三月台南高雄五天遊(一)

 

09/03/2013
半夜就起身，原因係要坐八點既早機。
飛機好準時，我地0920就到左高雄，之後坐捷運出市中心，去到美麗島站都係用左15分鐘，實在太方便喇﹗
美麗島站出名有個好靚靚既「光之穹蒼」，我地連hostel都未去，就影左相先喇﹗

個車站商場裡面都有透視畫架﹗

玩完一大輪，我地終於捨得去hostel check in喇﹗
我地放好行李，就打算去鹽埕埔，去到捷運站口，食左個brunch先。

我地到左鹽埕埔站之後，一路行去駁2藝術區，原本呢幾日都諗住踩住單車玩既，但路人甲隻腳唔舒服，唯有行吓啦﹗
好快就行到黎喇，見到呢個倉庫就知道已經到左喇﹗就響呢個倉庫既對面街，我地發現有一間食冰既，真係好味，可惜我唔記得佢叫乜名。

牛奶紅豆冰

之後就係咁睇呀影呀行呀......

呢度成個藝術區都可以踩單車，連展覽館內都得架﹗

好多野賣喎﹗

砧板黎架﹗

呢塊係田黎架，呢d係稻穗

好多裝置藝術品

呢度有個打狗鐵路故事館，連住藝術區既。其實台灣周圍都有呢類故事館，特別在「好日式」，日本人既半世紀統治果然死唔斷氣。

我地本打算行去碼頭坐船去旗津，但誤打誤撞俾我地行左入去一個舊區(哈瑪星)，d屋好有日治時代feel，仲俾我八八卦卦八左個當地女士幫我地做左半粒鐘導遊，介紹呢區既野。位小姐係一間文化館既人(其實係居民，間屋係佢既)，佢話佢地本來係有導賞團既，但人手唔夠，所以無喇，但係佢見我地咁有興趣，所以關門帶我地周圍睇，介紹得好詳細，簡直工呀﹗如果唔係我地話趕住入旗津，我諗佢仲有排講呀﹗

呢區既街都掛左好多好多舊相，有大有細，非常特別﹗

行到去碼頭，鬼咁多人，可能係星期六既關係啦﹗我地排左好耐隊至上到船，但如果踩單車呢，好快就上得船喇﹗

旗津碼頭

旗津街頭，好多野食呀﹗

我地因為無踩單車，所以無行到入去風車果邊咁遠，路人甲隻腳又痛，所以亦無行上山上既燈塔，但其實求其揾個位，個日落都係咁靚囉﹗

入夜之後，我地返去hostel，佢樓下就係六合夜市(其實好鬼細，我地今次行左三個夜市，六合夜市係最無野睇既)。
呢個quail eggs，膽固醇勁高呀﹗

路人甲食左呢d石班，我覺得有d腥，佢就話好食﹗

我地間hostel既大堂，好平民﹗





房間唔算大，ok咁啦﹗

温馨提示：
1. 住walking story，周末TW1300雙人房，平日TW1099。地點好，招待的女孩很幫忙，可惜成日無人，要call佢，或約定佢。
2. 機場去美麗島捷運  TW30
3. 渡輪去旗津單程  TW15