我地去到福田區，八卦三路既友誼醫院旁邊既單車鋪買左一大輪，然後過馬路去埋汽車配件城繼續買。
其實呢區有好多咩咩城咁架，買家品呀，傢俱呀，玩具呀……咩都有。
買飽後，一行人去左萬象城附近既品村（由萬象城內既omega店行過對面馬路就係架喇）食日式自助餐。呢間我已經去過幾次，好多野食，仲唔會叫完唔黎或者樣樣都話無，d朋友都食得好滿意，每人168人仔埋單，無花無假。一坐低就不斷不停手咁食，食到飽到上額頭。
首先登場既係魚生同埋壽司：
其他既食物，因為小蛇掛住食，所以無影到喇﹗
2011年3月30日 星期三
馬鞍山三寶
馬鞍山有三寶：黃麖、杜鵑、礦石。
上次探過礦洞喇，今次尋杜鵑。
本港共有六種原生杜鵑花品種，分別為毛葉杜鵑、華麗杜鵑、香港杜鵑、羊角杜鵑、南華杜鵑及紅杜鵑（即映山紅），全都可以響馬鞍山山麓上搵到，聽講每年春天，都會花海盛放。
由馬鞍山公園既家樂徑向上行，行到轉右既平路之前，唔轉右而直上，一路行，都見唔到杜鵑，只見到好開揚既沙田同馬鞍山景色。
再繼續沿小路行，景色愈來愈開揚，有好多植物，因為空氣好，所以周圍都係地衣。
杜鵑花就未搵到，不過有好多其他既花。
仲有好多紅葉。
由山上向下望，翠綠叢中幾點紅，好靚﹗
好多植物都響度發緊芽。
行多一陣，見到呢棵石中樹，幾型仔。
再行多一陣，就見到杜鵑喇，不過可能未係時候，得好少，好彩都見到三種杜鵑。
第一種：映山紅
第二種：華麗杜鵑
第三種：香港杜鵑 （呢個品種係香港獨有架）
同場加映：空中海膽
去到一個要直立式向上爬既位，我地就決定打道回府喇，因為下晝仲有其他節目，下次至行上山頂喇﹗
2011年3月28日 星期一
咸濕仔．唔好食．地圖袋
唔好食：
話說屋企有條讀緊幼稚園，瞓覺仲要著尿片既細路B，好聰明醒目。有一日，一家人食緊飯時，阿paul好唔環保咁煲左排翅湯，讀緊中學既肥野夾起梳翅問：「呢d咩黎架？」
我同另一個醒目既家庭成員就梗係用一千零一秒答佢：「好難食架，唔好食呀，俾我啦﹗」搞左一輪，佢當然無中計啦。
之後既某日，我攞住細路B罐奶粉問打緊機既細路B：「BB，請我飲得唔得？」
佢望左我一眼：「唔得。」
我：「我好想飲，好鍾意飲喎﹗」
佢竟然繼續望住個電視：「好難飲架，唔好飲呀﹗」
咸濕仔：
某星期五，我同細路B一齊睇J2既「六舊腹肌拯救隊」，佢睇住沙灘上著住三點式大大個胸既洋妞問我：「點解佢地咁樣既？」
我答佢：「去游水囉﹗」
跟住佢就轉身望左我個身一眼，好似話：「唔對路喎」咁既樣，有d唔滿意又另番個頭過去喇﹗
我將呢件事話俾佢阿媽知啦，佢阿媽話最近同佢行街，佢經過「3D肉蒲團」張立體poster既時候，指住張野同阿媽講：「d姐姐呀﹗」
佢阿爸聽完呢兩單野之後就問佢：「個d姐姐係唔係唔應該咁樣著呀？」
細路B本能咁搖頭，但係響一秒之後發現自己唔應該搖頭，就好尶介咁轉為點頭。
佢阿爸都未笑完，又再問：「佢地啱唔啱呀？」
細路B擺出一個無奈既表情，好無奈咁，好似生意失敗咁搖頭。
地圖袋：
屋企有人問：「喂，邊個識得買地圖袋呀？」
我當然首推路人甲啦。
正當屋企人想再俾多d資料時，有人大聲問：「你講果d係咪佢想買果d呀？」
我：「吓？行山用黎套住張地圖既地圖袋嘛﹗」
屋企人：「唔係呀，係手袋呀﹗」
其他屋企人：「車……宜家邊度仲有人用地圖袋架﹗都out晒啦﹗」
我：「唔怪得我誤會喎﹗」
2011年3月24日 星期四
2011年3月23日 星期三
首次棄權
今日一早去左北潭涌，因為路人甲約左兩位朋友去踩單車，我又跟埋去。
由海下入灣仔
行程：北潭涌－－黃石碼頭－－海下－－灣仔－－北潭涌
特色：斜路、斜路、斜路……
一開始，由禁區入閘踩左唔夠幾分鐘就已經要上斜，未warm up，又好耐無做運動，呢段好辛苦，不斷咁上左3.6公里至開始落斜。
第一站：去左黃石，休息左一陣。
第二站：由黃石入海下。雖然呢段都係上左好多斜路，但係因為warm up左，最唔辛苦。去到阿婆間士多（最尾果間，幫襯左十幾年，d野好食d），食左個lunch。
第三站：由海下入灣仔。抬吓車又踩吓咁，好快就入到灣仔。繞住灣仔半島踩左一個圈，d石仔路令架車重左，上斜好攰，但有一大段又落斜喎。路人甲踩一個圈8分半鐘完成，差唔多係我既三分一既時間，係佢既朋友既二分一既時間，你話啦，佢咁fit，要佢同我一齊踩，佢又成日要等埋我，真慘﹗
第四站：出海下，然後去北潭涌攞車。
我出到海下，就決定唔踩出去，響度等佢地入黎接我，點解？可能好耐無做運動，又病左兩個禮拜，感覺有d攰。雖然我知道我慢慢踩，死頂上去既話，我一定去到北潭涌，但係，我唔想搞到自己咁攰。
第一次，我第一次半途而廢，以前無論點攰都會頂埋落去既，但係今次真係好例外，我第一次棄權就衰左響海下喇﹗
對於自己因為體力同意志既低落而踩唔晒全程，我真係有d唔開心，「放棄」唔係我既作風。快d操番fit先得喇﹗
後來，我地去左大網仔食tea，咁啱路人甲既朋友響度食野，佢地一行十六人，啱啱玩完水。食完野既時候，其中一個女仔走黎問我係咪蛇仔，我當堂嚇一跳，點解有人識我架呢？﹗原來，佢黎過我個blog度睇我d旅行資料。
嘩﹗世界真係細，竟然有陌生人認出我係蛇仔呀﹗
2011年3月20日 星期日
李小龍、告白
睇左兩齣想講吓既戲，今日終於有時間寫喇﹗
李小龍
第一樣要讚既係李治廷，如果有睇making of既話，就會睇到佢由一個周身肉既小肥仔練到真係有肌肉既李小龍模樣，仲學到形神俱似，睇得出佢好用心去演。
另一樣要讚既係佈景，無論係街景(哈哈，又係去我鄉下拍架)抑或係屋企個景，都好認真。
除此之外，個故仔好流暢，但就係欠缺左少少驚喜。值得一睇﹗
告白
無諗過咁好睇。
要講吓幾個人物：老師、疑犯A、疑犯B、疑犯A同B既阿媽、新老師、班長。
片中話因為法律制裁唔到殺佢個女既人，所以老師要自己設計去報復。確實，好多人都以為d細路好純真，但我就唔同意，佢地設既計，扮野既功力，有時真係會嚇呆你。而法律又好保障呢d「小朋友」，致使一d細路錯完再錯。我幾認同阿老師既做法架，佢既無落手落腳去害d疑犯，但又可以令佢地知道自己既錯。連同疑犯A既阿媽，我都覺得佢地既下場係應得既。我一D都唔覺得老師好惡毒，反而我覺得佢好可憐，好無助。
疑犯A係既可憐又可悲既角色，佢殺個女仔全因為佢無朋友。當佢發現俾疑犯B出賣既時候，佢應該係有一種唔理性既報復心理，想向疑犯B報復，不過，佢又唔係真係咁變態殺完人當無野發生。
疑犯B係既可憐又變態既角色，佢當人係一種工具，只對自己個阿媽有種情意結。
疑犯A同B既阿媽都係一般家長既縮影：溺愛、高期望、將自己既慾望投影於自己個仔身上。結果，自己個仔受害囉﹗你睇香港d細路就知啦﹗
新老師係最無辜既角色，佢一心想幫疑犯A，但反而害左佢；一心想教好班學生，但俾老師利用左都唔知。套戲無交代佢既下場，但我估正常既反應係會變得唔正常囉﹗
班長係一個殺人犯，心態好成熟，佢死既其中一個原因係因為佢搶過疑犯B既風頭。
一套戲，短短兩個鐘，可以將幾個角色既複雜心理描寫得詳細而又唔刻意，各人既告白都俾觀眾有驚人既發現，好睇﹗
「胡亂唱」演唱會
好似好耐無打過blog喇，有兩個blog應該一早打既，不過，唔知忙咩，搞到今日至打。
二月尾聽左一個唔係咁多人會喜歡聽但好好聽既演唱會。
去聽呢個演唱會，首先要知道邊個係區新明，要認識邊隊係小島樂隊。哈哈﹗廿幾年前既樂隊，仲要唔係真係好紅既，真係唔係咁多人記得呀﹗
場演唱會響九展既演講廳做，坐唔滿(佢仲留左半個場俾自己友)，但氣氛十分好，全場一齊拍手，一齊唱既位好多，而嘉賓亦好鼎盛﹗在場聽演唱會既演藝人都好多架，我見到劉美君、劉天蘭，阿葛、蔡一傑、幾個商台DJ......
開場既嘉賓係Kolor樂隊，即係唱圍城果隊呀，唱現場非常好。 而區新明唱番好多舊歌，例如：她的心，佢手結他仍然好勁 仍都有唱吓新歌架 最高潮位係 Joey Tang鄧健明(太極), Patrick(太極), Ernest(太極)出場，jam歌，仲唱紅色跑車同埋hotel California添﹗
嘩﹗成晚兩個幾鐘，一陣間就過左，因為實在好聽﹗
@..@註：我細細個就聽佢架喇，hehe!
2011年3月15日 星期二
2011年3月10日 星期四
自製生月禮物
真係好耐好耐無睇過買過投過稿去呢本雜誌喇，早兩三個星期抽起條筋，諗住投吓稿，等佢送份禮物過我，當係生日禮物都好，於是就寫左近半年黎既第一稿喇﹗
最左邊綠色既字唔係我寫架，任何文法上既錯誤，請唔好入我數。
原稿：(註：登出黎果篇，又係俾個老編改左D唔應該改既野，搞到篇野奇奇怪怪咁，而篇幅既關係，篇稿俾老編cut左好多添呀﹗)
攀登世界第一高峰—珠穆朗瑪峰基地營
珠穆朗瑪峰又名額菲爾士峰，是世界第一高峰，要攀上此峰並非常人輕而易舉能做到，如果想接近世界之巔，唯有到尼泊爾去，徒步到額菲爾士峰基地營去，然後前往5545米高的Kala Pattar，近距離欣賞世界第一高峰的美態。
今次的健行路線是尼泊爾的額菲爾士峰路線，從尼泊爾首都加德滿都飛往2800m高的Lukla，然後沿上山方向經Namche到Gorak Shep，然後以這裡作短暫基地，步行往額菲爾士峰基地營和5545m高的Kala Pattar。我們可以在Kala Pattar360度環視世界上最高的幾座雪山，然後步過白雪嵦嵦的Cho la pass(溢口/山坳)，到達Gokyo，然後開始下山，沿河谷返回Namche，再返到Lukla，完成十六天登山之旅。
本來，我們預計的行程為十八天，但當到過Kala Pattar後，同伴出現感冒徵狀，，所以，我們決定早兩天下山。當我們返回Lukla等飛機返回加德滿都那天，卻遇上天雨，飛機停飛。始終，Lukla是世界上最危險的機場之一，那條跑道短得可憐，四周又是高山，稍一遇到下雨、大霧、密雲，機場都會停開。
登山全程共十六天，除了一天為休息日外，我們行足十五天，每天最少徒步四小時，其中好幾天都要在海拔四千米以上健行。我們都曾經出現輕微的高山反應，幸好都安然無恙。今次行程上有四個重要地點，包括：Everest base camp, Kala Pattar, Chola Pass和Gokyo Ri。我們完成了三個。Everest base camp(5364m)是我們朝聖的地方，對於一個喜愛登山，喜愛高山的人來說，世界最高峰是夢寐以求的地方，但那裡實在不是普通人可以隨便去的，退而求其次，到基地營一看也是一種極高興的經驗。Kala Pattar(5545m)是一座位置很好的山峰，當你爬到頂峰時，世界最著名的幾座雪山就環繞在你身邊，而且，這裡也是我們今次旅程的最高點。Chola Pass(5330m)是山峰Cholatse(6335m)的山坳，這裡白雪嵦嵦，風景一絕，而且，我們必須攀過這裡才能到達Gokyo。Gokyo(4790m)有三個小湖，到這裡的其中一個目的是登上Gokyo Ri(5360m)看山景和湖景，它是我們的第四個目標，可惜未能達成。
這是我出外旅行的經歷中最辛苦的一次，既要每天健行，又要在設備不足的山區生活十幾天，而且，我並非運動健將，登山達人，也從未試過連續健行十幾天，這次健行實在是一個考驗。若然你問我這是值得嗎？我絕對會答你，這很值得。這種登山經驗，雖不算是什麼稀奇少有的旅行經驗，且見登山路上有成千上萬的登山者絡繹不絕的來來往往便知道了，但親身的體驗是不能言傳的，而且，能登上五千多米的高峰，親近世界第一高峰，親身感受被超過六千米的群山環抱的經驗，這種經驗真的彌足珍貴。
健行注意事項：
1. 在山路上遇上牛隊、馬隊或porters，你應該靠山邊站，不要站在崖邊，免得被他們意外地把你推下去。
2. 山中物價高企，你應該帶備充足的日用必需品，反正是porter替你拿，不要怕重。
3. 要有心理準備會有多天不洗澡的情況，所以帶備抹面紙，濕紙巾或小毛巾，但求可以抹一抹身和面，心理上好過一點。
4. 路上沙塵滾滾，最好帶備幪面手帕或頭巾幪面，而且，頭巾亦可在你多天沒洗頭的情況下替你遮醜呢﹗
5. 山上氣溫甚低(早上會是零下幾度啊﹗)，必需帶備足夠禦寒衣物。
6. 山上所有lodge(我曾光顧的)所提供的膳食都很美味，而且，食物種類不算少，基本上可以不帶大量乾糧。
7. 在尼泊爾Solukhumbu地區的健行路線吃肉是有風險的，因為佛教徒不會隨便宰殺家禽或家畜，宰殺動物是有指定地點的，而大部分肉類都是由加德滿都運來的，肉類的新鮮度可想而知。當我看過在Namche的肉類市場內出售的發黑牛肉後，我真的不敢在這兒吃肉。我會忍到返回加德滿都才吃。
8. 當你的飛機在Lukla降落時，已是海拔二千八百多米，而且氣溫會隨著海拔愈高而愈低，一些防高山反應藥物(例如：diamox)和感冒或頭痛藥是必備的。
9. 遇上出現高山反應(AMS)不止，不應勉強繼續向上爬升，應該走回較低海拔停留，直至不再出現高山反應才繼續行程。
10. 山上的飲食不算便宜，如果你是大胃王，最好在點菜時點daal bhaat(發音：da6 bag)。它是一種尼泊爾印度人食用的米飯，裡面有扁豆湯和咖哩蔬菜，其中的湯和飯是可添加的。
11. 尼泊爾政府規定，導遊的日薪為USD20，porter的日薪是USD15。當你完成健行時，最好以他們的日薪X15%X日數，作為tips。當然，尼泊爾的物價升得快過人仔，此為參考日薪。
12. 海拔愈高的地區，天氣愈乾燥，必需帶備潤膚乳液和潤唇膏，另外，亦應帶備一些滋潤的飲品沖劑。健行期間，你會長期暴露於陽光之下，必需做足一切防曬措施。
13. 健行期間，多飲水是必需的，而水的價格會隨海拔愈高而愈貴。你在山中除了可購買煲滾的熱水外，亦可買膠樽裝礦泉水，但礦泉水比較不環保而且昂貴，我覺得煲滾的熱水已很好。而且，盛滿一樽熱水，夜裡睡覺時便可當熱水袋使用，一物兩用。我在途中曾見過有人用UV殺菌燈，但這支燈價值過千元，而且你不會得到熱燙燙的飲用水。
14. 在Everest地區健行，你會經常在路上遇到一大塊或一大堆刻有經文的石頭(這些經文只有僧人才懂)或佛塔，這時，你必須順時針(即在它們的左邊)走過去。這是藏傳佛教的禮節，你可不跟隨，但入鄉隨俗也是一種尊重。
15. 在山中，連叉電也要付款，而且是每小時計算的，我見過最貴的是Rs350(約HKD40)一小時，如果叉電腦的電池則更貴。所以，帶備足夠電池，或在上山前盡量把所有電池叉滿，或盡量不要在Namche以後叉電，因為過了Namche，叉電費將愈來愈貴。
16. Lukla天氣經常不穩，機場常因天氣關係而關閉，所以，不要緊接著安排國際航班，否則，你會有機會錯過飛返你家鄉的班機。
17. 山中健行，因要做acclamatization，所以每天健行時間不會很長，一般四至六小時，其餘時間除了吃和瞓之外，就是等。你最好帶一些小玩意兒或書本來解悶。
珠穆朗瑪峰補充資料：
1. 交通
由香港飛往尼泊爾首都—加德滿都，只有兩間航空公司提供服務，分別為港龍航空(中途需停站)，尼泊爾航空公司(直航，卻較便宜)。雙程票價大約在四千多至五千多港元之間。航行時間大約2小時30分鐘。
由加德滿都乘內陸機到Lukla，有多間當地航空公司提供服務，雙程票價約為港幣二千元。航行時間大約30分鐘。
2. 住宿
旅館遍佈於加德滿都遊客集中地Thamel區內，可看過房間質素後才決定入住。收費US15一晚的標準間已經又乾淨又舒適了，如果想住得更加高級，可試試US30一晚的住宿。
山上的住宿大約在US3-US10不等，如果客滿，隨時會現場加價。
3. 行程
Day 1 香港—加德滿都
Day 2 準備上山物資、聯絡登山導遊公司、遊覽Thamel區
Day 3 早機飛往Lukla(山區早上的天氣通常較穩定)，午餐後開始登山
Day 4-18 登山(登山公司會為客人安排登山路線，路線大同小異，視乎登山者的體力及登山日數而定。這條登山路線已經發展得非常成熟，如不光顧登山公司，自行前往亦可。)
Day 19 於Lukla乘飛機返回加德滿都
Day 20 遊Thamel區及Patan(古城)兩個Durbar Square及猴廟
Day 21 遊Pashupatinath(看印度教徒火葬禮)及Boudha(佛塔)
Day 22 Bhaktapur(古城)一日遊，返港
4. 兌換率：US1: Rupees70
5. 時差：尼泊爾時間比香港時間慢2小時15分鐘。
6. 登山季節：登珠穆朗瑪峰基地營路線最佳月份為4月，其次是10月。
2011年3月9日 星期三
訂閱：
文章 (Atom)