電台廣播補充版(一)

上個星期去CR2「西加航空」度錄音，錄左約40分鐘，我諗cut cut埋埋可能淨番好少，而且我仲有好多野未講架，答謝茜嘉d問題又答得唔係咁好喎﹗

為左可以吸引多d人去巴基斯坦玩，我要補充一下：

1.巴基斯坦係被群山環繞既國家，d山下下都成六千幾七千米以上，好多人喜歡去登山。我響節目所講既行山，其實真係行下山架咋，只不過d山路唔同香港，好直，好多碎石，好難知道邊條至係路，但如果你響香港行到南蛇尖，應該好易應付到。我因為有畏高，所以覺得難，但體力上仍可以應付。至於登山呢，d人會去skadu，去k2 base camp，呢d就玩得比較pro，並非一般遊客去架喇﹗我地行左既fairy meadow同ulter meadow都好靚，二揀一既話，我會揀fairy meadow。個度有好多小木屋留宿，無電(好似話會整)，好好氣氛，可以有camp fire，又可以入小屋個common room蓆地而坐傾下計，而且有世界第九高既nanga parbat日日對住你，坐響大草地，欣賞大雪山，食下燭光晚餐，一個字：「正」﹗

2.飲食方面，我成日都唔記得講下佢地d芒果汁，好濃芒果味，而且為起都係兩蚊港紙一大杯，抵到賴呀﹗其實響香港我都食過巴國既芒果，已經覺得超香，比呂宋芒更好味，響元朗間石崗咖喱屋有售，只限6-9月，有買快手喇﹗仲有就係薄餅啦，原來薄餅係有咁多款式架，我響巴國十幾日已經食過甜既、咸既、薄既、厚既、脆既、混有豆蓉既、混有薯蓉既、辛辣既......好正，唔怪得佢地當飯食啦﹗巴國既食物個樣唔靚，但係食落好好食，所以返到香港我都走左去葵涌個頭搵食-穆斯林餐廳。另外，佢地係無酒飲架，因為宗教關係囉﹗

3.guide book方面，真係搵唔到中文，唯有借左本八幾年既lonely planet，其實已經出左最新version，不過好貴，我覺得啦﹗最頂癮既係，路人甲其實響九幾年去過巴國登山，佢有本好似旅遊日誌咁既旅遊書，係八六年出版既，但係除左車資同時間表、兌換率唔同之外，其他野幾乎一模一樣，即是話巴國既旅遊發展真係好慢，亦即是話你可以睇到好多野既原貌，唔似有d地方發展到旅遊城市咁喇﹗

待續......