港女

頭先睇完星期日檔案，講港女，於是走去上網搵下d資料，睇下d人點講啦，點知見到呢篇野，幾搞鬼：

香港女仔 - 求偶篇，品性篇，因果篇，結婚篇(懲戒男！)

求偶編

擇偶要求卻不低 潘驢鄧小閒有齊
首先樣貌要靚仔 最好加隻大頭龜
兼夾仲要你有米 為佢屈膝做奴隸
膽大之餘心要細 少咁一瓣都唔制
問佢有咩咁矜貴 佢話呢個係行規
不論自己咩身世 都要嫁個金龜婿
平時扮到好高貴 自我中心似皇帝
男友想同佢曳曳 掂下佢都鬼食泥
點知一見有錢仔 寬衣解帶冇問題
就是趨炎也附勢 邊個有米認老細
始終都係一隻雞 問佢點解咁虛偽
佢話良禽擇木棲 做雞都係貴妃雞

品性編

港女學歷並不低 就讀調理農務系
炒蝦拆蟹失控制 可謂知書不識禮
社會視野甚狹隘 不知人間是何世
明星潮流做話題 一講時事將口閉
年紀已經唔係細 仲成身哈囉吉蒂
幾個八婆圍委喂 細聲講時大聲嘶
做下運動發軟蹄 Shopping佢又甚堅毅
唯一專長狂消費 千金散盡有造詣

因果編

祖國佳麗殺到黎 事必將其眼眉剃
天使魔鬼混合體 風情堪與月爭輝
媚目流盼勾魂勢 教人如何不著迷
港女自負又貪威 口講當然冇問題
卻又將人來詆譭 話人貪錢話人雞
只懂一味大聲吠 出言句句見污穢
把口彷彿生熱痱 腥臭薰天倒人胃
試圖築起防波堤 可惜眼高卻手低
靠嚇從來非上計 誰會聽你來指揮
港女威名響國際 北上已成大趨勢

結婚編

溝著佢地真濕滯 註定被人當契弟
喜怒無常難預計 口是心非真弔詭
近則不遜遠則啼 孔聖都話冇眼睇
婚書一簽無路歸 畢生武功從此廢
力拔山兮氣蓋世 時不利兮騅不逝
每朝出門要宣誓 夜歸例必被照肺
惡獅爪下如螻蟻 苟且偷生甚悲悽
終於難以再維繫 忍無可忍欲分妻
又要大筆贍養費 帳單一出心膽悸
養虎為患來自斃 試問誰敢娶為妻

讀後感：

呢篇應該係港男作架啦，太偏激喇，我都識好多女仔唔理個男仔有無錢既，而且要求男友做既野都係合理既。不過，我都認同有d女仔太粗口，尤其是細個果d，又唔睇新聞，淨係知邊個邊個明星做咩。有好多女仔年紀唔細仲鍾意扮cute，扮後生都唔緊要，始終人人都想睇起黎青春d既，但係cute就確係好難頂既。我去做gym時，成日都見到d女仔唔係黎做運動架，黎傾計同散步，仲有d係黎撩d教練既。

呢d港女都只不過係一部份啫，港男咪一樣有好多見識少、大大聲扮有料、唔出聲扮奧妙、幫個女友攞手袋、書唔睇斎打機、個袋吊隻小熊維利、初相識送你返屋企，識多兩日就呃你返佢屋企、問佢對貝羅齊爾（巴基斯坦前總理）有咩睇法，佢問番你佢係邊隊波......一樣米養百樣人，我深信港女都有好質素既，呢d投訴港女既男人係咪本身質素都有問題，先至會識到d咁差質素既港女呀？又唔見我同我d朋友係咁﹗