惠州一天遊

今次係跟路人甲d行山朋友去綑邊，咩叫綑邊呢？原先以為行吓海邊，點知嚇到我賴尿咁滯。路人甲同佢地去過好幾次架喇，佢就梗係行得無問題啦，所以上幾次睇佢影番黎d相，好似好好玩咁，但係我又要返工，無份去喎，唉﹗點知今次一跟埋去先知係咁辛苦﹗呢d行山朋友個個都五十以外架喇，但係健步如飛，對於我呢個從未行過綑邊既人黎講，真係好驚呀﹗

星期一晚響深圳集合左就坐車去惠州既黃埠，唔去都唔知原來惠州好大好大，係個造鞋既城市，架車途經一個好似油庫咁既地方，周圍著晒燈，個feel好超時空，好似睇緊科幻片咁，真係大開眼界（當時好黑又掛住嘩嘩聲，唔得閒影相添）。

去到酒店，本來想去食吓水蟹粥，但早兩日至食過，都係瞓覺算喇﹗間房好大，都算好舒服，只係無上次響珠海個間咁豪華啫。

第二朝早，坐車去海邊開始行喇～～～～

一開始就要攀石喇，我呢個畏高人點行呢？頂硬上加上d師兄幫吓手囉﹗

你睇我呢條逐漸失去平衡力既蛇行到好似跳舞咁，真樣衰呀﹗海邊，真係行響海邊架﹗

個包尾既師兄見我行得咁慢又要逐步諗點行，就叫我不如行上山舒服d易行d。咁我又要「爬」上山喇﹗

咁就行左上黎喇﹗

山上面一d都唔舒服呀，d熱氣蒸住蒸住，幾驚會蒸熟左我變成蛇羹呀﹗我諗當時有成三十三、四度呀，又無風﹗有d師兄見海邊行得辛苦，都行上山呀﹗

上左山就梗係要落山架啦，呢條畢直既落山路，係我首次自行完成架，嚇到賴屎﹗

只係行左個半鐘，我好似行左幾個鐘咁攰，真無用﹗不過路人甲只係話我好緊張好驚所以覺得特別辛苦。對於佢黎講，呢d係散步道黎架咋，難得山長水遠黎到，佢無真正行而陪我，又無怨言，真抵錫﹗

天氣真係熱，連d師兄都話唔好行住去食飯先，好野﹗

本來坐呢隻船過河既，點知隻大船壞左，旅遊巴上唔到船，於是坐左成個鐘頭車去對面岸。

去對面岸做咩？食海鮮囉﹗

海膽炒飯，超正﹗我仲咁大個女第一次食絲奄呀，血淋淋，但好好食，食左兩隻，本來仲想食架，但一想到我個玻璃胃，唉，試過就算啦，費事真係賴屎呀﹗

下晝再去另一個灘綑邊，但經過上晝既經驗，又怕行得慢阻住人，而有d師兄師姐都唔行留守海邊，所以我都唔行喇，而路人甲當然陪住我啦﹗

呢d人好似係響度摸沙插呀﹗

個海灘好靚架，影左好多相。

五點左右打道回府，響旅遊巴上見到沿路既風景好靚，終於都係忍唔住攞部機出黎影吓﹗

愈接近深圳，空氣就愈差。

響深圳食埋晚飯就各自回家去，仲趕得切睇明珠台套LIFE，完美呀﹗

＊唔好以為我去完澳門珠海又去惠州，又玩又食洗好多錢呀，平到你唔信呀﹗