買材料都可以激死你

宜家d細路，真係唔知佢地係用咩野語言溝通，我真係同佢地溝通唔到呀﹗

我叫個中二學生去買40片麵包，佢夠膽買80片番黎，我問佢點解啦，佢竟然話以為叫佢個組每人買40片(一組兩個人)。救命呀，我講左係幫全班買，係俾張shopping list佢地個組，佢地就自己決定邊個去買邊樣，唉﹗有好多麵包仲係即日夠期添呀﹗

然後，第二班去買罐裝吞拿魚，已經俾埋個罐佢睇，好衰唔衰，個兩罐係95克既，我叫佢地買既份量係全班大約200克左右，如果係大罐既，自己睇吓個重量，唔一定買兩罐。結果，佢買左兩罐180克既番黎，唉﹗斎講聽唔明，俾埋個sample佢睇，都係唔明，點呀？

又一傑作

都話做得多學得多，唔識就唔做就更加唔識做。

繼N年前

1．被迫一條友開車上公路，學識左開車（係因為路人甲送左我返學兩日，第三日就響我夠晒鐘返學時唔肯起身送我，我迫於無奈要自己開車上公路走半粒鐘返學）

2．被迫學識洗車（當年無錢但又要住到有車出入既地方，於是買左架錢七，雖然係殘車一架，但係都要洗車架，為左慳錢，路人甲又成日唔得閒，所以要自己洗）

3．同埋做油漆婆（話說路人甲有年去左英國讀書，臨走前買左d漆油返黎，拋低一句「你試吓啦﹗」，我就好聽話咁油左個天台個環保坑鐵頂）

4．之後，呢兩日又再被迫學識兩樣野－－網上製作相簿同埋洗、拆、安裝書架。

我不嬲都有選擇困難症架啦，上次響旅遊展買左兩張整相簿既coupon，諗住路人甲會幫我整，點知佢搞到張coupon就黎過期都未郁手，於是，我唯有自己搞掂啦﹗

我提議書房要搞一搞，整番好d，於是，六七月時，買多左一個書櫃，然後，成間房就處於淪陷狀態，路人甲話會將天台個書架搬返落黎用，結果，等左將近兩個半月，我等唔切喇。我將個充滿雀屎（我屋企呢邊可以媲美米埔架）既書架拆開，再擦乾淨，抹乾淨，搬落書房，安裝好，最後將d雜物放上去，噴埋殺蟲劑（逐個小洞噴呀）叮﹗夠鐘，小姐，你用左七粒鐘。

就係呢個喇，咪好似好易搞咁，本小姐第一次真真正正用螺絲批呀﹗

但係你有無發覺書架上面d野唔似女人野呢？你啱左喇，全部，係全部，係晝面既全部野都係路人甲架﹗（個相架同張相係我既）

路人甲，其實早響九七回歸個期金多寶你已經中左啦﹗

又開始行山喇﹗

以為秋天開始左，點知“賴”野﹗

響超熱既天氣下，由黃泥涌水塘行去筲箕灣，三粒鐘行得七公里，仲行到好鬼攰，真係唔夠fit呀﹗

其實舊年呢個時間，我同路人甲都行過一次，不過上次行到去呢度（下圖），大潭上水塘就轉左去大潭個邊，今次沿大風拗行去筲箕灣。

又係呢度，好鬼鍾意﹗

由山上面望過九龍東。

下面就係鰂魚涌喇﹗

行到就快到康怡時，經過呢個戰時爐灶，係政府起黎俾附近居民用既，點知起左未用香港就淪陷左喇﹗

呢個新少少。其實我好多年前已經黎過，第一次黎既感覺好得意，因為響個城市裡面有個咁既遺跡，都算難得呀﹗

求人不如求己

有時有些事自己發現辦不來，唯有請人幫忙。請人幫忙時，有人藉口推辭，有人唯唯諾諾，有人順口開河胡亂答應，有人認真考慮，可想而知，結果當然並不一樣。

其實，別人請自己幫忙，是對自己一種信任或對自己能力的肯定，可以幫上一把的，當然都應盡量幫，但若然自己根本辦不來，就應該婉拒。可惜，有些人總是不認真對待承諾，答應了別人辦的事，一拖再拖，甚至不了了之，令人失望之餘，亦毀了自己的誠信。

當一個人一次又一次自毀誠信的時候，也別怪別人不再信任你了﹗

重組句子與IQ題

成個世紀無教中文，宜家要重拾紅筆改作文，真係想死呀﹗第一疊中一既實用文都仲可以頂得住，改埋中三篇作文，未改完已經想放火燒晒佢。

我日日響度話：「我宜家做重組句子好叻架喇，我日日係咁做﹗﹗﹗」

卜卜脆答咀：「你都好吖，只係做重組句子，我日日做緊IQ題呀﹗都唔知佢地想寫咩﹗」

唉﹗真係無辦法，佢地連文句都未組織到通順，仲要佢言之有物，又要有條不紊咁寫完洋洋灑灑五六百大字，真係難呀﹗（難為我地幫佢改呀﹗）有時諗吓，我自己作可能快過幫佢改，改之餘仲要度身設計謄正練習，又眉批又總評。（我就真係改到又腫又平喇－－個頭諗爆左腫晒，個pat pat坐到平都未改完呀﹗）

唉﹗改作文既日子已經開始左喇，無日無之咁改落去，改完、評講、重新謄正，再改、第一篇未完第二篇又等緊你去改喇﹗

幾年前個校長對我唯一既德政就係要我教多幾班家政，唔洗教中文；舊年個校長仲勁，令我睇清以後條光明前路應該點行。兩位，真係多謝晒﹗

做慣乞兒懶做官

唉﹗數數手指成八九年無教中文，淨教家政，真係舒舒服服咁度過左一個好悠閒既歲月呀﹗今年開始，要教中文，仲教兩班，雖然未至於「拿」手唔成勢，但都係要不斷改簿改簿改簿、備課備課備課、開會開會開會，日日同d學生角力，搞到有d失魂，路人甲話我：「唔知你做咩要咁緊張，又唔係要博升職，做多幾個月之嘛﹗」我都唔知喎，可能係責任心既問題啦，又可能係驚自己搞唔掂啦，總之，已經試過三次唔記得當值同開會，呀，唔係真係唔記得，次次都係響之前二三十分鐘仲記得，到時一搞學生d野就咩都唔記得晒，死未？﹗

唉﹗我呢d真係做慣乞兒懶做官呀，莫講話無職升又要做多咁多野啦，就算有得升職而要我做咁多野，我都未必想呀﹗(套用某人升完職講個句：你估我想升架？﹗)

有日仲有位無謂人士問我：「你慣唔慣呀？」

我咪好有禮貌咁同佢講：「有好多野都要搞清楚，多左好多野做，有d唔慣啦﹗不過蛇既適應力好強既。」

無謂人：「哈﹗多野做，你咪當還囉﹗」

還咩呀？我問學校借左d野咩？無謂人講既野果然無謂。

 

旅行相機

以前去旅行，都是無要求地拍拍拍，拍下的照片都不是一些令人能夠說一聲「真美啊﹗」的照片。近幾年，開始喜歡用照相機拍下旅程的樂與趣，不過，仍然是懶拍一族--把相機收好了就懶得取出來，也懶得拿著重甸甸的單反機四處走。於是，一直都是用DC仔。

真正屬於我的照相機是幾年前路人甲在網上買回來的二手DC，Olympus5050，相當好用，而且只盛惠八百大元，它最令我欣賞的是1.8光圈，鏡頭的質素也非常好，拍出來的照片效果絕對不亞於單反機，表現實在令我感到非常滿意，它唯一的缺點就是不夠輕巧。可惜，去年完成新疆及巴基斯坦一行之後，它就開始有點兒不妥當，結果，我買了Panasonic的LX3。基本上它跟比它貴一大截的Leica是一樣的，它有2.0大光圈外，還有超多模式，單反機設有的設定它都有。用了幾個月，我覺得它確實是一部相當出色的旅行相機。對於我這個對攝影一知半解的人來說，如果能夠好好使用這部機，熟練地運用它的功能，我相信拍出來的照片絕對可以比單反機拍的照片更佳(如果那些照片是一些不懂單反機又要用單反機的人拍的話)。

最近，市面上又有新機面世，兩部都非常吸引，一部是Panasonic的GF1，另一部是Olympus的E-P1。兩部無論在性質與功能上都是旗鼓相當的，兩大公司的照相機我都用過，都相當可靠。說真的，哪一部比較好？我真的不懂比較，只知道細機的趨勢已開始了，科技一日千里，說不定三兩年後大家剛買回來的單反機已經不再潮行了。

相機於我只為拍下令人回味的記憶，拍得出意境是意外(因本人的攝影技術從來未到過家)，拍的照片被人稱讚是人家有禮貌。追求是無止境的，包括器材與技術，請恕小妹懶，兩者我從來都沒有認真追求過，亦不想給予壓力，只想閒時打書釘時打打有關攝影書的釘，然後有時間又拿出我的LX3到處拍一拍，便足夠了﹗

可能，下一次換機又要等LX3開始有不妥當的時候了﹗

The boy in the striped pyjamas

這是一齣用另類角度去探討二次大戰德軍的暴行，是一齣感人且諷刺的出色電影。

電影改編自小說，劇情大約是講述一個德軍軍官家庭自從搬到集中營附近之後的變化。軍官的兒子偶遇集中營中的同齡小男孩，然後成為好友。有一天，他決定偷偷走進集中營幫朋友找失了蹤的父親，致使得到一個諷刺的結局－－死在父親一手經營的集中營最邪惡的毒氣室內。

片中有很多令我印象很深的片段，例如：集中營中的小男孩真的能製造那種令人憐憫他的能力，就算只是靜靜的坐在鐵網的另一邊，也叫人很想跑上前去安慰他，這不得不歸功於導演選角的功力呢﹗

另外，軍官太太對集中營的無知，就如同軍官兒子對戰事的無知一樣，令我感到驚訝﹗還有，原來當一個政府要哄騙民眾，是一點也不難，什麼歪理都可以從傳媒或教育傳送開去，就像我們當年的文化大革命一樣。

戰爭，必要嗎？如果再有世界大戰，我相信不會再需要什麼集中營，你投一個什麼彈，他投一個什麼雷，一瞬間大戰便完了，世界也就完了﹗

總是用這個來衡量

生於香港，長於香港，香港人永遠只會用錢去衡量事情，可惜我們已被這個錯誤的概念污染了，香港人還有追求其他的夢嗎？

朋友的女兒只有十歲，問我家住哪裡，家中有樓梯否，似乎我家有樓梯她才會考慮跟我交個朋友。我後來告訴她另一位哥哥家中也有樓梯，朋友的女兒很有興趣地追問哥哥的家有多少層，地點在哪兒……結果被我的朋友責罵了兩句才肯罷休。我真的弄不清她是虛榮還是對別人家中的面積感興趣﹗

我曾經跟一些不太相熟的小朋友交談，他們只會說這玩具很貴，那玩具很值錢，他的爸爸很富有，他唸的學校是貴族學校，他的朋友都住高尚住宅區……我很想問他們一句：小朋友，是誰教你重視這些的呢？你不是應該跟我談談什麼遊戲好玩、哪本書好看、你喜歡什麼卡通人物嗎？

朋友聚舊，總是互相問候近況，包括：搬到哪個屋苑呀？呎價多少？換了車沒有？什麼型號？轉公司了嗎？有加薪否？有升職否？隱藏的問候，都是跟錢有關。大家都用薪金、職級、住宅的級數、轎車的型號去評定朋友是否成功，但總沒有關心朋友腰纏萬貫之時是否快樂，是否身體健康。

有些朋友其實已經物質很豐裕，但總不肯放棄一些物質生活去換取一些用錢不能買的時光；總怕萬一錢少了，兒子的課外活動會減少，令他生活質素降低；總擔心自己賺的錢不夠兒子將來使用；總怕錢少了，不夠光鮮，兒子自尊心受損。說真的，未被成年人污染的小孩才不會考慮錢的問題，除非家裡真的一窮二白吧﹗小孩要什麼？他們只希望父母多點時間陪他們玩耍，一起學習，一起遊戲。父母們，請記著，孩子長大的時光一去不回頭，昨天在你正忙著為公司的老闆大人賺錢的一單生意東奔西跑時，你的小女兒正在做喜歡做的古怪動作，但當今天你有空在3G電話中跟她見面時，她已不再做那個趣怪的小動作了。我們可曾想過我們的父母都沒有留一百幾十萬給我們，但我們都能靠自己去完成學業、去找一份工作、去結交一位伴隨一生的伴侶、去快快樂樂的活了幾十年？難道父母們你們真的認為自己的子女是如此的無能，要靠你賺的錢去開創自己的人生？

孩子長大了，又趕著要把四年的大學生涯急急的在兩年半內完成，為的是「快人一步（到社會工作）理想（賺很多很多錢）達到」。校園生活不是要好好享受的嗎？工作是一輩子的事，但我們到了四五十歲還可以回到校園籌辦學生會、組莊嗎？校園生活不是一個經歷嗎？為什麼要急於把它完成呢？原因都是源於一個對錢的錯誤觀念。

孩子到社會工作了，一年復一年，生活就是為了工作，工作就是為了賺錢，賺錢就是為了為自己定位，讓自己被尊重、被肯定。當然，也有很多人是例外的，但大部分香港人都不是例外呢﹗

錢固然重要，但能真真正正地在世上活一場可能更重要，如果凡事都只用錢來衡量，那麼，人生就實在變得太悲哀了﹗

有咁耐風流

無教咁多年中文，淨教家政，真係好舒服，不過，今年終於要教番喇，真係有咁耐風流喇﹗

有日有個中三學生，上完中文堂時無啦啦大聲講：「miss，你都未教過中文既。」
我：「咩未教過呀？」
學生：「我家姐話以前響度讀咁耐你都係教家政咋喎﹗」
我：「係呀，你家姐呢句說話無錯呀，不過我唔係未教過中文喎。」
學生好懷疑：「幾時教過呀？」
我：「響你未出世之前已經教緊。」
學生：「車，玩野。」講完就走左去玩喇﹗
原來呢個世界講真說話係唔得架，無人信架。

幸好，今年我做班主任既呢班學生暫時都好乖，亦幾可愛，比我想像中有趣；而中一班中文班既學生亦好守秩序好聽話，希望今年大家開開心心又一年啦。

所謂好頭好尾，我記得我第一年教果班學生都好好教架，好開心咁就過左第一年教書生涯，然後愈黎愈差、愈黎愈差、愈黎愈差......大前年遇過一班好頑皮但我好鍾意佢地既學生(可惜一齊做班主任果位就太.......)，今年，迴光返照，希望唔係假象啦。

一個開心既句號係幾緊要架﹗

未鬧都惡？

新既呢班中三暫時都幾乖，不過當然會有d多吓咀，有d唔夠聽話啦﹗

開學第一日有個學生將條褲著到好似要去rap歌咁，我咪響班上面同佢研究吓腰係響人既邊個位置、盆骨又應該響褲頭邊度、肚臍又應該同條褲頭有咩關係......(班主任課係做吓呢d野架喇)。最後，我叫佢去洗手間整好條褲先返黎見我，但係佢唔肯去喎，隔離位個同學目擊整個過程(其他同學都目擊，不過一路做住其他野，可能無佢咁留心)，忍唔住出左句聲：「miss煩過你阿媽呀，你去整啦﹗」個同學聽完呢句之後竟然好乖咁去左洗手間整好條褲﹗﹗(當然地，我都向呢位同學補充番一句：「你咁講就唔係好公平喇，你點知阿伯母好煩呢？以後直接話我煩就得喇，我會煩俾你睇架喇﹗」)

今日，呢位多咀同學又出擊。

同學：「阿sir, miss, 今日個班主任堂你地邊個上呀？」

我：「我地兩個一齊上。」

同學：「吓，阿sir上好過miss上啦。」

我：「點解呀？」

同學：「阿sir都唔惡，miss你好惡呀。」

我：「我幾時有惡過呀。」

同學：「我見d同學俾你罰，我都唔敢唔交你d野啦。」

我：「係囉，我無發過惡呀，都未鬧過人。」

同學：「就係未鬧人就已經咁惡喇，鬧人既時候我地咪死﹗﹗」

我：「哈，你呢個推理都好合理，咁你乖乖地囉﹗」

大佬，都未鬧就話我惡，唔通我個樣真係惡過人？﹗

最早的準備

我打破左自己個紀錄，就係早四個月買機票去旅行喇。

話說一早諗左今年聖誕節想去柬埔寨，而暑假又因一d反口覆舌既高層講左唔認數既關係，結果暑假上演左一幕「蛇仔被困香港百無聊賴有作為」，即係做左d有建樹既事：包括救左個跌親無人救既阿婆、寫左篇稿登左上Umagazine、做左屋企個改善工程第一階段第一部分、上網search左d機票價格兼買埋啦……

事關我買airasia既平價機票，去柬埔寨要轉機，於是我諗橫掂都係咯，不如去盡佢啦，結果就住飛機既轉機路線同價格，行程編定如下：

深圳－－沙巴（5日）

沙巴－－吉隆坡（1日）

吉隆坡－－柬埔寨（5日）

柬埔寨－－曼谷（1日）

曼谷－－深圳

以超低價訂左呢五程機：＄2915

哈哈，好開心﹗

然後，就開始訂沙巴神山既住宿喇，響幾番轉折，我地幾番努力之下，終於訂到喇，以平過一般人幫旅行社（當地或本港旅行社都係）買既價錢訂到喇﹗

哈哈，好開心﹗

然後，仲有好多野要訂，仲有好多資料要睇，仲有好多行程要定……

哈哈，我最鍾意做呢部分既工作，好開心﹗

我相信呢個旅程都會好開心﹗

＊＊然後，而家又開始諗緊農曆新年去邊喇﹗好忙﹗好開心﹗（自己鬧自己：低能﹗）

路人甲遊街呀﹗

終於都俾我搵到我嬴番黎個張澳門來回船飛係咩黎架喇：

「歡慶澳門」 相片徵集結果公佈 

「歡慶澳門」相片徵集活動已經完滿結束，旅遊局為答謝所有參加者的支持，每 

位參加者都會獲贈精美紀念品，入選者則會獲贈TurboJET港澳來回船票。 

 

入選作品將刊登在「歡慶澳門」相集及於「歡慶澳門」巡迴展覽中展出。 

 

「歡慶澳門」相集 

出版日期：8月29日 (免費領取) 

 

「歡慶澳門」巡迴展覽日期： 

8月29-30日   尖沙咀中港城 

10月24-25日  沙田新城市廣埸 

11月8-9日   旺角新世紀廣埸 

12月7-11日   港鐡香港站 

入選者一共有65位，我係其中一個。個活動有巡迴展覽，我交去既相係有路人甲大大個頭響樹既，即係話，路人甲要遊街示眾喇﹗

nature's great events

剛剛睇完珠珠台既nature's great events，真係抵睇到賴屎呀﹗

呢集有好多鏡頭好難得，真係有命都未必有機會見到呀，而家安坐家中，歎住冷氣，舒舒服服咁就可以睇得清清楚楚，真係抵呀﹗上次睇完planet earth，買一套返屋企，要幾百蚊架(雖然都係好值得)，宜家淨係俾電費就有得睇喇，抵﹗

睇左成集，「嘩」位十個都有呀﹗屋企有小朋友既，更加要睇，呢度睇住少少先：

 

睇youtube就梗係無電視咁高清啦，下個星期二2030記住睇喇﹗ **收番珠珠台廣告費先﹗

神奇的遺物

話說nana姐辭職走左，但係就一d責任心都無，中四d分未入晒，學生功課未派晒，自己d遺物完全唔理，暑假duty無履行，練習無出到......，一句講晒，一走了之，真係唔知咩人黎既﹗

早響開學前，已經有同事好好咁幫佢執左張枱，因為新同事黎到時，nana姐都無返過黎執野。今日，同事發現佢仲有幾箱遺物，於是逐張睇係唔係學生d野，可唔可以登分，結果......

我地搵到佢既年薪酬表、報稅表、同事既請帖(裡面仲有餅卡)、教師證明文件......唉﹗連呢d咁緊要既野都唔返黎攞番，究竟nana姐係個咩人呢？神奇女俠？

宜家d後生仔後生女，我真係唔知佢地響度做緊咩，做野可以做到亂晒龍，而且，大多數都好識得扮好有紋路咁做野，呃d天真既高層，唔知佢地係咪咁樣呃個學位返黎架呢？﹗

講真，我就無同nana姐有咩合作機會，不過，只係開過一次會，我已經唔like呢位同事，果然，我千年蛇妖，道行有番咁上下，一睇就知龍與鳳﹗哈﹗(寫咁多野黎原來係想讚自己，死未﹗)

舊稿登左上中國旅遊喇﹗

舊年去完新疆之後，投過一次稿去「中國旅遊」，成功登左，之後就寫左呢篇。我當時寫得幾馬虎，覺得寫得唔好，所以「中國旅遊」一直無登我都唔覺得出奇，反而隔左咁耐佢至登，我就覺得幾出奇喇﹗可能呢排無人投稿啦，所以老編搵番d倉底貨出黎登啦﹗

點都好啦，登左又有薄酬(真係好薄架)，好開心﹗

就係呢期喇，今個月，九月號。

原稿：

新彊幅員遼闊，佔地六份一個中國，要在短時間內跑遍南北彊，真的需要時間和精力，加上新彊的景點都比較偏遠，如果乘坐公車則比較煩瑣費時，而且有些景點更是公車不能到達的，例如：紅彤彤的火燒山、色彩斑斕的五彩城、荒涼的魔鬼城、怡人的賽里木湖、綠油油的巴音布魯克和仍未開發的喀拉峻大草原。因此，遊新彊，僱一輛車是個聰明的方法。

 

遊新彊，每天要走的路遠，而且有些路不太好走，所以，僱一輛四驅車是需要的。四驅車一般分兩種，分別是豐田4500和三菱。僱一輛豐田，大約每天RMB1100-1300，收費視乎僱用的日數而定，而三菱則可便宜三、四百元。我個人覺得兩款四驅車的分別不大，只是豐田的馬力和扭力都比較大，遇上惡劣的路況時，化險為夷的能力比較高。在國內僱車，需要另付司機的食宿費，而油費和路費一般都已計算在租車的費用內，但當然最好是在租車前跟司機說過清楚明白吧﹗另外，一輛車連司機在內，最好是五個人，一來坐得比較舒適，二來平均每人的租車費用變得比較少。

 

如果只遊南彊(由烏魯木齊至喀什)，則大可乘坐火車和公車，偶爾僱一天桑塔那(類似香港的士)便可了。

**到目前為止，所有投稿(包括am730，中國旅遊及U magazine)都已全部刊登了，要老編再登我既稿，就要快d寫喇﹗

但係九月一號已黎左喇，今時唔同往日，邊有咁多時間呢？