柬埔寨金邊（一）

1／1／2010，今日1000響酒店附近既售票處上左車去巴士總站搭巴士去金邊。我地搭capitol open tour既車，車費US5一人個人。架車每兩小時就會停一停，俾人落車食吓野去吓廁所。

1630，坐左六個鐘，終於到喇，行去guesthouse放低d野，就坐tuk tuk去皇宮沿河行吓。金邊雖然係柬埔寨既首都，但係發展得似乎比較慢，就好似三十年前既廣州咁樣。

我地去到時，剛開始日落，d人坐晒響河邊個廣場，雖然地方唔大，都幾有悠閒既感覺架﹗

附近係酒店酒吧區，我地食完野就行返guesthouse，點知要行成個鐘至到。呢個係途中一個roundabout既塔，係Independence Monument，為紀念1953年柬埔寨脫離法國控制正式成為獨立國家而建既，獨立日係11月9日。

2／1／2010，今朝包左架tuk tuk，US8一個人，包去palace, S21 museum, killing fields, 機場，抵啦﹗

第一站，皇宮。入場費US6，好貴。

我真係未見過呢種樹，會唔會係傳說中既菩提樹呢？朵花大過我個拳頭。

感覺上，同泰國既皇宮非常相似。其實，柬埔寨、越南、寮國、泰國、緬甸響好多方面都好相似既﹗

皇宮裡面既壁畫，唔算好靚，但好細緻，幾好睇﹗係由皇宮建築師率領40位藝術家繪製印度神話Ramayana故事既壁畫。

第二站：S21博物館，正名：Tuol Sleng Genocide Museum，入場費US2。呢度係當年赤柬既監獄，本來係一間學校黎架。裡面多數係一d相片，可能之前睇過人地d blog，寫到呢度好精彩咁，睇完之後，我諗係我期望太高喇﹗不過，都係一個值得一到既地方黎既，起碼幫我認識左唔少柬埔寨內戰既史實，亦俾我認清其實中國人先至係最殘忍既民族，日本人先至係最變態既人種。點解又關中國人同日本人事？其實係，呢度不斷話俾你聽赤柬點樣殘殺d人民。我曾經去過南京既南京大屠殺博物館、德國既集中營、其他有關文化大革命既展覽，其中，文化大革命既精神虐待係「前無古人，後無來者」既；日本仔打中國時既滿目瘡痍，相信比柬埔寨內戰慘烈百倍。

我一路行一路諗：如果響一九零幾年出生，又生響中國，就真係不幸喇﹗經歷完清末民初既亂，再打國共內戰，然後黎個二次大戰，再繼續未打完既內戰，跟住整多劑文化大革命，仲有命既話，每日都會抱住要走難既態度生活，實在好容易理解呀﹗呢一代既人實在係生出黎捱架，宜家大陸起飛喇，呢班響最亂時期生活既人就長埋黃土，無份享受。以前中史老師教，中國歷史通常二百零年一個周期，宜家應該係響個周期既開始lu卦？﹗

活到今時今日，仲唔信個世界係圓既，世事係不斷循環既？

 

最後被發現既被殺屍體，就埋響呢度俾人憑弔喇﹗

單獨監禁既監獄，地下果d應該係洗唔去既血跡。

以前d學生用黎做physical training既木架，之後變左虐犯既用具。

成千張咁樣既相，睇完成個腦都係。

腳蹽。

集體監獄。咪以為困響呢度正d有人陪呀，所有犯人都唔準出聲架。

 

呢幾個地方都比較接近，而且都近我地住既地方。

待續……