今年第一爆

今年黎到今日先爆，實在唔錯喇﹗

事緣，今日開左個分相會，實在廢﹗

爆一：

C班個位小X老師，我真係想小X佢。佢響個議程度提出「早會秩序問題」，我以為係咩啦，點知佢話佢個班早會排隊時會好乖，如果排得唔好呢，佢又會咁咁咁，又會咁咁咁，總之講到自己好掂，然後佢話：「但係我d學生問我，miss，隔離班又嘈得？﹗」，然後要求大家要好好管教自己班既秩序。佢係C班既，即係投訴B班或者D班啦，我見B班個訓到王面色都變埋。雖然小X唔係話我，但係人地同你有牙齒印咩，呢d野，自己私底下講兩句咪算囉，洗唔洗開會揼人心口呀（直頭唔洗篤背脊），二老細hold會架，妹妹﹗

爆二：

我地討論緊學生缺席問題，討論緊用咩方法令學生多d返學時，小X就用「等我黎教下你啦」既態度講佢個班點點點，一個邀功邀唔切既樣。我好想話佢知：「妹妹，你講個d方法，姐姐響你仲讀緊小學時已經用緊喇﹗」成個會開左一個鐘，佢講佢用咩方法去同佢班相處最少都廿分鐘，人地B班個可愛班主任想講野都差d俾佢截住。妹妹，你少d缺席，二老細仲欣賞你多d啦，下次開會應該要討論一下老師缺席嚴重既問題。

爆三：

又係小X，佢賴巴閉咁話自己點用自己諗出黎張「贖罪卡」。第一，個名好負面，根本唔應該響學校出現，咩罪呀？咁大件事？第二，佢叫d學生去同個響班裡面唔受同學歡迎既同學玩，就可以得到一張卡。呢d係咩買賣呀？可以睇得出呢位小X老師個人好有問題。

＊＊因為小X不斷想出位，成個會佢講得最多，所以亦俾我睇到最多，亦寫佢最多。

爆四：

我班缺席率好高，諗住響個會度報告一下，費事有咩事時，二老細話我地唔講。點知訓到王提出幫自己班搞多d活動，吸引佢地多d返學。對唔住，我真係想講：「白痴﹗」我地學校仲唔多活動呀，課外活動、午間活動、課堂活動唔多咩？日日都有術科上，唔洗讀斎玩架啦，佢地又點解唔返呢？係咪搞個活動佢地就日日返學咁易搞掂呢？難得個位個頭生晒白草既二老細非常咁同意。更難得係訓到王個班其實無咩活動，就算有都係可愛班主任搞既，吹漲﹗

爆五：

呢班唔返學既人返左學喇，但係佢地抱住返黎玩既態度，唔日日爆你大鑊呀？﹗搞d午間活動，放學後比賽，佢地唔識第四五堂至返呀，咁遲到既問題咪又係無解決到。搞活動吸引d學生返學？日日搞啦笨﹗

爆六：

一個鐘，睇晒訓到王個假面具，個面具仲係畫得好醜樣架添﹗好核突﹗二老細講咩佢都點晒頭表示同意到爆既樣，我好想大聲問佢：「喂，你有無做過野呀﹗」

＊＊返到自己位後，有同事問我覺得個會點，佢話見我報告左自己班d學生既情況同處理方法後，同二老細拗左兩句就無再出聲。啱﹗呢d既無聊又白痴既會我唔想參與，佢地話點咪點囉，我又唔識係咁點頭，我個頭裡面裝既係有用既腦，唔好叫佢諗埋d不切實際既野啦﹗

我有時間都打多兩次電話俾家長，同d有問題既學生傾下啦﹗問題唔係咁樣去解決架﹗事實上，我呢班學生既問題都一路解決緊啦﹗不過有d野唔到我地話事啫﹗

遲d話唔定我地會被要求企響學校門口叫口號呀：「學生哥，我地學校活動多，日日返學笑呵呵﹗」

香港既教育..........

爆完，舒服晒﹗洗手先﹗（個keyboard污糟咋，唔好諗其他野﹗）