重回舊地

呢幾日返左舊校代課，雖然都係返工，但係同以前就好唔同喇，首先係工作量少好多啦，其次係心情輕鬆左。

入到教員室(唔係我坐開果個啦)，D同事無咩反應，我明架，我同呢邊D同事又唔係熟，仲成日黑口黑面咁，哈哈，反而D校工就好熱情呀，我以前對佢地都好好禮貌架﹗

而學生呢，聽得最多既係「好耐無見」，然後係「依﹗miss你返左黎呀？開番家政啦﹗」，仲有「你做咩唔教呀？宜家我都唔知佢(宜家教佢既老師)講咩，都唔明既﹗」

有同事問我有無學生搵我聚舊，我教初中咋，唔係高中，D細路邊有咩聚唔聚舊吖，況且，我教緊既時間都唔鍾意同D學生太close，咁多年黎，熟既學生數埋都無十個，有人或者覺得有好多學生朋友好開心，但我唔會囉，所以，到宜家都係「老師」同「學生」既關係。

有幾個熟少少既學生有上我個blog或者add左fb，但係，其實，我都唔係好想架。其實，我真係唔係好啱響香港做老師啩，因為，我只喜歡上課教書。