沙巴外島浮潛

27/12，今日好早就醒左，碰啱今日係星期日，guesthouse樓下就係sunday market喇，無咩特別既市集，只係好似細個時屋村個球場星期日d攤檔咁囉。

食完個早餐(廣東仔燒味，食麵，ok好食架)，返到樓下，個guide已經響樓下攞住袋燒賣，著住對拖鞋等我地喇。去邊？今日book左個local package去Manukan同埋Mamutik島浮潛。其實可以唔跟團架，因為跟團既費用係一個double，我呢d budget到爆既traveller就梗係想慳d啦，不過響香港時，朋友仔book既，我自己又忙，是是但但應承左(其實今次真係忙到咩資料都無就出發喇)，黎到想反悔(係呀，我幾老土架)，不過唔成功，算啦，錢財身外物，免傷和氣，貴就貴d啦﹗

貴，就當然係有服務架啦，例如：有1對2既導遊、導遊哥哥間中做吓攝影師、去貴既碼頭坐貴船啦、有專人服侍用餐啦、專區休息及飲食啦、專車接送啦。

呢個係Sutera Hotel既碼頭，如果自己去都可以用呢個碼頭，不過比起公眾果個貴d。

首先去Manukan島餵魚，真係好多魚呀﹗

餵左一陣就坐船去Mamutik島浮潛喇。呢 個島暫時都仲係好好潛，因為沙灘一落腳就已經大把野睇。海葵、珊瑚、海參、間條魚仔就梗唔少得架啦，我好好彩呀，仲睇到：小丑魚、奶咀、小蘇眉、浮響水面既劍魚、直插響水既不知名魚仔、神仙魚、老鼠斑、青衣、連大大條既雞泡魚都見到幾次，仲有，當我游去深水區時，我見到魔鬼魚呀﹗

話時話，呢度d海膽又大又多，唔洗幾耐，呢個灘就會無野睇喇，因為我已經見到有半邊灘成海都係珊瑚骨同海膽呀﹗

見到單丁一張綠色枱嘛？我地就係咁尊貴喇，右邊有一堆紅色枱，佢地應該都係跟團黎既，不過要同人一齊排隊攞野食，其實左邊仲有一堆藍色枱既，情況同紅色果d一樣。

呢度要我地兩條女食晒佢，無可能啦，結果我食左兩粒鐘都食唔晒﹗

食完又再玩過，d貴重物品有人肉locker睇住，貴就貴在呢度囉﹗

玩到三點，打道回府，可惜，我對腳背已晒成阿差咁既色，之因為我無查防晒。

返去guesthouse沖完個涼肚仔餓，去左好出名既新記肉骨茶，食左個肉骨茶，我真係超鍾意呢d肉骨茶，佢同新加坡d肉骨茶好唔同，但係都係好好食。點解香港無人賣架呢？

食完就沿海邊閒逛，行到去waterfront時，剛好日落，又係好正既日落呀﹗

行過d就係wet market，見番頭先生勾勾響海度游緊既朋友仔--魔鬼魚同雞泡魚。

今晚坐airasia去Kuala Lumpur，雖然遲左25分鐘起飛，但係幾乎準時land喎。單程約$436，兩個半鐘機，去到KL已經係零晨喇﹗

*馬來西亞幣對港紙：RMX2.3

去完沙巴，我發現呢度既人真係好nice，好似我細個時見過既香港人一樣，好肯幫人，不過，如果當呢個地方既經濟及社會發展到好似香港咁樣時，d人唔知會唔會覺得幫人會阻住佢地搵錢呢﹗