「一放假就去玩」？咁易咩﹗

呢排好多朋友都同我講同一句說話：「你就好啦，放親假就去旅行﹗」

我其實好想同佢講：「我捱番黎架﹗」

「一放假就去旅行」係我一直都覺得唔可行既行為。

想當年，中五已經開始左捱既生涯喇﹗後來出黎做野無幾耐就開始供屋企層樓，要去旅行咩？儲錢啦，死儲爛儲至去到一次。

記得以前有個朋友話我知佢去韓國探朋友，無去邊度玩，當時我諗：「唔係呀？咁貴張機票，去到唔玩？咁難得至有得去旅行，係咪浪費左少少呢？」

另外又有個教書既朋友同我講：「我放親長假期都唔響香港，有咩食飯聚舊呀，唔好放假先約呀？」當年我聽完覺得：「無野吖？有無可能個個假期都去呀？﹗咁多錢？﹗」

但係，呢兩位朋友其實都嫁到個有錢人，所以錢根本唔係一個問題。我呢？我都係呢一兩年至可以咁樣，唔係我呢兩年嫁到個有錢人，而係屋企既經濟重擔放低左啫﹗

其實我呢d邊度係別人既羨慕對象呀？我捱左咁多年至叫做輕鬆d，你掣唔掣呀？（我真係夠膽講，我已經做多左十年既工作時間，試過一段好長既時間，晚晚十二點至返到屋企，第二朝六點又要起身）可能有d人會覺得我而家份工好得閒，但係我既「閒」係用好多野換番黎架，例如人工，例如前途，你又掣唔掣呢？

講真，最令人羨慕既應該係果d一出黎做野或者做左幾年野既同事，三十前已經四處去玩，個個假期都去旅行，無論去得遠或近，都令人羨慕啦﹗我好記得有一次去布吉島旅行五日（人地weekend都走去行一轉啦），儲左好耐錢（三千幾蚊都要儲好耐呀），搵左好耐資料，未出發先興奮左好多個月，所謂物以罕為貴，真係去得好珍貴呀﹗

未捱過，未恨過，又點知個分別呢﹗所以，就算而家去旅行，每次我都去得好珍而重之，唔想糟蹋左d錢、個plan、d時間、同埋去旅行既機會﹗

「一放假就去玩」咁易架？