我上左商業電台做節目呀﹗

今日上晝去左廣播道，呢次係我第二次去廣播道，上次係中三時去參觀麗的電視，哈哈，我係老人家﹗

今次去既目的係應商業二台茜嘉航空既節目主持人邀請上去做嘉賓，今日係上去錄音，節目應該會響３月７號星期六，上晝０９３０﹣１０３０播出，主要講去巴基斯坦個trip，記得到時捧場。

本來約左十一點，不過早左到，謝茜嘉仍然做緊節目。

電梯大堂。等緊期間見到馮志豐，細個做童星個位，宜家響呢度做ＤＪ。我記得佢細個好得意好醒架，不過今日見到佢已經變左個佬，仲係肥佬，唉﹗

終於等到謝茜嘉帶我上錄音室喇﹗

準備錄音。

謝茜嘉開始錄我地既對話喇﹗佢比我想像中高大。

好專心咁錄緊音，但係其實我唔係好滿意，覺得講得唔係好流暢，而且有好多地方都講得唔夠具體同唔夠吸引，但係路人甲就話講得好過上次打電話去瘋騷快活人個次。

錄錄下，開始唔緊張喇，不過就嫌自己把聲太flat，播出街會令聽眾聽得悶呀﹗

呢幾日都有諗下點講架，心情仲有Ｄ見工feel添，因為驚講得唔夠好，d聽眾無興趣去巴基斯坦玩呀﹗

臨走前同謝茜嘉合照，佢好醒呀，知道高我半個頭（or more），請我坐低合照。

成個過程都好開心，不過就只係錄左大約４５分鐘，其實我仲有好多資料想講架﹗

唔知係咪真係會播出街呀，不過總算係一個有趣既經歷，有機會開下眼界，做d好玩既特別事咁啦﹗