沙巴之旅－－神山

23／12九點幾就已經出發去深圳機場喇，坐Airasia，三個鐘機，約＄809單程往沙巴，遲左45分鐘起飛，所以到沙巴時，已過左可以搭巴士去神山既時間，結果我地由機場坐的士去神山，要RM160一架的士，好貴呀﹗坐左兩個鐘，終於到神山喇，俾左RM15入場費，登記好之後，就拿拿聲食個dinner先。

就係呢度喇，無人食但係d野都幾好食架，可能係貴啦﹗

住山腳要成五百蚊港紙一個人架。因為我地上網同sutera sanctuary lodges訂時，佢一定要我地book埋山腳一晚住宿至可以預訂，所以就被宰了﹗我地用左RM704包兩晚住，所有膳食，登山證及保險。但係……後來識左兩個老外，佢地只係用RM430左右，少住一晚山腳，比我地少一個晚餐，一個早餐呀﹗之但係，我地自己book，點都平過跟local tour囉﹗

呢間就係貴住既hill lodge喇，都ok架，有熱水沖涼。

24／12一早起身影左兩張hill lodge既相就去reception個邊登記上山同埋食早餐喇。

登記時，遇到一個英國妹，一個德國仔，於是邀請佢地一齊請mountain guide，平好多嘛﹗（RM100一個guide架）響起點pondok timpohon影張合照先。

呢個pondok timpohon（高度約1800m）要響reception（高度約1600m）個邊搭車過黎既，來回收費RM8一位。我個朋友仔就響度買左支行山棍（神山既棍，即「神棍」），係木棍黎既，好粗，應該好重，呢度買RM3，山上買要RM10，我死都唔俾佢昆。結果係，唔用都無問題。

全程就係上、上、上、同上。

行左大約兩個半鐘，行左4公里，上到Layang Layang食lunch （packed lunch），休息左一大輪，又繼續上喇﹗

條山路就唔難行既，好似西貢d路咁啫，之不過要你係咁上，好少時候要行呢種路既，基本上d去過既朋友話唔難行係無錯既，不過真係要有番咁上下體力，否則就要好有毅力囉﹗

全程我都係同呢兩隻馬騮一齊行，而朋友仔就同個guide慢慢行，基本上個guide無同過我地三個上山呀，哈哈﹗

終於行到海拔3000m喇。

就快到山上既guesthouse喇﹗

1430，用左將近五個鐘，終於都到喇﹗（約3200m）我地住Laban Rata，響出面望吓個山先。

呢度係山上面唯一一間餐廳，我地住響二樓，非常方便，各方人士都聚集響度等食個early dinner，七點半就無得食喇﹗

一路食一路等日落。呢個係今次旅程既第一個日落，之後仲響唔同既地方睇左好幾次好正既日落。

雲海，上到黎就隨時有得睇，非常容易。

沖完微溫水涼，食完晚餐，睇完日落，七點半準備瞓喇，因為第二朝要一點半起身登頂。可惜，瞓唔著，由七點半至一點半全程瞓響張床度扮死屍，因為一房四人，怕嘈住人，所以唔敢郁，好彩只係抖氣有d唔自然，無高山反應，我個朋友仔就頭痛又想嘔，又唔能夠瞓響度要坐起身黎瞓，真慘﹗兩位鬼人同我地同房，佢地都無出現高山反應，最搞笑係十一點幾鬼仔電話響，但係佢無聽，鬼妹以為係鬧鐘，起左身梳洗，仲落埋樓下諗住食早餐，結果上黎問完一輪至知係十二點咋（鬼妹無錶架）﹗