龍脊陽朔之旅第四天

11/4/09今日又落雨，於是決定行plan B，去銀子岩，繼尋日因天雨關係改行plan B之後，又一次轉plan（尋日本來諗住由大寨行四個鐘過平安寨架，但係上完金佛頂之後，都係決定走喇，過到平安寨都唔會有咩睇架喇﹗）。

食早餐時，聽到出面打鑼打鼓，放晒爆杖，以為有咩睇啦，原來係送殯，以為係笑喪啦，又見有個女人大大聱咁喊，我都係第一次見咁樣送殯。

銀子岩內既鐘乳石真係幾靚，我記得細個時去過英德睇呢d岩洞，但係呢度有一個景真係幾特別。你以為佢好深，腳下係懸崖之際，等你定一定神，先至發現係倒影。呢個銀子岩既倒影都算令我印象最深刻既倒影喇﹗可惜，太wide，影唔到個效果。

行完一輪，都成兩個鐘呀（我地「慢」遊架嘛），出黎食下小食先，呢舊黑媽媽既野叫粑粑，哈哈，好食﹗

玩完一輪，搭車返西街，又係時候tea喇，我地揀左「李萍咖啡店」（西街最早期開業既咖啡店），全因佢位置好，響正轉角位，不過d野食就麻麻地喇，我杯木瓜奶昔，根本就係一杯溶左既士多啤梨雪糕。

由我地坐既位置望出街外。

hea左個半鐘個tea，就走左去漓江邊浪漫下啦，天色好暗，唔係好靚﹗返酒店拾下野，吹番乾d衫。

夜晚呢餐，我地揀左疊翠路既陳大姐啤酒魚，魚太鹹，芋頭扣肉d肉未諗，唔推薦呢間。

食完飯，行左陣西街，真係完全感受到13億同胞既威力，條西街d人多到好似sogo出面個條馬路咁，鬼咩，星期六嘛，今朝響銀子岩度已經見識過每隔兩秒就有一架旅遊巴駛入去既壯觀情況啦﹗

行西街時仲見到個女老外用一舊水買左個杯墊，佢地可能覺得hand－made好應該貴d，但係我好想話佢知，中國有26億隻手，唔值錢架﹗

－－－－－－－－－－－－－－－－－－－－－－－－－－－－－－－－－－

有用資料同溫馨提示：

1．去銀子岩最好搵酒店幫手book車，連來回接送及入場費RMB60（公價），自己去既入場費都RMB50。

2．一落雨，呢度d天氣勁濕，d衫掛幾日都唔乾，最好拎去洗衣店洗（我見到西街外有兩間：芙蓉路、疊翠路各一間）。

3．間間啤酒魚都話自己咩咩比賽冠軍，都唔知係咪自己搞個比賽俾自己，我都已經見人多先入陳大姐架喇，但係味道都係麻麻﹗