龍脊陽朔之旅第五天（上）

尋晚食飯前上網check過天氣，竟然係「暴雨」，兩日暴雨，兩日小雨，我個心情同個天一樣，即刻灰晒﹗

12/4/09今朝遲左起身，因為尋晚一路落緊大雨，都知今日未必可以出發去楊堤徒步去興坪。起身之後見佢都唔係咁大雨，所以都揹埋背包搭車去楊堤睇下咩情況。

一路上都落緊毛毛細雨，落車前仲愈來愈大，所以我地都係決定又行plan B，由楊堤碼頭坐筏去興坪。但係一上筏，d雨就停喇，直至我地上岸先再落過，激死﹗

楊堤碼頭，我地就係坐呢d假竹筏喇，佢地其實係膠架，後面仲安左摩打，行船時幾嘈架﹗

途中見到呢d魚鷹，佢地係影相既，夜晚會表演捉魚，其實佢地都慘架，漓江已無魚可捉，難以為生，所以要轉行投身旅遊業呀﹗

雖然「煙雨漓江」好浪漫，但係風景實在差d，一係就大霧d，d霧低d，一係就陽光好d，呢個唔湯唔水既天氣，未能夠睇到漓江最靚既一面呀﹗話雖如此，其實當日一路漂，我都一路好開心咁：嘩﹗好靚呀﹗呢座山好似蘋果呀﹗……呢座真係似烏龜爬山喎﹗…………

好出名既「九馬畫山」，但係我數極都只係數到三四隻馬咋﹗

桂林呢種獨特既喀斯特地貌(Karst)，真係好得意，d山個個都一支支咁，放埋一齊又好狗牙狀喎﹗出左桂林一帶就再見唔到架喇﹗

二十蚊人民幣上面個景，應該響對岸上面影就最似喇，不過我地上左岸之後又落雨，無影低，只用對眼影左一份響個腦度。

有用資料及溫馨提示：

1．徒步要交過路費每人RMB16。

2．筏工開價RMB120由楊堤漂去興坪，我地砍價至RMB80一隻筏。時間約漂兩個半小時。

3．我響筏上面觀察到徒步既路段一d都唔難行，都係平路，不過就係長，有廿二公里，如果天氣ok，徒步都好正﹗