我個人覺得呢度好舒服，但已經開始商業化，應該好快就變左另一條西街，真係唔想呀，咁樣咪好好地﹗
我地後尾行左上呢個山個山頂，佢雖然得三百幾米，但你睇到個山幾直嘛？山頂個兩點就係個亭喇﹗
響古鎮裡面見到好多學生寫生（可能係興坪有一間藝術學校既原故），最衰咩都無，如果唔係，可以同佢地一齊畫下。
古鎮一角，好舒服呀﹗
個環境咁靚，最適合拍拖啦﹗
我覺得呢度比西街更有味道﹗
途經古鎮外面，竟然有野味食，呢種好似係鼠類，好驚呀﹗
行完一輪，走去老寨山旅館check-in，佢外面好有特色架﹗
d房都ok呀﹗
搞掂晒之後，就響佢旁邊條梯級步道行上山喇，落完雨，條山路又直又窄，我又畏高，所以人地行30分鐘，我行左45分鐘先上到山頂。
真係不枉此行呀，嚇到死都要上黎呀，點都要坐出d影番張勁架﹗
響龍脊認識個兩位北京小姐推薦我地響西街坐熱氣球（RMB500一位一個鐘），睇過佢地d相，好正，而爬上老寨山睇到既風景既角度就正如坐熱氣球一樣，非常值得一爬，免費，坐一日都得。
爬上山頂個亭後面堆石，仲可以睇埋呢面，呢個老寨山可以俾你360度睇晒興坪。
本來個plan係上黎睇日落既，但係呢幾日天氣都唔好，應該無野睇架喇﹗點知可能個天見我畏高成咁既衰樣都走上黎，就播番兩份鐘日落黎鼓勵下我咁啦﹗
上山容易落山難，我就兩樣都很難，路人甲就更加辛苦，因為要做我支human stick（佢以前唔肯架，淨係會話：咁易行，自己試下啦﹗自從我去完巴基斯坦後，佢知道有兩支human stick日日拖我上山落山之後，佢就肯做我支human stick喇﹗）。
所以呢餐食得豐富d，就係響野味店度唔食野味。
食完飯之後，就開始雷雨喇，仲落到停電添呀﹗一直落到天光。
－－－－－－－－－－－－－－－－－－－－－－－－－－－－－－－－－－
有用資料同溫馨提示：
1．興坪有幾個碼頭，其中一個較大，停大船，老寨山旅館就響旁邊。響細碼頭上岸會有人向你兜生意，RMB3－8一位去古鎮，佢講到好遠，我地無睬佢，自己行過去，真係唱兩首歌就到左喇﹗好近﹗
2．老寨山係個日本阿伯開既，仲諗住會乾淨d，點知阿伯已經俾13億中國同胞同化左喇﹗唉﹗佢有個廣西老婆，響南寧個邊黎既，所以識講廣東話。
3．老寨山一晚標準間：RMB80
4．去興坪，一定要上老寨山，個景靚到呢………
5．野味店叫做「山水緣飯店」
6．陽朔往楊堤車費：RMB8
7．興坪往陽朔車費：RMB5.5
蛇仔 住老寨山好，還是住西街好﹖
回覆刪除[版主回覆04/23/2009 13:06:00]老寨山在興坪，同西街距離車程大約一小時(加埋等車同等客)，如果你無時間就梗係返西街住啦，有街行下，有夜市，如果你大把時間就可以住興坪靜靜地過一個晚上，睇下星星。
我下次去陽朔一定要住番晚興坪, 上老寨山！
回覆刪除[版主回覆04/27/2009 22:34:00]老寨山真係值得一上呀﹗
嘩...呢個世界真細, 睇完下邊呢張相,
回覆刪除我先認得我地係老寨山上見過.....
我地到左一陣你地就落山啦!!
[版主回覆05/01/2009 22:54:00]喂﹗咁啱呀，咁都俾我地相遇，世界真係細呀﹗你個trip好玩嘛？
好在你post 咗老寨山的相……我上到去，乜都值回票價，當地人或遊客冇邊幾個會上，所以若然不是你的相，我都未必會上！
回覆刪除[版主回覆05/08/2009 10:30:00]唔洗多謝﹗幫到你我都開心呀﹗
你好! 你們本打算徒步由陽朔到興坪，想知道你們當時是背著backpack的嗎?那如果背著baqckpack徒步，會很辛苦....
回覆刪除[版主回覆08/19/2009 18:49:00]如果你打算住興坪，便要背著背包了。一路大都是平路，相信不太辛苦吧﹗
全靠妳介紹老寨山! 我哋帶理兩个香港人上去, over 1100級石級, 30 分鐘, 很累,但超值! 10个Like!!! thx yr recommendation!
回覆刪除[版主回覆04/30/2011 05:07:00]我都係睇人地D網頁同討論區搵番黎架咋，唔好客氣啦﹗