第十七天，Canakkale

續……

行完博物館，又行左去St.John Church，不過無入去，只係響外面影吓相，睇吓景。跟住行左返hostel，又行吓朝早行過既saturday market，買吓野。睇吓魚檔兩位阿哥幾chok﹗

返到hostel，食完晚飯，前台位哥哥猛叫我地響留言簿度寫comment，仲要人人都要寫，咁我咪用中文寫埋d鬼五馬六囉：肥佬夠肥，咸片夠多……影埋相架，不過張相響人地部機度。

等到2200，終於起程行去車站坐2230既車（TL45）去Canakkale，本來第二朝0700至到架，但係架車開到識飛咁，搞到我成晚都瞓得好擔心。

結果，朝早天未光，五點幾就到左喇﹗

－－－－－－－－－－－－－－－－－－－－－－－－－－－－－－－－－－

8／5／2011，星期日，第十七天，晴，Canakkale

我地本來book左車站附近既hostel，但係去到時拍極門都無人應，唯有搵間野食早餐，休息吓啦﹗

後來，大家決定即日離開，唔留呢個城市，於是走左去巴士公司放低個大backpack，然後坐船去Gallipolis半島，好快，15分鐘即到。（TL4來回）

一到半島，就係個有關當年第一次世界大戰時Gallipolis半島戰役既公園。

我地租左架的士（TL120，三小時）去左半島既南面參觀左幾個紀念墓地同紀念碑。

戰爭真係無謂，死既士兵都係十幾廿幾歲既年青人，而發動戰爭既果幾條茂利就安安全全咁指揮d人去死，唉﹗

墓地入口

半島既風景真係幾靚既﹗

紀念柱

當年既戰蠔

響我地去緊另一個無咩野睇既戰爭博物館時，見到有好多女人，好多大盆，咪走入去八吓啦，原來係有節慶（由於溝通唔到，所以唔知咩節慶），響度煮大鑊飯，佢地仲請我地食添，嘩，係成個土耳其之旅最好食既飯，裡面有咸雞架﹗而且，仲好大碟添呀，平時響餐廳食，TL3先得一小碟咋﹗

戰爭博物館內

參觀完戰爭博物館後，我地打算走架喇，但係有三個小子走過黎搭訕，仲請我地食pizza，又帶我地去搵佢地屋企人，原來佢地係由第二個城市黎旅行同埋野餐既﹗

可能呢日係星期日，好多旅遊車黎呢個半島

影完呢張相之後，佢地請我地食pizza, yogurt, vegetable......飽晒，lunch都唔洗食喇﹗

食完免費午餐後，坐船返去Canakkale，行去附近隻木馬度影吓相，呢隻係Brad Pitt拍完Troy之後留低俾土耳其政府既，於是就放左響海邊喇﹗

本來我地都諗住去Troy睇木馬既，但係又覺得隻野又唔係歷史文物，長途拔踄，好似有d無聊，於是決定去沖多次土耳其浴。

沿路行去時，響小巷見到有個飲野既角落，長滿紫藤，好靚﹗如果無記錯，我第一次見紫藤係響雲南麗江木府，驚為天人﹗

沖完涼，我地響快餐店食野，一路係咁坐，坐到2130，人地打烊，我地先去巴士公司等上車。