四條友望住個罐頭

今日上堂要用罐頭菠蘿，罐菠蘿放響枱面，旁邊有罐頭刀。我見四個學生議論左一陣，有人開罐頭喇，咁我繼續去招呼其他學生啦，過左一至兩分鐘，我見個四個學生企左響度，一齊好齊心咁望住罐罐頭，於是我問佢地做咩啦，我得到既答案係：

「我地開唔到罐野呀﹗」

我心知點解，但係都要問：「點解呀，咪有罐頭刀囉﹗」

「係呀，但係我地唔識用呀﹗」

繼續特登問：「你地響屋企無用過咩？唔食罐頭食物架？」

「無用過呀，點知食咩喎﹗」

開始串佢地喇：「咁你地開唔到，淨係望住佢，打算用念力開左佢呀？」

「......」

我一邊開俾佢地睇，一邊話：「遇到問題係要主動用正確方法解決既﹗」

「都唔識開，解咩決啫？？？」

「問老師或者同學囉，你望住佢就解決到lu咩？」

隔離枱個學生，走埋黎搭咀：「所以我行開左囉，哈哈，咁咪解決左囉﹗」

我真係好想解決左你呀﹗﹗

*宜家d學生係咩都有機會去學，跳舞呀、演講呀、游水呀，講得出既都可以去學，仲有d學得唔錯添，但係響一班精神分裂既父母過分保護之下，呢班細路就無晒生活技能，變左係學問超人，生活低能既兒童。救命﹗

最慘係，我d學生連學問同課外活動都低過人架呢，咁叫佢地做咩兒童好呢？