香港西南遊一番

2013/01/13
今日約左朋友去閒逛，行程係薄扶林基督教墳場--東華義莊--何鴻燊體育中心--數碼港--u hall--伯大尼，由起點行到終點，行足一日。
薄扶林基督教墳場內有好多名人，而且仲有好多革命義士。除此之外，有好多墓碑都好有特色，好似呢個就好特別喇﹗

而呢個係一位校長黎既，個墓都好有書卷味﹗

仲有名醫李樹芬醫生添﹗

有錢就有地，包括死左之後﹗

好浪漫既墓誌銘

孫中山後人之墓

墓地用既磚都好有民族色彩架﹗

由墳場向山下行，入大口環村，再向下行，就係東華義莊，就係<東風破>既拍攝場地喇，而其中一場係響一個放左好多棺材既房拍既一場，原來真係現場拍架，唔係佈景呢﹗

響義莊向公廁方向行，沿馬路向海邊行，好快就可以行到黎何鴻燊體育中心。呢度其實係我十幾歲時d大朋友帶過我黎既，我只係記得呢度好寧靜，又有個好大好大既海。

響海邊行左一陣，就行左去數碼港食晏，真係好，無人同我迫。
食完之後，行左成半個鐘有多至行到去u hall，遇上呢d箭咀葉，好得意。

呢條就係名聞遐邇既旋轉樓梯喇﹗

u hall既四不像

u hall旁邊就係馬術中心

行過對面就係伯大尼，原先想買票參觀既，但成日都話內部俾人book左，咁唯有等平日啦﹗

去印度走水貨一樣

其實，去印度有幾樣野一定要做，無走雞架﹗
一、影印度人
印度人真係好鍾意俾人影相，只要你一舉機，佢一定擺晒post俾你影，仲笑晒咁添，有時嫌你影得少，仲要你影多幾張，都幾搞笑架﹗
二、入廟
印度係個多宗教既國家，周街都係廟，有好多都好有特色，好值得參觀。
三、去城堡
古時既印度就好似以前既中國咁，諸侯割據，所以幾乎每個城市都有古堡，有d幅員廣大，有d內部裝潢精緻。
四、購物
響香港，富有民族色彩既野都好貴，於是，去到印度就要買買買買買喇﹗

做運動

好耐無做過運動，12月頭病左半個月，響屋企坐到腳都軟埋，路人甲同我出去踩返轉單車，唉﹗踩左無幾遠啫，就已經好攰喇﹗



代課前，難得天氣好，終於的起心肝出去跑吓，其實係行吓至啱，行左個幾鐘，都有十公里架﹗宜家見到個天好好天都無得去行喇，係咪犯賤呢﹗

牛奶盒變身

飲完牛奶，個盒就用黎整左個靚盒用。
用舊布碎包好，加片風乾左既檸檬做鈕扣，fit晒﹗

沙田盛記

呢間盛記，之前間中都有幫襯，味道好好，招呼周到，價錢合理。呢晚約齊一班舊同事黎打b爐，一d都無失望，又新鮮又抵食﹗食到飽一飽都係位位二百蚊。

菠蘿炒飯

我見原個菠蘿都只係賣廿蚊，於是就買左一個返去加d青豆雜菜果仁，炒左個飯，好靚又好味﹗

聖誕怪怪糕

聖誕節時，本來想整聖誕樹brownie，但又唔記得買齊材料，結果又無cream又無士多啤梨，就整左呢幾個好樣衰既brownie喇，不過，好好味﹗

手造潤唇膏+肥皂

前一排又走去學人整肥皂同埋潤唇膏，兩者比較起黎，肥皂麻煩好多，又要煲熱又要好小心，又要等，呢d做好左既肥皂要等五個星期先可以用。

做潤唇膏就容易好多喇，我自己整都搞得掂，只係將d材料熱熔左，倒落個唇膏樽度就可以用喇﹗我用過之後簡直愛上左佢，好潤架﹗

代課生涯

這兩年多，我只曾代過三次課，一次是代一位體育老師，不用教學，只上課維持秩序，輕輕鬆鬆代了四天；另一次，代一位家政老師，要教授要煮食，但課堂要求比我少，輕鬆；第三次，就是這次，代產假，教中文，要教授要改簿，最差是要教「無諗住聽書既學生」。

代到今日，已經兩個星期，我好開心當年既決定----離開，是絶對正確的﹗

做個流浪婦

去完印度，返香港後兩日，又再肚疴，不過今次應該係因為感冒。肚疴的第三天，呢晚要去David 哥家吃飯，但路人甲下午要外出辦点事，為免他來來回回的接我，我跟他一起外出，在車上休息等他。他覺得這樣委屈了我，但我告訴他，其實我覺得住在車上也沒問題，很久以前我已經有個奇想，就是當錢都花光了，找個附近有体育馆的政府免費車位，就住在車上。哈哈，你說我是癲的嗎？！

 

蒜苗

早一陣子，買左一大包蒜頭返黎，之後，我又去左旅行，返黎之後，d蒜頭標左芽，所以我索性加少少水，放左幾日，就長到咁高，可以炒蛋喇，好香呀﹗

自瓜製腸粉

呢個腸粉好ok喎，街買一樣呀﹗
做法：
1. 粘米粉150克+水300ml，拌勻，靜候2小時或以上。
2. 粟粉，澄麵，油各1湯匙+鹽1/4茶匙，加入(1)，拌勻。
3. 加入水150ml，再拌勻。
4. 大火蒸3分鐘，捲出，灑上芝麻。

冬天似春天行

29/12/2012
跟路人甲去行山，點知好似上兩個星期咁，又係落雨，一路行一路吟：
風嘯雨綿山路行，泥濕石滑林蔭深，雲厚霧濃境莫遠，望待稍時氣息新。~~by蛇仔

響白沙澳住左一晚，第二日好天好多喇，又吟一吟：
風急雨停登山巔，片藍片白是晴天，攀石扶椏穿小徑，遠山近海入眼簾。~~by蛇仔

上次住赤徑，竟然可以食得咁豪，今次住白沙澳煮幾味餸，都唔弱架﹗上次打呢個b爐真豪華：

印度月台的驚喜

今期中國旅遊登左我呢張：我响印度火車站月台搵唔到個行左去影相既朋友，唯有企响度等，正正呢幕就响我眼前上演。我返到香港就將呢張相放左上網，真係被揀中登左出黎，可惜唔係大獎。

講開又講，去印度玩，點都要坐坐火車，不只因為方便，更因為月台上面有好多好多好多野好好影，真係影到唔捨得走架﹗

2013年1月號 中國旅遊登左喇﹗

呢篇稿打左一排，投過去u magazine，但等左幾個星期都無登，所以轉投水準更高既中國旅遊，哈哈，一投即登﹗
原稿：騎樂無窮在金門

近年來，騎單車成為香港的潮流運動，但香港單車徑不足，馬路車多路窄，根本不能滿足一眾單車熱愛者。於是，我們趁著三天假期，到了距離廈門只一小時船程的台灣外島------金門，來一次單車旅遊。

金門由昔日的戰地發展成今天重視旅遊觀光業的小島，縣政府為了方便旅客使用單車作為交通工具，在全島不同的地點設有不少單車借用點，免費借出單車讓旅客使用最多三天。碼頭是旅客到達金門的第一站，其中的旅客服務中心提供不少印刷精美的旅遊小冊子，必取的是「金門鐵馬逍遙遊」，上面印有多條單車騎行建議路線，資料詳盡準確，只要隨著地圖上的路線行走，很容易便會找到不少有趣的景點。

依著單車地圖的指示，我們在潮水大退時到了潮澗帶看招潮蟹；在路旁、村落和古蹟中尋找形態各異的風獅爺；到海邊看綿延的軌條砦，於林中細察身形龐大的坦克車，竄入陰森的碉堡，走在長長的坑道，感受戰時氣氛；穿梭於井然有序的聚落，巷弄間的洗衣石、古水井、小菜園，彷彿時光倒流；登上淳樸細緻的巴洛克式洋樓，緬懷過去，昔日風華似是擦身而過；經過靜靜的湖泊，享受世外桃源般的景緻。我騎在單車上，時而在馬路上飛馳，輾過路上的樹影，兩旁的植物飛快地往後退；時而轉入羊腸小徑，蟬鳴雖震耳欲聾，但鳥語花香，令人心曠神怡。累了，餓了，我把車停在小店旁，品嚐金門美食，肥美的蚵仔煎令人垂涎欲滴，是我的最愛。

金門路闊車少，單車騎行路線指示清晰，各類車輛司機都禮讓單車使用者，而且道路兩旁繁花似錦，綠樹成蔭，景色優美，令人賞心悅目。一路上清風送爽，頂著湛藍的天空，呼吸著青草的香氣，樂不可支。

夜了，我們住進上百年歷史的古厝，花崗石堆成的牆壁，方形紅磚鋪成的地板，圓木橫樑，雅致小巧的房間，細心佈置的庭院，舒適典雅，真希望這古厝是自己的家。吃過晚飯後，我們坐在前院看星，享受夜裡涼風，大家閒話家常，一日的疲累盡消。翌日清早，吃過古厝主人為我們預備的廣東粥和油條，大家抖擻精神，又再出發到處尋幽探秘。