蛇竇: 7月 2010

2010年7月29日星期四

自製小簿簿

今日又得閒留響蛇竇，搵d野玩吓先﹗

路人甲尋晚話唔要件恤衫喇，又有d色紙，搵番上次監考時同事打算掉但係俾我拾番既硬卡紙，材料差唔多喇﹗開工。

將d色紙對摺左，用線縫好，再就住d色紙既大細切好d硬卡紙，然後剪埋路人甲件恤衫。

查好晒白膠漿，貼好晒，色紙用夾固定一下個位。

響封面裡面加上另一張(人地唔要既)紙遮住d帶口位，再貼上固定好位置既色紙。

搞掂，又有新簿用喇﹗

2010年7月28日星期三

旅遊書

去旅行少不免要帶本旅遊書旁身，但係我發覺宜家搵到既香港出版既旅遊書，都係好空洞既。佢地都係圖多過字，歷史欠奉，感情欠奉，似相簿，似blog，似一本攻略，係香港既讀者要求低，抑或d編輯要求低呢？奇怪既係，呢d作者出完一本又一本，似乎有市場喎﹗

睇過好多本旅遊書，作者都係去左八日十日就話出本書；去一個國家既一兩個城市又話出書；影一大堆相，每兩頁加上一二百字，砌砌埋埋就叫做一本書。講真，似我自己整果d旅行相簿囉﹗

外國既甚至內地既旅遊書，質素比香港出版既高好多班，無論景點數量既豐富度，資料既準確度，行程建議既可信度都好有份量。反觀香港既旅遊書，只能用兩個詞語四隻字黎形容：「自我、兒戲」。

每當去旅行前，我都會去睇吓書，香港既旅遊書，我從來只會用睇blog既態度去望吓，因為，如果想搵資料既話，通常都係「無」，尤其是當地既文化同歷史方面。

今年書展，發現兩本好書，一邊睇一邊好似有個好有學問既朋友響你耳邊不斷講當地既故事俾你知一樣，內容充實，文字精煉，寫來生動，非時下作者能及。

劉天賜既《旅途說書人》論盡多國史事及景點見聞；《大眼看倫敦》集中倫敦既時、史、事，睇完對呢個地方了解深左十八層呀﹗

*所以話呢，做作家，有d係有錢無地方洗，自資出品，有錢就有書；有d係因為有名氣，無論識唔識字都可以出完一本又一本；有d就係識人，同出版社有d關係，識寫吓野，又奇怪地有讀者喎，咁就繼續作家落去，一個唔覺意仲可能紅埋添﹗

有料既作家又未必有飯開喎﹗世事就係咁得意架喇﹗

嶺南派山水畫(第十三堂畫雁來紅)

上次畫完幅天竺子，攞返去俾老師睇，老師話d果太少，叫我再加，哈哈，我畫既時候，仲俾朋友話我畫得太多，叫我收手添﹗

今次呢幅好易幅，老師話都要教番一幅可以俾我地即席揮毫，扮吓勁先得既﹗

雖然話易，但係都要諗吓d位點放，都係唔易﹗

2010年7月25日星期日

Toy Story 3

第一、二集我都有睇，不過，今集最好睇﹗

今集都係講一班玩具既冒險故事啦，不過重點響被離棄同離棄上面。玩具主人長大左，自己就唔會再玩玩具，但係，點樣處置d玩具先至係最上策呢？點樣先至會令玩具既本身價值響番度呢？被離棄所產生既負面情緒既破壞力又有幾強呢？

玩具既主人本身就唔想放棄d玩具，但係隨住時間過去，人會變，包括人既需要都會變。新買番黎既玩具d細路通常都唔肯同人share，但玩得兩吓放左響櫃底不見天日；細個時當寶既玩具，大個左會當垃圾。唔好話d細路對玩具係咁啦，成年人對人都係咁啦﹗

大佬熊人因為被離棄，所以變左奸角，後來講到d手下變番忠，改邪歸正，我就覺得班手下本身就係奸架啦，唔會無左個大佬就變番好玩具呀﹗

睇呢套戲意外地令我諗起湊大我既婆婆，d玩具就好似代表左佢咁。曾經一齊生活過，感情一定好好架，到必須要分別時，就算唔捨得都要分開，關鍵係響分開之前有無好好地尊重佢，令佢離開得舒舒服服，開開心心﹗估唔到卡通片都咁感人﹗

*所以，我唔明白點解咁多阿媽唔俾心機湊自己d小朋友，有d經濟上有能力既媽媽都係寧願返工，請個菲傭姐姐就算數。細路仔係要陪架，佢雖然只當工人姐姐係工人，但係人係有感情架，你三兩年就換一個工人，即係培養緊個小朋友「無情」囉，細路仔細個時，邊個同佢相處得最多，影響就最大，感情亦最深，現代媽媽真係唔明？

我記得張國榮有個六姐囉﹗

收穫都幾豐富

原來識寫字真係有著數架﹗

由開左呢個blog開始計，我都因為寫吓野，影吓相，攞到唔少禮物喎，等我家陣得閒無聊統計吓先：

小童群益會徵文比賽：獎座、書一本

中國旅遊(文字稿)三期：三本《中國旅遊》雜誌，稿費每期$100

中國旅遊(相片)三期：三本《中國旅遊》雜誌

am730九份稿件：每份$100

U Magazine六期：Goretex帽5頂，Goretex旅行袋一個，1對$1000Goretex鞋，2張Timberland＄500現金券、水壺，電筒，立立雜雜

澳門相片徵集：來回澳門船票一套

旅遊寫作比賽：背囊一個，旅行毛巾一條

本地旅遊相片比賽：模型飛機一座，日語課程四堂

國泰航空love HK徵文比賽：來回日本機票一套

除此之外，間中都有d運氣架，例如去左個旅遊講座就中左兩本旅遊書喇﹗

送別禮物

退休喇﹗退休喇﹗

同事歡送我既禮物，係一個好實用既焗爐：

仲有中文科阿頭送既自製鎖匙扣，好靚呀﹗

仲有分別來自三組好朋友送既心意卡。

多謝咁多位同事﹗你地要繼續頂住呀﹗我知好難頂，不過，為左份糧(為第二d野既話，走得架lu喎)，頂硬上啦﹗

講真，辭職，真係好開心，唔洗再響一間管理得不知所謂既學校度過日子，有d似放監。但係，有d朋友話：你理得佢點管唧，咪鬼理佢，教完書改完簿咪放工囉﹗

哈哈﹗我唔得，攞黎賤﹗

比較熟既同事好早就已經知我唔想做架喇，大家有晒心理準備我會離開；其他同事呢，有d就算共事左十幾年，都無祝福一句，哈哈，鬼叫我平時鬼咁有性格咩，對住d我唔like既人時，就算唔得罪人都經常黑面；至於學生呢，我不嬲都唔講私事既，無通知任何一個學生，不過當然亦一定有同事爆響口啦，聽到我走既消息，最開心既莫過於d成日死蛇懶鱔又經常俾我串俾我鬧到八彩既學生啦﹗

今次提早收工，真係要多謝果位林校長，響佢既迫逼下，我都唔洗食藥或者住醫院，真幸運；另外亦都要多謝另一位校長啦，我家陣去旅行唔洗申請，幾時去都得，幾好呀，上次令佢要響佢d熟既下屬面前歪曲事實，將我變成傻瓜，搞到我唔見千幾銀，真係難為佢喇﹗

當然，最真心想多謝既係路人甲啦，佢一直響任何一方面都支持我，俾我好多好好既意見，多謝晒﹗

生日cookies

星期六，英國個姨甥女話想幫阿paul同david哥仲有英國肥師奶搞生日會，姨甥女叫我整蛋糕，呀~~~~我都想整，但係咩用具都無，間家政室又俾人拆左，所以拒絕左佢喇﹗但係，有咩野可以整到呢？

諗吓諗吓，路人甲個細妹send左個sms俾我，話路人甲媽咪星期六生日，想一齊食餐生日飯，咁就麻煩喇﹗

結果，我整左好多cookies，叫路人甲拎去食生日飯，我就返david哥屋企開生日會，搞掂﹗

之但係，咩用具都無，得個焗爐，唯有整住d簡易版cookies先啦﹗

牛油50g，糖50g，搞成漿狀

加一茶匙發粉，另外可加綠茶粉或朱古力粉

加埋麵粉100g，拌勻成粉糰，分幾份，放入焗爐焗10分鐘

搞掂

完成

響深水埗買左d袋仔，禮物盒呀，整靚d，送俾人。路人甲成日話我d野好食，不過唔肯包裝，唔夠色香味俱全，今次無野講lu卦﹗

味道方面，路人甲話：好鬆脆(剛出爐時)，甜道唔錯，牛油唔夠香，有d似光蘇餅(我頂﹗)。阿paul話：好香好有蛋香。阿david哥話：好味﹗

其他人呢，因為生日會勁多蛋糕，又食得好飽，無人食我d cookies，唉﹗路人甲果邊呢，佢媽咪拎左cookies返屋企，未有答案﹗

2010年7月23日星期五

咩野季軍呀？

今日由屋企行左出去墟買餸，本來都想行番屋企架，不過怕條魚有事，所以搭左車返屋企。

一返到屋企就收到個email，話我參加左個咩u magazine既咩咩咩比賽，得到季軍。

吓？咩呀？咩黎呀？諗唔起……一定係唔知幾時亂篤過張相上去，邊張呢？記唔起﹗

有興趣就入去睇吓啦：本地遊相片組季軍

獎品係：羽絨外套同日語高班課程

好野，終於有件正正經經既羽絨喇﹗我平時著去旅行既羽絨，一係係假野，一係就係借番黎既，無件係正正經經自己既，今次終於有喇﹗但係…… 點解係日語高班課程架？雖然我想學日文，但係，拼音都未識喎，點讀高班呀？咪玩啦﹗

講開又講，呢本雜誌仲爭我兩對鞋喎﹗

2010年7月22日星期四

第二次深水埗exploration

今朝一早去左睇toy story 3，超正﹗然後就去左深水埗。

以前成日陪路人甲黎深水埗，但係都係局限於鴨察街、黃金同高登。今次，係呢兩個星期內第二次黎深水埗探索。上次係約左個靚靚ex實習老師一齊去做decoupage，我見未夠鐘就一條友周圍走，響汝州街行左個圈，買左少少野，俾巴基斯坦男人撩左幾次﹗今次同路人甲行福榮街睇玩具。

深水埗，真係好多寶架，睇到我地兩個不知幾高興﹗其中一間叫「黃記尋寶城」，係一間夜冷鋪，即係我同路人甲好鍾意行既窮人鋪頭。一行入去就聽到有收音機響度播歌，開頭以為CR2又玩野，播d鬼五馬六既歌，點知，聽清楚，係唱緊尋寶城呀，係老細自己錄架，唱完之後仲要有五種語言(中、英、普、印巴、菲)呼籲顧客唔好掉垃圾呀﹗超頂癮﹗

行吓行吓，行到黑雨，被迫搵地方坐，等雨停，經過路人甲冒雨探路，我地揀左呢間好有特色，d野又好食既「公和」。