緬甸－－仰光

終於可以坐定定寫吓復活節個旅行喇﹗

27/3/10晚，坐airasia由深圳去曼谷轉機去仰光。因為零晨兩點幾至到曼谷，所以要瞓機場。第一次瞓機場，感覺係凍。

瞓響張長椅上面，覺得曼谷機場都幾靚喎﹗

28/3/10，0820到仰光，motherland inn已經有人有車響度等我地喇，一上車，嘩，原來係架小巴，成車外國人，得我地兩個中國人咋。 

呢間就係motherland inn既房喇，ok架，US15一晚一間房。尋晚無得好瞓，check in完又食埋個早餐（免費喎，住一晚可以食兩次早餐喎），我地瞓左成粒鐘至出去。

由motherland inn一路行，先到呢個Botataung Pagada，我見要收US2，所以唔入去啦，就影吓相行左出河邊。

呢個碼頭都無咩特別，不過都幾舒服。

然後一路沿Strand Road行到黎呢間Strand Hotel，佢既地位就好似香港既Peninsula咁囉。

沿途見到好多小販，而呢位阿姐同往後我地見到既緬甸人一樣，都塗滿一面香木粉。

一路行都見到唔少英式建築架，咁當然又係殖民時期既遺產啦。

仲有一d好有味道既舊建築物添。

估吓呢抽野係做咩架呢？以前香港都有人用架。

然後又行到去City Hall，幾靚架，我地無入去，響外面影左相就繼續行喇。

然後就見到呢座火車站，幾咁grand。

終於行到去我地第一個目的地：Sule Pagada。就係響呢度，第一次俾僧人搭訕，傾左一大輪，知道緬甸唔少野，往後都有好多咁樣既情況，佢地好鍾意搵d外國人傾計，練吓外語。

離開Sule Pagoda繼續前行，見到呢d油得咁靚既街，走入去行吓啦，真係好有馬來西亞feel。

去完第二個目的地：Bogyoke market，買左件tee替換，食左個麵，就坐左程短途的士去Shwedagon。呢度都幾大，人又多，不過都幾好睇，幾多野影。

呢日係星期日，會有好多義工黎掃地，場面好「壯觀」架。

呢度充滿著僧人、佛像、信眾、遊客。

響緬甸入廟係唔可以著鞋既，一進入範圍之內就要除鞋，玩到我對腳黑到好似乞兒咁。

呢日有幾個細路仔響度做首次剃度儀式，好盛大架，參加既人都會將自己打扮到好靚，好多人列隊架。

呢度亦有好多小朋友響度玩，佢地好得意，好友善。反而有個阿伯就令我對緬甸人有d唔好既印象。個阿伯係咁陪住我行，又帶我睇呢樣睇果樣，介紹呢介紹路，我話多謝佢喇，我想自己行，佢又仲係咁陪住我同我傾計，咁我禮貌上唔好意思走啦，但我都估佢唔知係咪想收錢架喇，咁我就話我一定要搵番個friend，要走喇，佢就即刻問我攞錢，話介紹左咁多野我睇要番d服務費喎，我梗係唔俾啦。唔知係咪咁樣，佢可能詛咒左我，搞到我搵唔到阿豬，企左一粒鐘都係無結果。

天都黑喇，我圍住呢座野行完又行，又企定定，眼金金咁望住d途人，驚阿豬行過左，我睇佢唔到。結果，呢日既重頭戲－－夜景，我只影左四幅。後來重要自己用廣東話做左個尋人廣播至搵得番阿豬。見番佢，佢竟然話：我都有搵你架，我一路影一路睇吓響個view finder度見唔見你囉﹗豬，真係名不虛傳。激到我七孔出煙，好彩，LX3真係幫得手，四張相裡面都仲有兩三張係ok既。

大家見番之後就急急腳返左motherland inn沖涼食飯喇，因為真係好攰﹗

 

*仰光從前係緬甸既首都，後來雖然遷左都去內比都Naypyidaw，但係響好多人心中，仰光仍然係首都。