閒遊沙巴

26／12，尋日落左神山之後，趕住去搭車，又屈住響架車度兩個鐘，然後又趕住去做spa，跟住又趕住瞓，結果無拉筋，呢日就知死喇﹗對腳痛到呢～

響guesthouse對面間宜豐（好似話幾出名喎）食完個早餐（幾好味呀），就有廾黎接我地去九如河( Kiulu River )玩激流。

坐左個幾鐘車，十點鐘終於有得玩喇，響香港時，上網同埋d朋友都話唔好玩呢條激流，佢係一條一d都唔激既河流，所言非虛。點解知都去玩？因為朋友仔想玩，就陪吓佢囉，experience既一種黎既，知道佢點樣唔激法都好呀，咁下次我玩條激多少少既，就會好易滿足啦嘛﹗

呢度幾乎成條河都係香港人，同船一家三口都好nice。

呢度就係終點喇﹗平靜到呢～

玩完之後返guesthouse換過件衫又出發去睇長鼻猴同螢火蟲喇。又係坐個幾鐘車至到，我地先去一間民居度食個馬拉tea先。呢區係比較窮既，旅遊既其中一個目的係發展當地經濟，所以雖然個tea無咩特別，我都好樂意去食一食既。

呢d木板路都幾得人驚架。

就係呢個tea喇﹗

雖然條河d水好似好濁，但係魚穫甚豐喎﹗

就係坐呢條船出去睇長鼻猴喇。

途中見到住響河邊( Weston River )既小屋，真係幾窮呀﹗

我地今次真係好好彩，係勁多長鼻猴俾我地見到，而且成條河得兩條觀光船，唔似得其他團，人山人海。呢度真係好多長鼻猴呀，其中一個原因係剛落完雨，仍然陰天，佢地喜歡陰天，好太陽就唔出黎活動架喇﹗

同場加影：水牛

勁大隻既蝙蝠，仲有鷹、白鷺、銀葉猴……

天黑前，食左個幾唔錯既晚餐。

然後就去睇螢火蟲喇。出發前，有朋友話，多到似聖誕樹咁囉。又一次，所言非虛。真係好多好勁﹗

我地就係住呢度好似廉租屋咁既guesthouse (Red Palm)，RM65一晚一間房，裡面唔錯架，星期日樓下就係sunday market喇﹗