都開始步入唔再年青既年代喇，仲要等幾耐呢？Teddy﹐我細個時幾唔鍾意既一個藝人，因為呢兩套戲，我改觀喇﹗苗可秀，我幾乎無睇過佢做戲，只係早幾個星期無記重播李小龍d戲，我睇左一套，苗小姐當時係無演技可言架，但係，佢響呢套戲度，幫官恩娜把脈個場，對眼真係好識演，非常好﹗另外，成套戲既場景都好靚，仲響我鄉下阿爺住既個條街度拍添，我都去過架，果度真係好有味道架﹗