廣州行街街

難得路人甲有兩日假期，於是上左一趟廣州行街街，行到腳軟﹗

第一日響屋企食埋早餐至施施然坐車去深圳轉坐和諧號（單程人仔80蚊），坐左一個鐘和諧號舒舒服服就到左廣州東站，然後轉坐地鐵1號線去公園前站（人仔4蚊）。

第一站：北京路。

其實都係行吓架咋，同埋要去石室教堂嘛﹗

北京路古道遺址

百年古廟

八珍豬紅粥＋餃子，正﹗

海珠橋

石室教堂，好靚，仲以為自己去左歐洲，剛好陽光映入教堂，透過七彩既玻璃，真係一個字：靚﹗

影左太多喇，是但放兩張上黎算啦﹗

第二站：一路行去上下九，目的係食野﹗

南信甜品，非常正，仲幾平﹗

再行多一陣，又係時候食野喇，今次食陳添記魚皮，超爽，響香港好少有得食，如果少d豉油仲好。不過，佢d腸粉同粥就一般唧﹗

食完，行去沙面旁影吓夜景﹗

真係行到攰喇，坐左兩個站巴士去珠江邊影相。因為亞運既原故，廣州宜家好乾淨好靚，d屋巴外牆油過晒油，搞到我好似去左迪迪尼，行緊條美國大街咁，珠江就著晒燈，連行人路都用大光燈，行行吓又有大光燈打正塊面，影人唔洗打燈都影得好靚呀﹗

仲可以坐船遊珠江，我地無坐呀，沿珠江邊行吓，不知幾好﹗

好遙遠地有支紅紅地色既建築物就係電視塔喇，我地無去呀，今次主攻荔灣、越秀同沙面咋﹗

完成今日既行程，坐兩個站地鐵去左芳村按摩（人仔128蚊按中式90分鐘），瞓埋，第二朝再玩過。