同你計數

今日去day camp，朝早響操場排隊時，細拳好認真咁鬧緊班Ｂ班，有個細路好口多，於是細拳鬧佢：「你呀，我都未同你計呀，我等陣先同你計。」

個細路指住個操場外面個地下：「你係咪同我計呀，我宜家就同你計，你出黎我同你計。出黎啦。」

我既反應當然係，諗住呢個係佢地既相處模式啦，於是袖手旁觀。

細拳望住個細路：「‧‧‧‧‧‧‧‧」

個細路繼續指住個操場外面個地下：「你同我計丫麻，我就同你計，你出黎我同你計，出黎啦，出—黎—呀—」

細拳都係望住個細路：「‧‧‧‧‧‧‧‧」

於是，我忍唔住口：「你係咪想計？」

個細路：「我同佢計姐。」

我：「我淨係想知你係咪想計。」

個細路：「我唔敢答你喎。」

我：「唔敢答我，又敢問阿sir？我想睇野喎﹗」

細路：「唔計，唔計。」

本來想要佢同阿sir道歉架，不過又唔知佢地平時係咪咁樣溝通開，就算啦。不過，咁樣教細路，唔怪得佢地唔識咩叫做尊師重道，只係識得咩叫無大無細（好似我個身材咁）。可能我out左啦，我見宜家d年青教師好多都係咁樣同d學生相處既，任得佢地搓圓㩒扁。係咪咁樣先叫做師生關係良好，大家打成一片呢？