韓國最後一天．藍天

23／9，天氣好好，藍天加秋風。

今日主要行吓周圍既街。因為我地住響北村韓屋村，周圍係d古宅，而且方圓幾公里都可以用對腳去行就已經好多景點，所以尋日同今日我地都會行，唔會搭車。

一路上有好多呢d古宅，好靚，北村呢邊同過條馬路果邊近三清洞既舊村都好有京都既感覺。

之前行緊北村果邊時，見d遊客攞住本guide book對住間關左門既學校指指點點，後來響街口見到個牌話呢度係指冬之戀曲既場地，好似好靚咁，可惜入唔到，d遊客就響鐵閘度影相留念就走喇﹗

後來我地行完三清洞果邊條舊村，打算行上山果邊由三清洞條街頭行番落去景福宮正門時，俾我見到有間學校既物體，位置似乎響頭先間學校附近，就走入去行吓啦，點知原來呢間係另一間學校，不過同果間靚學校係相連既，於是就成功入到去拍攝場地喇﹗

呢度係另一間學校，我咁大個女都未試過坐人造草地足球場呀，好靚呀﹗

呢度就係拍攝場地喇，我未睇過套戲，唔知係點，不過現場真係好靚﹗間學校有成百幾年歷史架﹗

後來行去三清洞，但係真係好多人

又行左入去呢間玩具博物館，其實我估係私人收藏，不過公開參觀既figure收容所啫，入場費要3000w架﹗

我搵番我阿爸同阿媽喇，你睇我地對眼幾似樣。

四點，返guesthouse攞埋行李行出街口搭車出機場，回家去。

去到機場check in左，入閘後去左買laneige，香港價錢七折，不過機場既gift少好多。

有用資料：

機場巴士 由安國站到機場6011號  車程50分鐘 10000w

中秋節＠首爾

22／9係中秋節，韓國人都會慶祝，而且放三日大假。我地煮完早餐就行左20分鐘去景福宮，因為係佢地既秋夕節，似乎係個大節日，門票全免之餘仲有節目表演同攤位遊戲。韓國人似乎好享受呢d政府為佢地安排既野，好有一種郊遊享天倫既悠閒感覺，唔同香港人去d節慶場地咁，咩都要死迫難迫，嘈嘈嘈嘈嘈，呢度d人唔會搶住去玩d免費遊戲，唔會一窩蜂咁去搶試食既食物，呢日連我地都好開心呀﹗

我地因為好早入場，所以開始時無人，我地可以任影。呢d係鄉村既守護身，簡單d黎講，係負責嚇鬼既﹗

我地由景福宮既側門入，一入去行無幾遠就係一條七十年代既古裝街喇﹗

呢一日係特別日子，仲有得入去免費剪個七十年代髮型添呀﹗

仲有得影相

行完之後，入左去旁邊既博物館，無啦啦有個非洲館，見到好多有趣既樂器

之後就有一d有關韓國文化既野喇，呢個係六十大壽時既慶祝呀

行左兩個鐘博物館，一行出黎聽到好嘈，沿住聲音搵，見到有表演呀，都幾好睇喎﹗

睇左好耐，就開始周圍去睇d攤位喇﹗今日有好多人著住傳統韓服出黎，可以任我揀個靚靚既先行埋去問佢地可唔可以合照。呢個妹妹好cool架，諗左好耐至話yes咋﹗

景福宮即係我地中國既紫禁城，但無論規模同建築物既大小都比中國既小同細，原因係古時韓國係中國既藩屬國，為怕老大哥中國怪罪莊閒不分，所以韓國任何野都次等於中國，而且，當時韓國非常崇拜中國，所以又有好多野係學中國既，其中，文字係最直接學習而使用既。可惜，後來因為皇帝覺得文盲問題太嚴重，所以發明左宜家呢種咁科學化而且易學既文字，更可惜既係，佢地幾乎放棄左漢字。需知道，懂漢字可以學得更多文化，而且於現時黎講，中國掘起，非常實用。不過，人地韓國人唔用漢字都情有可原，我地中國人無啦啦搞d簡體字出黎，淹沒自己既文化就真係匪夷所思喇﹗

行完都兩點喇，剛好可以睇每個小時整點都有得睇既交更儀式。你可以隨便行入去同呢班守衛影相，佢地基本上係唔郁既，但係有d阿豬媽一行埋去就攬住人地對手，守衛唯有掃開佢啦。呢個守門官好似周杰倫架﹗

行完景福宮，亂行亂行，行到黎清溪川，一條韓國人引以為傲既保育大發明。

一路行都見有好多攤位，小朋友真係開心晒﹗

唔洗錢，我梗係唔蝕抵，玩番鋪啦，入左﹗

呢日最後既節目係去食人參雞湯，好味，仲有好好飲既人參酒添呀﹗

回程路上，經過景福宮個大門，光化門，搞吓攝影先﹗

下晝行過吓仁寺洞架，買左d護膚品，嘩﹗香港既三折咋﹗

仲送左咁多sample添﹗

只不過，本來打算食既車仔檔同燒肉都係無機會食到。

暴雨首爾

21／9，經過兩日行雪嶽山，今日本來既行程係再入雪嶽行個短程既山路，我見天氣似乎ok，都覺得可以一行，但朋友唔想再行，咁我又無所謂，所以決定出首爾。

九點起程坐車出束草再轉車出東首爾。一到首爾，心情已經好灰，因為大雨到只係行過一條馬路，我條褲已經濕到上大脾，就好似香港黑雨咁。轉多程地鐵去安國站，已經係兩點喇。

雨大到不得了，一上地面，條街好似條河咁，又搵唔到間guesthouse，結果成三點至去到guesthouse。

入左去就唔想再出去，因為外面大雨到一出去就會濕晒。於是，上網。

上完網又出唔到去，就響guesthouse裡面影相。呢間叫北村guesthouse既韓屋體驗館係一間古宅，有百年歷史，裡面既陳設同我後來去韓國人生活博物館時見到既韓屋模型係一樣架。

我地間房，廁所係公家既，要行出去至有，間房好細，放得兩張床，

同埋個櫃，但係……

我地間房出面就係呢間guesthouse既common room同廚房，大部分時間都係我地兩個自己用晒，住其他房間既住客好少用呢度，咁變相我地租左一間屋。

你睇，有客廳有電腦，地板有成百年架﹗

我地間房門

common room外面右手邊就係廁所喇，住其他房既人就好多時間都係留響房度，有時過黎common room坐吓。

由廁所門口望過去common room

後來細雨左dd，就出左去街口間鋪仔買野返黎煮。

就係響呢個廚房度煮左我地呢晚既晚餐喇﹗

開飯

guesthouse既小擺設

由門口望去我地既房同common room

guesthouse門外一景

有用資料：

北村guesthouse60000w一晚一間房

雪嶽山放晴

今朝本來既行程係零晨三點幾起身上大青峰，但係不斷落雨，又無景，決定瞓晏d，但係同房其他人四點幾開始陸陸續續起身，搞到都瞓唔到，而且個地板成晚都仲係好熱，基本上瞓得唔好，所以，六點就起身喇﹗

天氣仲係好差，唯有開始落山，今日既路比尋日既好行好多，如果由呢面上山既話，應該會輕鬆好多，因為條路雖然長d，但比較平緩，好行好多。

落左無幾耐就到左鳳溪庵，原來諗住尋晚如果小青無晒位就會黎呢度投宿架喇﹗

途中間唔中會見到紅葉，但一d都唔多，比我想像中少。

有好多瀑布

d水又綠又清，好靚，有d似以前去南嶺國家公園既感覺

途中既永矢庵

呢度好多松鼠，好得意架﹗

經過九個鐘行吓影吓睇吓，終於到左山腳既百潭寺

休息左一陣，再行多半個鐘左右，去到shuttle bus站，咁啱遇上個識講英文既韓國仔，佢又好熱心，幫我地問人落車後點樣搭車去束草，後尾佢知道我地去束草佢要轉車至返到guesthouse，結果佢話我地知，佢係開車黎山下面既shuttle bus站既，等陣落車後佢可以車我地返guesthouse。嘩﹗我立即答應啦﹗後來發現原來都幾遠架，佢開左半個鐘車至去到我地既guesthouse呀﹗

返到guesthouse，立即出去食番餐啦，什菜飯之外，再加個花蟹湯，辣到不得了，蟹好鮮味，只係d肉唔係好實。