水浪窩--嶂上--北潭拗(續)

十點開始行，四點就行完喇，中間仲係咁hea，easy trip, enjoyed very much!

因為知道會有時間hea，所以帶埋本書去預備一下聖誕節個行程，呢塊嶂上草地真舒服﹗

我鍾意呢張，he﹗

水浪窩--嶂上--北潭拗

呢日，大煙霞，本來上到岩頭山風景勁好，可惜太濛，全程就練習用微距，大光圈。

testing testing，一早第一張，未瞓醒﹗

篤個鏡頭入朵花花中間，實在係我既嗜好呀﹗

jelly狀小花，好得意。

小草，咁大風你都中焦，你不幸，我幸運﹗

花蕊，你都中左焦喇﹗

阿叔正在慢駛中。

呢d都係花花呀﹗

香港都有紅葉。

呢張玩吓blog裡面既油畫效果，唔係太突出。

蘇哥打燈打得咁靚，唔影就假喇﹗不過，響呢度睇，個效果一般，響屋企睇，真係好靚，真係要講聲thanks God.

待續......

唔做慳番

面書：罰你就係衰人，唔罰唔鬧，大家hehe哈哈就係好老師，大佬，罰你都要時間同精神架，我做咩犯賤呢？自己又辛苦，學生又覺得你衰，仲俾說話你聽﹗交吓行貨咪算囉，人心當狗肺......

回應：呢細路係咁架啦，唔鬧佢既就係好人，尤其是新一代，又唔話得，又唔鬧得，又唔識得尊重人，咩嘢都以為自己啱哂！

面書：做左野既老師就乞人憎，唔做野個d就得人鍾意，搞到宜家d學生無大無細，無責任感，無承擔，無禮貌，無是無非，無自省，無交帶，只有任意莽為﹗我收佢份功課收左三日都收唔到，留堂抄野，係我多餘；補默補測，係我煩；留書要罰抄，係我衰；咩都係老師唔啱，仲要俾說話我聽﹗我就快講粗口「媽」爆佢地架喇﹗

回應：依家D細路..太多資訊喇...好識同你講權利，但唔識咩叫義務！咩都淨係識取得最大利益，但就唔知背後o既付出，真係好人都激壞呀..
你算好野架喇！如果我做老師，可能開學頭一個星期就已經變為殺人犯！

回應：好多大人／新聞／媒體都不停話俾後生聽如何搵快錢；邊個邊個炒乜炒物短期獲利幾多倍。好自然後生都會發現原來急功近利先係“正途”／“出路”，又點會覺得需要付出呢！！ 可悲！！

面書：我都驚我有日會打巴佢地呀﹗
我都開始懷疑「做野係唔需要付出」係啱架﹗以為對住d細佬唔同對住d大人，你俾個心出黎，佢地會知道你對佢好，但係，原來，宜家d細路十二三歲就已經係大人黎架喇，仲會用你對佢好既野黎「嘲諷」吓你，你嬲咩？﹗佢仲開心。我嬲唔出，只係覺得有d心淡囉﹗連細路都係咁，呢度真係社會既縮影﹗何處有烏托邦？

結論：唔做，慳番﹗

 

 

奧比斯夜行20km

十幾廿年黎第一次通頂，「通頂」呢個詞語真係好耐無用過喇﹗

今次係由沙田運動場行去大尾督停機坪，一共20km，由十二點幾行到四點幾，話就話行石屎路，行平路，但快行都攰架﹗

睇相：

出發既會場好多人

大會派左好多禮物，呢個係其中一個，用黎玩既﹗

你睇我幾精神﹗

出發前黎張大合照先﹗

有人參加造型比賽，呢set啤牌都幾有趣，仲有其他架，懶影﹗

傾吓等吓，好快就等到我地出發喇﹗

大會派既其中一份小禮物－－印水紙。細個成日玩既野，今日竟然唔記得左點整，唉﹗

個罩係用黎咁樣玩既﹗

「媽媽，我尋晚起身去夜尿時，我見鬼呀﹗我見到樓下個公園有好多人，有d人排住隊搭住膊頭，有d係啤牌人，有d人一個一個咁行，成個公園都係呀﹗我好驚呀﹗」

黑爸爸的夜景﹗

埋嘲﹗

個backdrop咁拎，梗係影番張啦，不過，都要排隊﹗

有證書添呀﹗

途中，我地收到大會一路派既小食，例如：M&M、朱古力餅，芝士餅乾、糖、旺旺、益達香口珠，食到好開心﹗仲有好多水供應，早知咁充足，我自己唔洗帶啦﹗影完埋嘲相之後，食埋大會供應既雙併三文治同飲品後，我就獨自坐大會既車出大埔再轉的士返屋企瞓喇﹗而路人甲呢，佢就順腳行返公司行張椅瞓三粒鐘，夠鐘就開工﹗

＊多謝贊助我既朋友仔，多謝晒﹗

抄家

最近學校全校都要查簿，抄家一樣，大家死命做、做、做......晚晚八九點至放工。好憎限時限候要我交咁多野，做到發忟憎，幾時先收工呀？﹗去旅行，去旅行，我要秋天都可以去旅行(唸咒中)。

做到short左﹗

中文房最近趕貨(其實不嬲都趕架喇，只係最近特別趕)，唔知係咪咁樣，有同事short左﹗

今日，中五要出練習，同事O預備左一疊資料，同事C見要幫手，就話：「趕貨無辦法啦，剪貼都唔緊要啦﹗」於是就攞支漿糊筆出黎起勢查喇﹗

兩秒後，同事O見狀：「你支……潤唇膏……」

同事C：「你要潤唇膏呀？攞去喇﹗」然後作狀遞俾同事O，有d串串貢味道。

同事O：「唔係喎，你支係潤唇膏黎架喎。」

同事C仍對自己支漿糊筆好有信心：「我響櫃桶度攞架。」然後將手上面查左「漿糊」既紙貼上練習度。

同事C終於發現，潤唇膏係痴唔到野架……﹗

我坐響附近就梗爆笑啦，佢除左老點全個中文科一人攞起一張傳閱文件後，又一傑作，真係SHORT鬼左﹗

 

**其實如果調轉黎，以為漿糊筆係潤唇膏應該更搞笑，呀……應該幾潤。