龍脊陽朔之旅第三天

尋晚食完飯後，兩位北京小姐請左我地飲酒，係玫瑰酸梅酒，好甜好易入口，但都有三十幾四十度，唔講得笑。我地一邊飲一邊吹水，天南地北，咩都講下，非常開心，原來我係可以用普通話黎同人吹水呀，仲唔係斷估，而係句句都聽得清清楚楚，佢地又知我講咩，哈，真係開心，上次響新彊既疑慮一掃而空喇。北京小姐既解釋係：中國好多地方既人d普通話根本發音不正，你聽不懂實屬正常呀﹗

第二朝(10/4/09)一早就起左身喇，因為尋晚無咩做，好早就瞓左。本來打算尋日睇日落，今朝一早響全景樓睇日出架，天氣唔好，咩都無得睇，唯有又影下周圍既野啦﹗

觀景房望出去既景觀。

全景樓外貌。

影完一輪，我地響番全景樓食早餐，最好食係蔥油餅，講開宜家仲想食呀﹗

食飽飽又出發喇，今日去埋3號景點－－金佛頂。出發前同兩位北京小姐合照先。

又同幫我地揹背包既瑤族嬸嬸合照，佢地平時都係著成咁架，d布都係自己織架。

去3號景點途中一景。其實呢條路尋日行過架喇，原本係今日行第二條路去3號景點既，不過因為落雨，個邊條路好難行，所以行番尋日條路再轉上去3號景點。

寨內住家一角。

呢位伯伯成百歲架喇，仲好精靈，自己走過黎叫我地同佢影相，影完仲要睇番，跟住問我地攞一蚊，然後見我仲係咁影，就話要兩蚊，真醒﹗

呢度空氣好，到處綠油油。

途中見到既梯田都好靚架﹗由呢度再行廿分鐘左右就到金佛頂喇，好可惜，上到去等左半粒鐘都係一片白茫茫，唯有走人啦﹗

落完雨，空氣好清新，樹木上都鋪滿水珠。

呢位阿姐準備落田，你睇佢把刀，好堅呀﹗

去大寨食飯前，會經過呢度，好世外桃源feel呀﹗

入寨食飯喇﹗

案內既飯菜都美味架﹗

1315，我地上番全景樓既車去桂林汽車站，搭車去陽朔。全景樓呢班車應該1200就開架喇，不過我地今日行遠左，所以佢等埋我地啫﹗

－－－－－－－－－－－－－－－－－－－－－－－－－－－－－－－－－

1605開車往陽朔，1740就到左喇，途中壞過車呀，幾驚司機搞唔掂要我地轉車呀﹗

去到陽朔汽車站，一落車旁邊就大大個牌寫住「由此進西街」，於是我地根據北京小姐既介紹，去搵佢地口中好平好正既「驢行驛棧」啦，點知去到時佢話無房，再行多幾間都係無房，咁就是但搵到一間我唔係好滿意既住住先啦﹗

搞掂住就梗要搵食啦，西街真係好多野食，我地決定去間名氣好大，不過應該質素一般既「沒有飯店」食下。呢度就係我地食飯既地方喇﹗

叫左炒田螺、香酥鴨、炒菜，比想像中好食，不過d田螺就細左少少。

食完飯行左陣西街就返酒店休息lu。

－－－－－－－－－－－－－－－－－－－－－－－－－－－－－－－－－

有用資料同溫馨提示：

1．瑤族女人頭髮超長，個個都長超過一米，佢地唔用洗頭水既，係用洗米水洗頭既。個個婆婆都無白頭髮架，而且皮膚仲好好添，幫我地揹背包位婆婆係一個好例子，以日晒雨淋既工作環境黎睇，佢d皮膚真係勁好。（資料由揹背包嬸嬸提供）

2．呢度都有好多外國人黎玩架，好似今次咁，我地行緊山途中就見到一團法國人喇﹗

3．回程早上d阿姐會上全景樓等我地，呢日如果再搵佢地幫手揹背包，又收RMB30。

4．大寨至桂林車費：RMB40

5．桂林至陽朔不停站直車：RMB17（其中RMB2係保險費）

6．花溪酒店一晚標準間：RMB60

7．響西街，你似乎會遇番晒所有黎左呢度既人，例如路人甲遇到兩班響香港攀石既朋友啦，有d仲遇完一次又一次添；又遇番響龍脊住全景樓既人啦（雖然大家黎西街既日子都唔同），咁路人甲既朋友提醒我地：呢晚係星期五，會比較難搵架，聽日星期六，唔洗旨意搵到呀，遲d五一旺季，按摩院一百蚊張床位都爆呀﹗

8．西街其實好短，夜晚好嘈，最好住西街外面d街仔，靜得黎又近西街。

9．響西街見到既老外，係比我見過既中國其他地方既總和呀，成條街都係鬼同香港人，所以物價指數好高，連外面附近街道既店鋪賣既野都貴d。

10．最好先買張呢種地圖，RMB6，有好多優惠，好好用。

11．響西街食野，價錢到處都差唔多。