輻射之旅--日本(神戶，有馬)

24/6/2011，晴，星期五，第四天

今日要去有馬，但首先會響神戶行吓先，我地坐阪神電鐵去神戶(45分鐘，400日元)

去到神戶，搵個locker放好個喼(細locker:300日元；中locker:400日元；大locker:500日元)，然後就行上去北野異人館區

途中，其實都有好多野睇架，例如呢間壘球club咁啦，好有趣﹗

仲有呢間我覺得最值得入去買杯咖啡，享受一下既starbucks，佢係成座building黎架，有兩層，分左幾間房，好有歐洲feel，好舒服架﹗

之後，我地又經過一間廟，可能呢排係考試期，每到一間廟都有好多學生祈福，呢班好有組織呀﹗

去到北野異人館，有好幾間以前既領事住過既屋，因為無興趣，所以要收費既，我地都無入去

行完之後，去左車站附近既咖啡店飲咖啡，呢間有成百年歷史架﹗(900日元一個cake set；藍山咖啡750日元)

飲完咖啡都已經五點，去坐阪急電鐵去新開地站轉車去有馬溫泉站(55分鐘，690日元)

1815到達有馬溫泉站，向山上行，搵左一輪都搵唔到我地訂左既「有馬小宿」，問人又俾果個人老點，行來行去都搵唔到，好彩有個阿叔帶我地去，但係又發覺要去案內所攞鎖匙(其實confirmation email係有寫既，不過路人甲無留心睇)，路人甲又走去攞啦，結果頭頭尾尾搞左成個鐘至上到房

溫泉既源頭

放好行李之後，快快手手就去左金之湯浸溫泉喇，嘩﹗我第一次浸咁深色既溫泉呀，仲要係好熱，42度，坐一陣已經好熱喇﹗

浸完之後已經九點幾，去左便利店買野返房食，好豐富架﹗

溫馨提示：

有馬小宿--

1. 其實佢位於有馬之工房三樓，係一座石屎樓，旁邊係溫泉寺，原先我地就係成日以為係小小 木屋，所以搵左咁耐，而且，網上面佢無外貌既相，地址亦無提你係響有馬之工房樓上。

2. 平日一晚一人4500日元，星期五、六、日5000日元，包無限浸「金之湯」及「銀之湯」(如果另買coupon要850日元)，只要出示小宿既鎖匙就可以入去浸喇，由小宿去兩間湯都係一兩分鐘，好近。

3. 「有馬小宿」內係無管理人員既，到達時要響街口既案內所攞鎖匙，check out時就將鎖匙放響房內就得喇﹗小宿得八間房咋﹗

間房唔細架，仲有露台添，不過要用公共廁所，小宿內無浴室

金之湯--

同一般既溫泉唔同，裡面無毛巾，無水飮，記得帶齊。

銀之湯--

細d，新d，有水飮，溫泉水係白色既，仲有sauna 房。