Yahoo難民報到

土瓜灣有危樓被封無屋住，Yahoo有危機趕客走無良心！
今日開始，byebye Yahoo!

與家人遊台灣(第七天)

24/8/2013
尋晚食得太飽，今朝都唔係好肚餓，但係又面對豐富既早餐，真係有d難為﹗
十點，出發，本來諗住今日去北投既，但又怕好似尋日朝咁熱，所以都係決定去d室內既地方，咁就揀左呢間樹火紀念紙博物館。
我地一齊造環保紙，原先以為幾低B，但老豆老媽又玩得幾開心喎﹗

因為十一點果班已經開始左，咁老師就叫我地周圍行吓先，點知行左一陣，有一大班香港人黎左，仲話趕時間要玩先，咁我地同老師講我地都等左半個鐘，如果無下一班都無問題既，老師見我地等左咁耐，就話教我地造d特別d既紙。

其實就係加少少樹葉響紙度囉，咁大家就去摘樹葉喇﹗

然後就一位老師教我地六個人。

造完之後，我地參觀埋樓下d展覽，姨甥仔玩左一陣d互動活動，咁就有得攞返張紙喇﹗(唔記得影相)

呢d一支支既係通草，以前d人用黎吸屍水架﹗
我地本來諗住去西門町食牛肉麵，但見博物館隔離有間好骨子既日本野食鳥冬，所以就食呢間(稻庭養助)喇﹗
因為係walk in ，所以都要等左一陣至有位，等位區都咁靚。

呢個set，HKD125，我覺得抵得，個天婦羅做得好好，好鬆化，張紙一滴油都無。

食飽又要諗吓去邊，結果都係想去行吓西門町，始終尋日根本無行過。
三點三去到西門町，個天又想落雨喇，行行吓有班小丑周圍揾人抱抱，連老豆都有靚女獻吻﹗

而我地行左大約一個鐘，就真係落起毛毛雨，咁大家諗住響地鐵站見到有個地下街既標誌，就諗住行地下街，唔洗淋雨啦，點知落到去至知原來係無地下街架，真吹脹﹗
咁我地又行返上去紅樓，老豆老媽坐下飲杯野，我就周圍行吓，可能係星期六，好多手工藝小檔，好精美。

行到五點半就坐捷運返酒店攞行李，坐一早訂好既八人車出機場返香港lu！

與家人遊台灣(第六天)

23/8/2013
今日呢間酒店既自助早餐好令我滿意，估唔到咁細既商務酒店個早餐有咁多選擇，食到好飽﹗
十點半，出發去中正紀念堂，我記得我十四年前黎過，今次黎既原因係老豆想睇換班儀式。

我地睇1200點既換班儀式(逢整點都有)，為時15分鐘，其實只得五個兵哥。

之後參觀樓下既展覽館，我十四年前黎既時候好似無睇。

最搞笑既係老豆對國民黨同共產黨既歷史熟到可以做我姐夫同家姐既導賞員。
一點半，大家都肚餓要揾食喇，咁就決定去西門町，但此時既天色開始黑，好似想落雨。

我地一出西門町既地鐵站就已經開始落雨，咁我地是但走左入一間好好睇睇既餐廳蛋蛋屋，點知又幾好食喎﹗

因為外面落大雨，所以我地坐到四點至走，響樓下行左一陣，實在太大雨，大家決定去台北車站地下街。
雖然地下街好長，但我覺得好似行緊葵涌果d商場咁，後來走左上去sogo行左陣買左d手信就返酒店放低d手信同我老媽，再坐的士去寧夏夜市開餐。
黎呢度既目的其實係去御逸軒食老豆最喜愛既湯包，真係好食﹗

點知，呢晚食既野仲多過上次響饒河果度，仲食左個比蚵仔煎更好味既蚵仔湯，鮮甜到不得了。
而呢個小食又係好少見喎﹗

食到成十一點至返酒店，真係飽到呢﹗

與家人遊台灣(第五天)

22/8/2013
今日起身後見雨停左，終於可以出去露台行吓喇﹗

又行過去家姐間房門口度影吓。

今日既早餐得我地一家人食，民宿都將d食物放得好精緻，未食已經覺得好好味喇﹗

食飽睇左陣好好笑既冰河世紀，就出發喇﹗
十一點，我地出發去宜蘭火車站旁邊既幾米廣場影吓相。

旁邊仲有一d咁既日式房屋

呢個響火車站對面既公園都幾特別喎，個頂係假樹黎架﹗

宜蘭火車站

一點，到達今日要去試既「我家廚房」食晏，聽講呢間野攞獎架﹗因為佢比較遠離台北市中心，而今日係我地最後一日用車，所以今日黎呢度食晏，免除自己搭車既麻煩。
呢度既食物同環境都好好，我地一落車以為司機去錯地方，因為呢度似住宅區多d。

兩點半，大家食到飽一飽，而天氣好似預期，又落雨喇﹗
咁我地就如預計一樣，去左個室內既場地先，就係台北探索館喇﹗

黎呢度既原因只係因為佢近101，行完可以過去行吓101咋。
個館唔係好大，可觀度一般，但佢播既電影就係ok，好有心既製作。

我地大約行左一個鐘，就過左去101，由於登頂唔平，老媽又畏高，所以只有姐夫、姨甥仔同老豆上左去，我地就響樓下等。

行完後都六點半喇，而我地架車日租只係九個鐘(今日係用得最盡喇，之前都係用五個鐘、五個鐘、七個鐘)，所以我地去左最近既饒河夜市。
可能打風又落住雨，有好多檔都無開，不過我地都食左好多野，姨甥仔仲玩埋神槍手至走。

八點三，去到酒店check in，呢間台北伸適商務旅館d房都好鬼大，仲有露台，三人房真係唔錯喎﹗