告佢唔到

早幾日同屋企人傾開計，講開宜家d細路好難教，打又唔打得，唔知點教好，令我諗起有一次有個學生同我傾計既內容：

學生：「唉﹗Miss，d警察都唔知點做野架﹗」

我：「咩事呀？你俾人偷野呀？」

學生：「唔係呀，早幾日同老豆響屋企打交，我咪報警囉﹗」

我：「你報警？」

學生：「係呀﹗佢打我喎﹗不過無用啦﹗」

我：「點解呀？」

學生：「d警察話我無傷痕，我老豆仲傷過我﹗」

我：「咁警察唔告你既？」

學生：「個廢人話自己無事吖嘛﹗下次再打我，我實整到告入佢架。」

我：「你有咩方法呀？」

學生望下我笑左一下就走左喇﹗宜家佢已經無返學lu，去左學番一門手藝，但係同老豆既關係仍然好差。佢老豆似乎幾緊張佢架，不過個細路成日覺得個老豆對阿媽唔好，出面又有個女人，所以好憎佢老豆。

其實，佢做左老豆既本份既話，成年人既感情生活，做仔女既就唔好理咁多啦，咪等d阿媽阿爸自己搞掂佢囉；至於對阿媽唔好呢層，細路，你又知幾多，識幾多呀？我覺得作為子女，唔好理老豆係點，佢做左老豆呢個角色既本份，你就要好好孝順佢，佢同其他人既恩恩怨怨，到你大個有一定既生活經歷先去理，至去判斷啦﹗